بيىل 7 مامىردا جامبىل وبلىسىنىڭ شۋ اۋدانىندا پوليتسيا قىزمەتكەرلەرىنە قارسىلىق كورسەتىپ, شابۋىل جاساعاندارعا قاتىستى سوت ۇكىمى شىقتى, دەپ حابارلايدى Egemen.kz.
«شۋ اۋداندىق سوتىنىڭ 2022 جىلعى 6 جەلتوقسانداعى ۇكىمىمەن سەگىز تۇرعىنعا قاتىستى 3 جىلدان 8 جىل 2 ايعا دەيىنگى مەرزىمگە باس بوستاندىعىنان ايىرۋ جازاسى تاعايىندالدى», دەپ جازىلعان ءىىم تاراتقان حابارلامادا.
ەستەرىڭىزگە سالساق, 7 مامىر تۇنگى ساعات 1:30 شاماسىندا شۋ قالاسىنداعى ۆوكزال ماڭىنداعى الاڭدا پوليتسيا قىزمەتكەرلەرى مەملەكەتتىك بەلگىسى جوق ۆاز 2114 اۆتوكولىگىن توقتاتقان ەدى. قۇجاتتاردى كورسەتۋدى سۇراعاندا جۇرگىزۋشى مەن كولىكتە بولعان بەلگىسىز ادام پوليتسيا قىزمەتكەرلەرىنىڭ تالابىن ورىنداۋدان باس تارتقان. ولار پوليتسياعا قارسىلىق كورسەتىپ, شابۋىل جاساي باستاعان. سونىمەن قاتار جاقىن ماڭداعى كافە مەن الاڭنان ءبىر توپ ادام جينالىپ, قوعامدىق ءتارتىپتى ورەسكەل بۇزا وتىرىپ, پوليتسيا قىزمەتكەرلەرىنە دەنە جاراقاتىن كەلتىرىپ, قارۋلارىن تارتىپ الماقشى بولعان.
اتالعان دەرەك بويىنشا قر قك-ءنىڭ 380-بابى 3-بولىگىمەن سوتقا دەيىنگى تەرگەۋ امالدارى جۇرگىزىلىپ, ءىس ماتەريالدارى ۇكىم شىعارۋ ءۇشىن سوتقا جولدانعان بولاتىن.