اتالعان باعىتتا اۆتوكولىكتەردىڭ قاۋىپسىز قوزعالىسى ۇزىندىعى 132 شاقىرىمعا جەتەتىن 6 ۋچاسكەدە قامتاماسىز ەتىلگەن, دەپ حابارلايدى Egemen.kz.
قازىر اتىراۋ-استراحان اۆتوجولىندا جول-قۇرىلىس جۇمىستارى 4 ۋچاسكىدە جۇرگىزىلىپ جاتىر. بۇل قۇرىلىستى ىسكە اسىرۋعا 5 اسفالتبەتون زاۋىتى, 470-تەن استام ارنايى تەحنيكا جانە شامامەن 600-گە جۋىق مامان تارتىلىپ وتىر. ۋچاسكەلەر بويىنشا جول قوزعالىسى اسفالتبەتون جابىنىنىڭ تومەنگى قاباتى توسەلگەن بويدا اشىلىپ وتىرادى. بيىلعى ماۋسىمدا 72 شاقىرىمداي جەرگە اسفالت توسەلدى.
تۇتاستاي العاندا, قازىر قاۋىپسىز جول ءجۇرىسى 277 شاقىرىمنىڭ 132 شاقىرىم جەرىنە دەيىن قامتاماسىز ەتىلگەن. ونىڭ ىشىندە جانباي اۋىلىنان اققىستاۋ اۋىلىنا دەيىن 19,5 شاقىرىم, قۇرعاق كوپىرىنەن 17-ءشى رازەزگە دەيىن 15 شاقىرىم, بايشاقا كوپىرىنەن يساتاي اۋدانىنىڭ شەكاراسىنا دەيىن 15 شاقىرىم, قۇرمانعازى اۋدانىنىڭ شەكاراسىنان اتىراۋ قالاسىنا قاراي 18 شاقىرىم, تۇششىقۇدىق جانە جانباي كەنتتەرىنىڭ ىشىندە 4 شاقىرىم, سونىمەن قاتار رەسەي فەدەراتسياسىنىڭ شەكاراسىنان (استراحانعا) اتىراۋ قالاسىنا قاراي 60 شاقىرىم جەرگە دەيىن ساپالى جول قوزعالىسى ۇيىمداستىرىلعان.
سونىمەن قاتار بارلىق 14 مال وتكەلىنىڭ قۇرىلىس جۇمىستارى اياقتالدى.
اتىراۋ وبلىسىندا تاس كارەرلەرىنىڭ بولماۋى قۇرىلىس جۇمىستارىنىڭ تەجەلىپ قالۋداعى نەگىزگى پروبلەمالاردىڭ ءبىرى ەكەنى بەلگىلى. بارلىق قيىرشىق تاستى تەمىرجول ارقىلى اكەلۋگە تۋرا كەلەدى. ۋاكىلەتتى ورگاندارمەن كەلىسسوز جۇرگىزۋ ارقىلى قاجەتتى ماتەريالدى تاسىمالداۋعا اشىق ۆاگونداردى بەرۋ ماسەلەسى ءىشىنارا شەشىلگەنىن ايتا كەتۋ كەرەك. 24 مىڭ اشىق ۆاگون قاجەت بولىپ تۇرعانىن ەسكەرسەك, ونىڭ تەك جارتىسى, ياعني 11,5 مىڭ اشىق ۆاگون عانا ۇسىنىلىپتى. سپيكەرلەردىڭ ايتۋىنشا, قۇرىلىس-مونتاج جۇمىستارىنىڭ بارىسىنا جىل سايىنعى جازعى ماۋسىمداعى بيتۋم مەن جاعارماي ماتەريالدارىنىڭ تاپشىلىعى تەرىس اسەر ەتىپ كەلەدى.