الماتى اكىمى ەربولات دوساەۆ جۇبايىمەن م.مامەتوۆا اتىنداعى No28 مەكتەپ-ليتسەيدە ورنالاسقان No358 سايلاۋ ۋچاسكەسىنە تاڭعى ساعات 7-دە العاشقىلاردىڭ ءبىرى بولىپ كەلدى, دەپ حابارلايدى Egemen.kz.
«بۇگىندە قازاقستان ازاماتتارى كونستيتۋتسيالىق قۇقىعىن پايدالانىپ, ەلىمىزدىڭ الداعى 7 جىلدا قالاي داميتىنىن ءوز داۋىستارىمەن تاڭدايدى. ءاربىر قازاقستاندىقتىڭ داۋىسى ماڭىزدى, مەن بۇگىن الماتى قالاسىنىڭ ازاماتى جانە تۇرعىنى رەتىندە قالامىزدىڭ, تۇرعىندارىمىزدىڭ, وتباسىم مەن بالالارىمنىڭ جارقىن بولاشاعى ءۇشىن ءوز داۋىسىمدى بەرۋگە كەلدىم. الماتىلىقتار بىرلىگىن كورسەتىپ, ءوز تاڭداۋىن ايقىندايتىنىنا سەنىمدىمىن», دەدى ەربولات دوساەۆ.
سايلاۋ كۇنى الماتىدا بارلىعى 600 سايلاۋ ۋچاسكەسى اشىلدى, تۇرۋ ىقتيارحاتىنىڭ بار-جوعىنا قاراماستان 55 ۋچاسكەدە داۋىس بەرۋگە بولادى. قالادا 1,2 ميلليونعا جۋىق ادام داۋىس بەرۋگە قۇقىلى.