سايلاۋعا دەيىن كوپتەگەن ساراپشىنىڭ ماڭىزدى ناۋقاندى قازاقستاندىقتاردىڭ قاسىم-جومارت توقاەۆقا دەگەن سەنىمى قانشالىقتى ەكەنىن ايقىندايتىن ءىس-شارا رەتىندە قاراستىرعانى راس. الەمدە قالىپتاسقان گەوساياسي جاعدايدى جانە ەل ىشىندەگى احۋالدى سارالاساق, وزگە كانديداتتار وعان لايىقتى قارسىلاس اتاندى دەۋ قيىن ەدى. ۇمىتكەرلەردىڭ سايلاۋالدى باعدارلاماسىندا نازار اۋدارتار قۇندى اقپارات بولمادى. ولاردىڭ باعدارلامالارى تەرەڭ ساراپتاما جاساۋعا كەلمەيتىن ءالسىز بولدى دەسەك, ارتىق ايتقانىمىز ەمەس.
ءوز كەزەگىندە قاسىم-جومارت توقاەۆ سايلاۋعا دەيىن ءار الەۋمەتتىك توپپەن كەزدەسىپ, ولاردىڭ پروبلەمالارىن شەشۋگە تىرىستى. ءاۋ باستا ونىڭ جۇمىس باعىتى ورتا جانە الەۋمەتتىك ءالسىز توپتاردى قولداۋعا باعىتتالعانىن اتاپ وتكەن ءجون. اسىرەسە انا مەن بالانى قولداۋ, تۇرعىنداردىڭ ءومىر ساپاسىن ارتتىرۋ سياقتى ماڭىزدى الەۋمەتتىك ماسەلەلەرگە ءمان بەرەدى.
بۇل قادامدار ەلەكتورات تاراپىنان جوعارى باعالاندى. ءالى دە بولسىن اتقارىلار شارۋا از ەمەس. ماسەلەن, قازاقستاندىق ساياسي مادەنيەتتى دامىتۋ ماسەلەسى الدان شىعادى. بۇل – جالعىز ەل باسقاراتىن ازاماتتاردىڭ عانا پروبلەماسى ەمەس, ازاماتتىق قوعامنىڭ دا «دەرتى». استانا مەن الماتى قالاسىنداعى ابسەنتەيزمنىڭ دەڭگەيى جوعارى بولۋى ونداعى تۇرعىنداردىڭ سانى كوپ بولۋىمەن بايلانىستى شىعار. الماتى قالاسىندا ادەتتەگىدەي داۋىس بەرۋشىلەردىڭ ۇلەسى از بولدى. ايتپەسە, بۇل شاھاردىڭ الەۋمەتتىك-ەكونوميكالىق دامۋى تابىستى جالعاسىپ, تۇرعىندارى دا ەلدىڭ ساياسي ومىرىنە بەيجاي قارامايتىنداي ءجونى بار ەدى. استانا قالاسىندا دا ەلەكتوراتتىڭ جارتىسى عانا داۋىس بەرۋگە كەلگەن. بۇل – تۇرعىنداردىڭ قالعان بولىگى وزدەرىنىڭ تۇرمىس جاعدايىنىڭ تومەندىگىن ەلدىڭ ساياساتىمەن بايلانىستىراتىنىن ايقىنداعانداي.
جالپى, ساراپشىلاردىڭ كوبى بۇل سايلاۋدا تارتىس بولمادى دەپ سىن ايتقانىن ەستىپ ءجۇرمىز. دەسە دە الەمدەگى گەوساياسي جاعدايعا قاراپ بۇلاي ورىن الۋى دا زاڭدىلىق شىعار دەگەن وي كەلەدى.
اسسول ميرمانوۆا,
ەۋروپالىق جانە حالىقارالىق ساياسي كەڭەسشىلەر قاۋىمداستىعىنىڭ مۇشەسى