قازاقستاندا مەديتسينالىق كادرلاردىڭ تاپشىلىعى 7,7 مىڭنان استام ماماندى قۇرايدى. بۇل تۋرالى دەنساۋلىق ساقتاۋ ءمينيسترى اجار عينيات ايتتى, دەپ حابارلايدى Egemen.kz.
«ەلىمىزدىڭ مەملەكەتتىك مەديتسينالىق ۇيىمدارىندا 270 مىڭعا جۋىق مەديتسينا قىزمەتكەرى جۇمىس ىستەيدى, ونىڭ ىشىندە 80 مىڭعا جۋىق دارىگەر جانە 190 مىڭعا جۋىق ورتا مەديتسينا قىزمەتكەرلەرى. رەسپۋبليكادا كادر تاپشىلىعى 7,7 مىڭنان استام ماماندى قۇرايدى, ونىڭ ىشىندە دارىگەرلەر شامامەن 3,9 مىڭ ماماندى, ورتا مەديتسينا قىزمەتكەرلەرى 3,8 مىڭ ماماندى قۇرايدى», دەدى اجار عينيات سەناتتا وتكەن ۇكىمەت ساعاتىندا.
ءمينيستردىڭ ايتۋىنشا, 2021 جىلى وڭىرلەردە 3034-تەن استام جاس دارىگەرلەر جۇمىسقا ورنالاسقان.
«مەملەكەت باسشىسىنىڭ تاپسىرماسى بويىنشا مەديتسينا قىزمەتكەرلەرىن ىنتالاندىرۋ ءۇشىن جىل سايىن دارىگەرلەردىڭ جالاقىسىن كوتەرۋ شارالارى قابىلدانۋدا. مەديتسينا قىزمەتكەرلەرىنىڭ كاسىبي جاۋاپكەرشىلىگىن جانە مەديتسينا قىزمەتكەرلەرىنىڭ مارتەبەسىن ساقتاندىرۋ جۇيەسىن ەنگىزۋدى قامتاماسىز ەتۋ ءۇشىن ءتيىستى زاڭ جوباسى ازىرلەندى, ول قازىر پارلامەنت ماجىلىسىندە قارالۋدا», دەدى باسقارما باسشىسى.