اقتوبە جىلۋ ەلەكتر ورتالىعىندا قۋاتتىلىعى 57 مۆت-قا تەڭ جاڭا گاز تۋربينالىق قوندىرعى ىسكە قوسىلدى. سالتاناتتى ءىس-شاراعا اقتوبە وبلىسىنىڭ اكىمى ەرالى توعجانوۆ, ەنەرگەتيكا ۆيتسە-ءمينيسترى جاندوس نۇرماعانبەتوۆ, ەۋرازيالىق دامۋ بانكىنىڭ باسقارۋشى ديرەكتورى الەكساندر گارەەۆ قاتىستى.
اقتوبە جىلۋ ەلەكتر ورتالىعى ەلەكتر قۋاتىن 1943 جىلدان باستاپ ءوندىرىپ كەلەدى. وبلىس ورتالىعى تۇرعىندارى مەن كاسىپورىندارىن ورتالىقتاندىرىلعان جىلۋ جانە ەلەكتر قۋاتىمەن سەكسەن جىلعا جۋىق ۋاقىت بويى قامتاماسىز ەتىپ كەلگەن ورتالىقتىڭ جابدىقتارى ەسكىرگەندىكتەن, 2020 جىلى كاسىپورىندا قايتا جاڭعىرتۋ جۇمىستارى باستالدى. ەكى جىل ىشىندە نەگىزگى قۇرال-جابدىقتارى مەن قوندىرعىلارى اۋىستىرىلدى. قايتا جاراقتاندىرۋ كەزىندە ءوندىرىس ۇدەرىسىن بارىنشا اۆتوماتتاندىرۋعا مۇمكىندىك بەرەتىن وزىق تەحنولوگيالار پايدالانىلدى.
جاڭا گاز تۋربينا قوندىرعىسى تولىق ىسكە قوسىلسا, اقتوبە جىلۋ ەلەكتر ورتالىعىندا قۋات ءوندىرۋ كولەمى 118 مۆت-تان 175 مۆت-قا ارتىپ, جىلىنا 423 ملن كۆت ساعات ەلەكتر قۋاتى الىنادى. گاز تۋربيناسىندا جۇمىس ىستەۋگە جاڭا ماماندار تارتىلىپ, 40-تان استام جاڭا جۇمىس ورنى قۇرىلماق. بۇل جوبانىڭ قۇنى 20,9 ملرد تەڭگەگە تەڭ. ونىڭ 15,98 ملرد تەڭگەسىن ەۋرازيالىق دامۋ بانكى نەسيەلىك كەلىسىم نەگىزىندە قارجىلاندىرادى.
ايتا كەتۋ كەرەك, اقتوبە وبلىسىندا ەلەكتر قۋاتىن تۇتىنۋ مولشەرى جىلىنا 900 مەگاۆاتقا تەڭ. جىل سايىن تۇرعىندار مەن كاسىپورىندار تاراپىنان ەلەكتر قۋاتىن تۇتىنۋ مولشەرى ارتىپ بارادى. الداعى ونجىلدىقتا وڭىردە ەلەكتر قۋاتىنىڭ جىلدىق تۇتىنۋ مولشەرى 1 500 مۆت-قا ۇلعايماق. بۇگىندە اقتوبە وبلىسىنا جەتكىزىلەتىن ەلەكتر قۋاتىنىڭ تەڭ جارتىسى ءوز ەلىمىزدە وندىرىلسە, قالعانى رەسەي فەدەراتسياسىنىڭ ورىنبور وبلىسىنان تاسىمالدانادى. قالا تۇرعىندارى سانىنىڭ ارتۋىمەن, جاڭا كاسىپورىنداردىڭ ىسكە قوسىلۋىمەن ەلەكتر قۋاتىن تۇتىنۋ مولشەرى كۇرت ارتىپ, قوسىمشا قۋات كوزدەرىن تابۋ وزەكتى ماسەلەگە اينالدى.
«بۇل – ءوڭىر ءۇشىن ماڭىزدى جوبا. ويتكەنى بۇگىندە اقتوبە وبلىسى ەلەكتر ەنەرگياسىنىڭ ءبىر بولىگىن سىرتقى كوزدەردەن الىپ وتىر. وسى جوبانى ىسكە اسىرۋ تۋرالى ينۆەستيتسيالىق كەلىسىمگە 2021 جىلى قول قويىلدى. وزدەرىڭىز كورىپ تۇرعانداي, ەكى جىلعا تولمايتىن ۋاقىت ىشىندە اۋقىمدى جۇمىس اتقارىلدى», دەپ اتاپ ءوتتى ەنەرگەتيكا ۆيتسە-ءمينيسترى جاندوس نۇرماعانبەتوۆ.
وبلىس اكىمى مەملەكەت باسشىسىنىڭ تاپسىرماسىنا سايكەس بالامالى قۋات كوزدەرىن پايدالانۋ بويىنشا جۇمىستار بەلسەندى تۇردە جالعاسا بەرەتىنىن اتاپ ءوتتى.
ء«بىزدىڭ وبلىسىمىزدىڭ ەنەرگەتيكالىق قاجەتتىلىگىن جانە قاۋىپسىزدىگىن قامتاماسىز ەتۋگە مەملەكەتتىڭ, بيزنەستىڭ جانە جالپى قوعامنىڭ بىرلەسكەن كۇش-جىگەرى قاجەت», دەدى ە.توعجانوۆ.
بيىلعى جازدا ERG كومپانياسى حرومتاۋ اۋدانىندا قۋاتتىلىعى 155 مۆت بولاتىن جەل ەلەكتر ستانساسىنىڭ قۇرىلىسىن باستادى. بۇدان باسقا 2020 جىلى جانە 2021 جىلدارى قارعالى اۋدانىندا Eni يتاليالىق ءىرى ترانسۇلتتىق كورپوراتسياسى قۋاتتىلىعى 96 مۆت بولاتىن جەل ەلەكتر ستانساسىن ىسكە قوستى. بۇل جەلدىڭ قۋاتىنان ەلەكتر قۋاتىن ءوندىرۋ جوباسى جاسىل ەنەرگەتيكانى, سونىڭ ىشىندە بالامالى قۋات كوزدەرىن ىسكە قوسۋ باعىتىندا قولعا الىنعان جۇمىستار. ERG كومپانياسىنىڭ حرومتاۋ اۋدانىنىڭ ءدوڭ ەلدىمەكەنى جانىندا تۇرعىزعان جەلدىڭ قۋاتىن ەلەكتر قۋاتىنا اينالدىراتىن باعانالارى مۇعالجار قىراتتارىنىڭ كۇشتى اۋا اعىنى وتەتىن بولىگىندە ورنالاسقان.
اقتوبە وبلىسى