قاراعاندى قالاسى كۇنگەي شاعىناۋدانىندا ورنالاسقان №795 سايلاۋ ۋچاسكەسىندە قازاقتىڭ اقيىق اقىنى, مەملەكەتتىك سىيلىق يەگەرى سەرىك اقسۇڭقار ۇلى داۋىس بەردى, دەپ جازادى Egemen.kz.
- بۇگىن – تاريحي سىندارلى ءسات. قازاقستان حالقى ءوزىنىڭ تاڭداۋىن جاسايدى. ءبىز ەرتەڭنەن باستاپ, جاڭا قازاقستاندا, وركەنيەت تورىنە قاراي ۇمتىلعان, قۇقىقتىق مەملەكەت قۇراتىن, باردى بار, جوقتى جوق دەپ ايتاتىن قازاقستاندا ءومىر سۇرەتىن بولامىز. مەن ۇرپاعىم ءۇشىن, ۇرپاعىمنىڭ بولاشاعى ءۇشىن داۋىس بەرىپ تۇرمىن. تاريحي تاڭداۋىمدى دۇرىس جاسادىم دەپ ويلايمىن. زامان ەرتەڭنەن 180 گرادۋسكا وزگەرەدى دەپ سەنەمىن, - دەيدى سەرىك اقسۇڭقار ۇلى.
№795 سايلاۋ ۋچاسكەسىنىڭ توراعاسى دينارا مۋساەۆانىڭ ايتۋىنشا بۇل سايلاۋ ۋچاسكەسىندە 2885 سايلاۋشى بار. قازىرگى كەزدە 105 ادام داۋىس بەردى. سايلاۋشىلار اراسىندا 18 جاسقا ەندى عانا تولعان 64 جاس تىزىمدە.
- سايلاۋ ۋچاسكەسىندە داۋىس بەرۋ ءۇشىن بارلىق جاعداي جاسالعان. مۇمكىندىگى شەكتەۋلى جاندارعا ارنايى ورىندار قاراستىرىلدى. ۇيدەن داۋىس بەرەمىن دەپ ءوتىنىش بىلدىرگەن 1 سايلاۋشى بار. ال ەڭ ۇلكەن ەگدە جاستاعى داۋىس بەرۋشىمىزدىڭ جاسى 85-تە, - دەيدى كوميسسيا توراعاسى.