تەحنيكا عىلىمدارىنىڭ كانديداتى, دوتسەنت نۇرلىباي ماناباەۆ ارىپتەستەرىمەن بىرگە 4 ماشينانىڭ جۇمىسىن اتقاراتىن امبەباپ تەحنيكانى ازىرلەدى. «بولاشاق» تۇلەگى مەملەكەتتەن گرانت الىپ, تەحنيكانىڭ بىرنەشە داناسىن سىناقتان وتكىزىپ ۇلگەرگەن.
قازاقستاندىق عالىمنىڭ ونەرتابىسىنىڭ كومەگىمەن شارۋالار بىرنەشە جۇمىستى ءبىر تەحنيكانىڭ كومەگىمەن جۇزەگە اسىرا الادى. سونىمەن قاتار بۇل وتىن شىعىنىن 3 ەسە, گازدىڭ اتموسفەراعا شىعۋىن 2-3 ەسەگە ازايتادى, ال ونىمدىلىك 10-15%-عا كوبەيەدى. يننوۆاتسيالىق قۇرىلعىنىڭ قازاقستان جانە تمد مەملەكەتتەرىندە بالاماسى جوق.
«مەن ەڭبەك جولىمدى اۋىلدا باستادىم جانە شارۋالاردىڭ جۇمىسى قانشالىقتى اۋىر ەكەنىن بىلەمىن. شەتەلدە تاعىلىمدامادان ءوتۋىم, اۋىلشارۋاشىلىق وندىرىسىندەگى كوپجىلدىق ەڭبەگىم عالىم رەتىندە قالىپتاسۋىما ىقپال ەتتى. تاياۋدا بۇل ازىرلەمەم جاپپاي وندىرىسكە شىعادى دەپ سەنەمىن», دەپ اتاپ ءوتتى نۇرلىباي ماناباەۆ.
ول «بولاشاق» باعدارلاماسىمەن ك.ا.تيميريازەۆ اتىنداعى ماسكەۋ اۋىلشارۋاشىلىق اكادەمياسىندا عىلىمي تاعىلىمدامادان وتكەن. ايتا كەتەلىك, عالىمنىڭ تراكتور تىركەمەسى جەر جىرتادى, ەگىستىك تەگىستەيدى, ارىق قازادى. بۇل تەحنيكانى جاساۋعا تەمىر دە از كەتەدى. ياعني 800 كيلوعا دەيىن جەڭىلدەيدى. عالىم تەحنيكانى پاتەنتتەپ تە ۇلگەرگەن ەكەن. ەندى دەمەۋشى تابىلىپ جاتسا, جاپپاي وندىرىسكە شىعارۋعا ءازىر. شىمكەنت قالالىق اۋىل شارۋشىلىعى جانە ۆەتەريناريا باسقارما باسشىسىنىڭ ورىنباسارى قايرات بازاربەكوۆ اتالعان جوبا وندىرىسكە ەنگىزۋ مۇمكىندىگىنە يە ەكەنىن جەتكىزدى.