اقپارات جانە قوعامدىق دامۋ ءمينيسترى دارحان قىدىرالى اتاپ وتكەندەي, زاڭ جوباسى مەملەكەتتىك جاستار ساياساتى سالاسىن جەتىلدىرۋگە, قوعامدىق قاتىناستاردى كەشەندى رەتتەۋدىڭ ءتيىمدى قۇقىقتىق نەگىزىن قالىپتاستىرۋعا, حالىقتى جۇمىسپەن قامتۋعا جانە جاستاردىڭ دامۋىنا قاجەتتى مۇمكىندىكتەر جاساۋعا باعىتتالعان.
«زاڭ جوباسى اياسىندا جاستاردىڭ جاسىن 29-دان 35-كە دەيىن ۇلعايتۋعا باعىتتالعان تۇزەتۋ ەنگىزىلدى, بۇل جاستاردىڭ الەۋمەتتىك بەلسەندىلىگىن ارتتىرۋعا اسەر ەتەدى. جاستاردى جەڭىلدىكپەن جالعا بەرىلەتىن تۇرعىن ۇيمەن قامتاماسىز ەتۋ باعدارلاماسىن ازىرلەۋ جانە ىسكە اسىرۋ بويىنشا جەرگىلىكتى اتقارۋشى ورگاندارعا جاڭا قۇزىرەتتى بەرۋ بويىنشا تۇزەتۋلەر ەنگىزىلدى», دەدى اقپارات ءمينيسترى دارحان قىدىرالى
سونىمەن قاتار الەۋمەتتىك بلوك تۋرالى زاڭ جوباسى اياسىندا مەملەكەت باسشىسىنىڭ 2022 جىلعى 1 قىركۇيەكتەگى جولداۋىن ىسكە اسىرۋعا كەلەسىدەي تۇزەتۋلەر ەنگىزىلدى:
بالا كۇتىمى بويىنشا تولەمدەردى تاعايىنداۋ مەرزىمىنىڭ ۇزاقتىعىن 1,5 جىلعا دەيىن ۇلعايتۋ; ەڭ تومەنگى بازالىق زەينەتاقىنىڭ مولشەرىن ەڭ تومەنگى كۇنكورىس دەڭگەيىنە – 70%-عا, ەڭ جوعارى بازالىق زەينەتاقىنىڭ مولشەرىن – 120%-عا دەيىن دايەكتى تۇردە جەتكىزۋ; ايەلدەردىڭ زەينەتكەرلىك جاسىن 2028 جىلعا دەيىن 61 دەپ بەلگىلەۋ; جاسىنا قاراي زەينەتاقى تولەمدەرىن ەسەپتەۋدىڭ كىرىس شەگىن 46 ەسەلەنگەن ايلىق ەسەپتىك كورسەتكىشتەن 55 ەسەگە دەيىن ارتتىرۋ.«وزدەرىڭىز بىلەتىندەي, جاستارىمىزدىڭ ءبىلىم الۋىنا, جۇمىسقا ورنالاسۋىنا, دەنساۋلىعىنا, ءوزىن-ءوزى دامىتۋعا, ەلىمىزدىڭ الەۋمەتتىك-ەكونوميكالىق جانە قوعامدىق-ساياسي ومىرىنە تولىققاندى قاتىسۋىنا تەڭ مۇمكىندىكتەر مەن قولايلى جاعدايلار جاساۋ وزەكتى ماسەلە. ونىڭ قابىلدانۋى مەملەكەتتىك ورگانداردىڭ مەملەكەتتىك جاستار ساياساتىن ىسكە اسىرۋداعى قىزمەتىنىڭ تيىمدىلىگىن ارتتىرۋعا مۇمكىندىك بەرەدى دەپ ويلايمىز», دارحان قىدىرالى.