«پارتيالىق ەمەس بايقاۋ ورتالىعى» قوعامدىق بىرلەستىگى كەزەكتەن تىس پرەزيدەنت سايلاۋىن قوعامدىق باقىلاۋعا قاتىستى قورىتىندى مالىمەتتى جاريالادى.
ورتالىق توراعاسى تولەگەن كۇنادىلوۆ داۋىس بەرۋ بارىسىنداعى رەسپۋبليكالىق جەدەل شتابتىڭ اتقارعان جۇمىسى تۋرالى ايتىپ بەردى. ونىڭ ايتۋىنشا, سايلاۋ كۇنى تاڭەرتەڭگى ساعات 6:00-دەن باستاپ 22 مىڭ بايقاۋشى ەلىمىزدىڭ بارلىق سايلاۋ ۋچاسكەلەرىندە, سونىڭ ىشىندە ەڭ شالعايداعى سايلاۋ ۋچاسكەلەرىندە باقىلاۋ جۇرگىزدى. پارتيالىق ەمەس بايقاۋ ورتالىعىنىڭ رەسپۋبليكالىق شتابىنىڭ جانىنان احۋالدىق ورتالىق جۇمىس ىستەدى. وعان ناقتى ۋاقىت رەجىمىندە ورتالىقتىڭ وڭىرلىك ۇيلەستىرۋشىلەرىنەن داۋىس بەرۋ بارىسىن باقىلاۋ تۋرالى كەلىپ تۇسكەن وزەكتى اقپاراتتار مەن دەرەكتەرگە تالداۋ جۇرگىزىلگەن.
«بارلىق بايقاۋشىلار ۋچاسكەلەرگە كەدەرگىسىز جىبەرىلدى. ۋچاسكەلەرگە كەلگەننەن كەيىن بايقاۋشىلار سايلاۋشىلارعا ارنالعان اقپاراتتىق ستەندتەردىڭ رەسىمدەلۋىن تەكسەردى. بايقاۋشىلارعا قىسىم جاساۋ جانە ولاردىڭ جۇمىسىنا كەدەرگى جاساۋ تۋرالى شاعىمدار تۇسكەن جوق», دەدى ت.كۇنادىلوۆ.
داۋىس بەرۋ بارىسى مەن ناتيجەلەرىنە اسەر ەتۋى مۇمكىن بۇزۋشىلىقتار تۋرالى جاپپاي حابارلامالار بولعان جوق. بىراق بىرقاتار سايلاۋ ۋچاسكەسىندە جەكەلەگەن بۇزۋشىلىقتار تىركەلگەن. دەسە دە, ونداي جاعدايدىڭ الدى الىنىپ, جالپى سايلاۋدىڭ زاڭدىلىعى مەن اشىقتىعىنا اسەر ەتپەگەنىن اتاپ وتكەن ءجون. بايقاۋشىلار داۋىستاردى ساناۋ ۇدەرىسى بارىسىندا بۇزۋشىلىقتاردى انىقتامادى.
«باقىلاۋدىڭ نەگىزگى ماقساتى زاڭنامانىڭ, اشىقتىق پەن وبەكتيۆتىلىكتىڭ ساقتالۋىن باقىلاۋ بولسا دا, ءبىزدىڭ بايقاۋشىلارىمىزدىڭ بىرقاتار ەسكەرتۋى كەيبىر قوعامدىق ۇيىمدار بايقاۋشىلارىنىڭ سايلاۋ ۋچاسكەلەرىندەگى تەرىس ارەكەتىنە قاتىستى. بۇل فاكتىلەر زاڭدى ءبىلۋ دەڭگەيىنىڭ جەتكىلىكسىزدىگىنە نەمەسە تاجىريبەنىڭ بولماۋىنا بايلانىستى. كەيبىرەۋلەر ادەيى ارانداتىپ, كوميسسيالاردىڭ جۇمىسىن جامانداۋعا ارەكەت جاسادى. مۇنداي ارەكەتتەردى سايلاۋ ۋچاسكەلەرىندە دە, اقپارات الاڭىندا دا كەزدەستىردىك», دەدى تولەگەن كۇنادىلوۆ.
وسى رەتتە, ۋچاسكەلەردەگى اعىمداعى جاعدايدىڭ وبەكتيۆتى بەينەسىن كورسەتۋ ماقساتىندا پارتيالىق ەمەس بايقاۋ ورتالىعىنىڭ بايقاۋشىلارى الەۋمەتتىك جەلىلەردە بەلسەندى جۇمىس جۇرگىزگەن. «سايلاۋ كۇنى بايقاۋشىلار 3 مىڭنان استام جازبا جاريالادى, ولار شىنايى اقپاراتپەن كەيبىر جاساندى وقيعالاردىڭ ءمانىن جان-جاقتى ءتۇسىندىردى. كۇنى بويى كەلىپ تۇسكەن اقپاراتتى تالداپ, جەدەل تەكسەرە وتىرىپ, ءبىز الەۋمەتتىك جەلىلەر مەن باق-تاعى ءوز اككاۋنتتارىمىزدا ءتيىستى مالىمدەمەلەر جاريالادىق», دەدى ت.كۇنادىلوۆ.