شىمكەنتتىك پارا-كانويست يننوۆاتسيالىق اياق پروتەزدەرىن الدى

جاقىندا ول بۇيىمدى شىعارۋشى كاسىپورىن كەڭسەسىندە پروتەزدەرىنىڭ ولشەمىن سايكەستەندىرىپ, سىناقتان وتكىزدى. جاڭا پروتەزىن الىپ, الداعى پارا-كانوە بويىنشا جارىستارعا دايىندىقتى پىسىقتاي باستادى. الدىڭعى پروتەزىن بيبارىس التى جىل بۇرىن العان.

«ەسكى پروتەزىم زالدا وتكىزەتىن جاتتىعۋلارعا, سونىڭ ىشىندە سۋعا ءتوزىمدى بولۋ ءۇشىن اقشا قوسىپ, كۇشەيتتىم. التى جىل كيىپ ءجۇردىم, ەندى جاڭا پروتەز كەرەك بولدى. قوردىڭ باعدارلاماسى تۋرالى ەستىپ, ءوتىنىم بەرگەننەن كەيىن كوپ ۇزاماي ماقۇلداۋ الدىم. «قازاقستان حالقىنا» قورىنا جانە پروتەز جاساعان «Ottobok» كومپانياسىنا ريزامىن», دەپ اتاپ ءوتتى بيبارىس سپاتاي.

جاڭا پروتەزدەردىڭ قۇنى 12,1 ملن تەڭگە. بيبارىستىڭ ايتۋىنشا, بەس جاسىندا «كاماز» كولىگىنىڭ استىنا ءتۇسىپ, ەكى اياعىنان ايىرىلعان. سول ۋاقىتتان باستاپ پروتەزبەن ءومىر سۇرۋدە. بەسىنشى سىنىپقا دەيىن مەكتەپكە بارىپ, كەيىن مەكتەپتى اياقتاعانعا دەيىن ءۇي جاعدايىندا ءبىلىم الدى. كوپبالالى وتباسىدان شىققان بيبارىسقا جاقىندارى ۇنەمى بەلسەندى قولداۋ تانىتىپ كەلدى.

ء«ومىر بويى پروتەزبەن ءجۇرىپ كەلەمىن. بىراق مەكتەپتە جۇرگەندە اتا-انام مەن ءۇشىن الاڭداپ, وقۋدى ۇيدە جالعاستىردىم. ارينە, ەسەيگەندە ءوز-وزىمە قاراپ, دەربەس بولدىم. ءبىرىنشى كۋرستا قۇقىقتانۋعا ءتۇستىم, سپورتپەن شۇعىلدانۋدى شەشتىم. باسىندا حوببي رەتىندە قارادىم. ناتيجە كورسەتىپ, الداعى مۇمكىندىكتەردى بايقاعانىمدا, وقۋىمدى ءتامامداپ, دەنە شىنىقتىرۋ بولىمىنە ءتۇستىم. جاتتىقتىرۋشىم موتيۆاتسيا بەردى, پارا-كانوەنى ۇناتتىم. بىرىنشىلىكتەرگە قاتىسىپ, جەڭىسكە جەتە باستادىم», دەدى بيبارىس.

بيبارىس – پارا-كانوە بويىنشا ازيا چەمپيونى, سونداي-اق توكيو-2020 پاراليمپياداسىنىڭ قاتىسۋشىسى. ەندى ول پاريجدەگى وتەتىن پاراليمپياداعا دايىندالۋدى جوسپارلاپ وتىر. كەلەسى جىلى ليتسەنزيالار ويناتىلادى. ەرەكشە ادامداردىڭ الەۋمەتتىك بەيىمدەلۋى مەن ءوزىن دامىتۋدىڭ قاجەتتىلىگىن تۇسىنە وتىرىپ, بيبارىس مۇگەدەكتىگى بار ءاربىر ادام وزىنە ماقسات قويىپ, وعان جەتۋدىڭ امالىن قاراستىرۋى كەرەك دەپ ەسەپتەيدى.

«مەكتەپ كەزىندە ينتەرنەت قازىرگىدەي دامىماعان ەدى. ۇيدە وتىرىپ, كوپ نارسەنى بىلمەپپىن. پاراسپورتشىلارعا ارنالعان وليمپيادادان حابارىم بولمادى. سوندىقتان, مەنىڭ ويىمشا, اركىم وزىنە ماقسات قويىپ, ءوزىن ەش شەكتەمەي, سول ارمان-ماقساتتى جۇزەگە اسىرۋ ءۇشىن بار كۇشىن سالۋى ءتيىس», دەپ اتاپ ءوتتى پاراسپورتشى.

«قازاقستان حالقىنا» قورىنىڭ اقپاراتىنشا, بۇگىندە 48 قازاقستاندىق مۇگەدەك بالالار مەن جاستاردى يننوۆاتسيالىق پروتەزدىك-ورتوپەديالىق بۇيىمدارمەن قامتاماسىز ەتۋ بويىنشا قايىرىمدىلىق باعدارلاماسى اياسىندا پروتەزدەر العان. باعدارلامانى ىسكە اسىرۋعا 1 ملرد 568 ملن تەڭگە ءبولىندى.