پرەمەر-مينيستر ءاليحان سمايىلوۆ قازاقستان قور نارىعى تاريحىنداعى ەڭ ءىرى IPO شەڭبەرىندە «قازمۇنايگاز» ۇك» اق اكتسيالارىنىڭ ساۋدا-ساتتىعىن اشۋ راسىمىنە قاتىستى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
9 قاراشادان 2 جەلتوقسانعا دەيىن ازاماتتار «استانا» حالىقارالىق قارجى ورتالىعىنىڭ بيرجاسىنان (Astana International Exchange, AIX) جانە قازاقستان قور بيرجاسىنان (KASE) قمگ اكتسيالارىن 8406 تەڭگە باعامەن ساتىپ الۋ مۇمكىندىگىنە يە بولدى. 8 جەلتوقساننان باستاپ قايتالاما ساۋدا-ساتتىق اشىلعاننان كەيىن مۇناي كومپانياسىنىڭ اكتسيالارىن نارىقتىقتا دا ساتىپ الۋعا بولادى.
پرەمەر-مينيستر ءوز سوزىندە جەتەكشى ۇلتتىق كومپانيانىڭ IPO-سى ەكونوميكاداعى مەملەكەتتىڭ ۇلەسىن ازايتۋ رەفورماسىن ءارى قاراي ىسكە اسىرۋ شەڭبەرىندە جۇرگىزىلىپ جاتقانىن اتاپ ءوتتى. IPO-نىڭ جالپى كولەمى 154 ملرد تەڭگەنى ($330 ملن-دى), ال بەرىلگەن وتىنىمدەر سانى – شامامەن 130 مىڭدى قۇرادى, قازاقستاندىق ينۆەستورلاردىڭ ۇلەسى – 95%-دان ارتىق.
ء«بىزدىڭ ازاماتتاردىڭ وتىنىشتەرى باسىم تارتىپتە ءارى تولىقتاي قاناعاتتاندىرىلدى. «قازمۇنايگازدىڭ» IPO-سى قازاقستاننىڭ قور نارىعى ءۇشىن ءىرى مامىلەلەردىڭ ءبىرى بولىپ تابىلادى. بۇل وتاندىق قارجى نارىعىن دامىتۋعا, ەلىمىزدىڭ ازاماتتارىنا دا وڭ اسەر ەتەدى», دەدى ءاليحان سمايىلوۆ.
ونىڭ ايتۋىنشا, ءىرى مەملەكەتتىك كومپانيالاردى قور نارىعىنا شىعارۋ – ولاردىڭ قوعام مەن اكتسيونەرلەر الدىندا ەسەپ بەرۋ مىندەتىن ۇلعايتىپ, اشىقتىعىن ارتتىرادى. حالىقتىڭ ينۆەستيتسيالىق مادەنيەتى مەن قارجىلىق ساۋاتتىلىعى جەتىلىپ كەلەدى.
«تاياۋدا باسقا ۇلتتىق كومپانيالار دا 2023-2025 جىلدارى بىرقاتار IPO-لاردى وتكىزۋ ارقىلى اشىقتىعىن ارتتىرادى. بۇل – قازاقستان حالقىنىڭ مۇددەسىنە وراي جاسالعان اشىق ءارى ءتيىمدى ەكونوميكا قۇرۋ باعىتىنداعى قادام», دەپ تۇيىندەدى پرەمەر-مينيستر.
ەستەرىڭىزگە سالا كەتەيىك, 9 قاراشادان 2 جەلتوقسانعا دەيىن قمگ اكتسيالارىنا جازىلۋ جۇرگىزىلدى, ونىڭ بارىسىندا ينۆەستورلاردان 181 ملرد تەڭگەدەن استام سوماعا 129 مىڭنان ارتىق ءوتىنىم كەلىپ ءتۇستى. ناتيجەسىندە جەكەلەگەن ءىرى ينۆەستورلاردا اكتسيالار پاكەتىنىڭ شوعىرلانۋىنا جول بەرمەۋ ءۇشىن 153 ملرد تەڭگەدەن استام سوماعا وتىنىمدەردى قاناعاتتاندىرۋ تۋرالى شەشىم قابىلداندى. قر ازاماتتارىنان اكتسيالاردى ساتىپ الۋعا بەرىلگەن وتىنىمدەر تولىق كولەمدە قاناعاتتاندىرىلدى. وسىلايشا, وسى IPO شەڭبەرىندە «سامۇرىق-قازىنا» قورى قمگ-نىڭ 18 303 584 جاي اكتسياسىن ساتادى, بۇل كومپانيانىڭ ورنالاستىرىلعان جاي اكتسيالارىنىڭ جالپى سانىنىڭ 3%-ىن قۇرايدى.
انىقتاما: IPO (Initial Public Offering) – ينۆەستيتسيالار تارتۋ ماقساتىندا كومپانيا اكتسيالارىن قور بيرجاسىندا باستاپقى جاريا ورنالاستىرۋ. IPO كەزىندە كومپانيا اكتسيالاردى ەركىن اينالىمعا شىعارادى, ونى ينستيتۋتسيونالدىق جانە بولشەك ينۆەستورلار ساتىپ الا الادى.