تۇركى مەملەكەتتەرىنىڭ پارلامەنتتىك اسسامبلەياسى ميسسياسىنىڭ باسشىسى, تۇركيا ۇلى ۇلتتىق جينالىسىنىڭ مۇشەسى ەربول كايا قازاقستانداعى پرەزيدەنت سايلاۋى ادىلدىك قاعيداتتارى مەن حالىقارالىق ستاندارتتارعا سايكەس وتكەنىن راستادى, دەپ حابارلايدى Egemen.kz.
«سايلاۋ حالىقارالىق ستاندارتتار مەن قۇجاتتارعا سايكەس وتكىزىلگەنىنە كۋا بولدىق. 2022 جىلى 5 ماۋسىمدا رەفەرەندۋم ءوتىپ, قازاقستان كونستيتۋتسياسىنىڭ 33 بابىنا وزگەرىس ەنگىزىلدى. رەفەرەندۋمنىڭ ناتيجەلەرىنە سايكەس, پرەزيدەنت جەتى جىلدىق مەرزىمگە سايلانادى. ءبىزدىڭ دەلەگاتسيا 17 قاراشادا كەزەكتەن تىس پرەزيدەنت سايلاۋىن باقىلاۋ بويىنشا جۇمىسىن باستادى. سايلاۋدى باقىلاۋ باعدارلاماسى اياسىندا قر وسك توراعاسى نۇرلان ابدىروۆپەن, قر پارلامەنتى سەناتىنىڭ توراعاسى ماۋلەن اشىمباەۆپەن, ءماجىلىس سپيكەرى ەرلان قوشانوۆپەن بىرقاتار كەزدەسۋ وتكىزدىك. كەزدەسۋلەر بارىسىندا ءبىز سايلاۋعا دايىندىقتى باقىلاپ, قوسىمشا اقپارات الدىق, كانديداتتارمەن دە سويلەستىك. ءبىز كانديداتتاردىڭ باعدارلامالارىمەن دە تانىستىق», دەدى تۇركپا پارلامەنتتىك اسسامبلەياسى ميسسياسىنىڭ باسشىسى جۋرناليستەرگە بەرگەن سۇحباتىندا.
ول تۇركپا مۇشەلەرى سايلاۋ ۋچاسكەلەرى اشىلعاننان باستاپ داۋىستاردى ساناۋ باستالعانعا دەيىن سايلاۋ پروتسەسىن باقىلاعانىن اتاپ ءوتتى.
«سايلاۋ كۇنىندە ورتالىق سايلاۋ كوميسسياسى بىزگە بارلىق نۇسقاۋلىقتاردى بەردى. جالپى سايلاۋ تىنىش ءوتتى. ءبىز قازاقستان پرەزيدەنتىن سايلاۋ بارىسىنا وڭ باعا بەرەمىز. ءبىزدىڭ دەلەگاتسيا سايلاۋدىڭ جوعارى, كاسىبي دەڭگەيدە وتكەنىن راستايدى. سونداي-اق مۇمكىندىگى شەكتەۋلى جاندارعا بارلىق جاعداي جاسالعانى دا قۋانتادى. وسك دەرەكتەرىنە سايكەس سايلاۋشىلاردىڭ بەلسەندىلىگى 69,43%-دى قۇرادى. سايلاۋشىلاردىڭ 81,31%-ى قاسىم-جومارت توقاەۆقا داۋىس بەردى. ءبىز سايلاۋدىڭ ۇلتتىق زاڭناماعا جانە حالىقارالىق ستاندارتتارعا سايكەس وتكەنىن راستايمىز», دەپ اتاپ ءوتتى ەربول كايا.