ۇلىبريتانيا پارلامەنتى قاۋىمدار پالاتاسىنىڭ جوعارى ساياسي كەڭەسشىسى رەزا تابريزي مەن مانچەستەر قالالىق مەرياسىنىڭ قىزمەتكەرى ابيد چوحان حالىقارالىق بايقاۋشىلارعا ارنالعان قولعابىس كورسەتۋ ورتالىعىنداعى بريفينگكە قاتىستى, دەپ جازادى Egemen.kz.
ولاردىڭ ايتۋىنشا, ازىرشە وزدەرى ارالاعان سايلاۋ ۋچاسكەلەرىندە ەشقانداي بۇزۋشىلىقتار بايقالماعان.
«قازاقستانعا العاش رەت كەلىپ وتىرعان جوقپىن. 2019 جىلعى سايلاۋعا شەتەلدىك بايقاۋشى رەتىندە قاتىسقان ەدىم. سول جولى مۇنداعى سايلاۋ پروتسەسىنىڭ اشىقتىعىنا كوز جەتكىزگەنبىز. بۇل جولى دا ءبارى ويداعىداي بولادى دەگەن سەنىمدەمىن. تاڭەرتەڭنەن بەرى بىرنەشە سايلاۋ ۋچاسكەسىنە باردىم. سايلاۋشىلاردىڭ بەلسەندىلىگى جاقسى. ارينە, ءار ەلدەگى سايلاۋ ءارتۇرلى وتەدى. ەڭ باستىسى ساياسي دودا اشىق ءارى ءادىل وتسە – سەنىمنىڭ اقتالعانى», دەدى رەزا تابريزي.
شەتەلدىك بايقاۋشى ءالى بىرنەشە سايلاۋ ۋچاسكەسىنە بارۋدى جوسپارلاپ وتىرعانىن ايتتى.
«ارينە, بىرنەشە ۋچاسكەگە بارىپ, جالپى ساياسي دوداعا باعا بەرە المايمىز. سوندىقتان سايلاۋ اياقتالعانعا دەيىن جۇمىس ىستەيمىز. استانا سايلاۋ ۋچاسكەلەرىندە مۇمكىندىگى شەكتەۋلى ادامدارعا جاقسى جاعداي جاسالعان. وسىنى بولە-جارا اتاپ وتكىم كەلەدى», دەدى رەزا تابريزي.
تاڭەرتەڭنەن بەرى استاناداعى بىرنەشە سايلاۋ ۋچاسكەسىنە بارعان ابيد چوحان جاستاردىڭ بەلسەندىلىگى تومەن ەكەنىن جەتكىزدى.
«تاڭداۋ جاساۋعا كەلگەن تۇرعىنداردىڭ قاتارى كوپ. الايدا ولاردىڭ ىشىندە جاستاردىڭ ۇلەسى از سەكىلدى. جاستار – ەلدىڭ بولاشاعى. سوندىقتان ولاردى ماڭىزدى ءىس-شارالارعا بارىنشا تارتۋ كەرەك. قازاقستانعا العاش رەت كەلىپ وتىرمىن. بۇل مەملەكەت ماعان ۇنادى. بۇيىرتسا, كەلەر جىلعى سايلاۋعا دا قاتىسسام دەگەن نيەت بار», دەدى ابيد چوحان.