تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى قازاقستاندىقتاردىڭ PlayStation جەلىسىنە قولجەتىمدىلىك ماسەلەسىن شەشۋ ءۇشىن Sony كومپانياسىنىڭ وكىلدەرىمەن تۇراقتى جۇمىس جۇرگىزۋدە, دەپ حابارلايدى Egemen.kz.
قازاقستانداعى «PlayStation» پايدالانۋشىلارى PlayStation Network ەسەپتىك جازباسىنا كىرۋ كەزىندە قيىندىقتار تۋىندايدى, سونداي-اق قازاقستاندىق بانك كارتالارى مەن تولەم جۇيەلەرى ارقىلى ينتەرنەت-دۇكەندە ويىنداردى تولەي المايدى.
«مينيسترلىك قازاقستان رەسپۋبليكاسىنىڭ جاپونياداعى ەلشىلىگىمەن جانە قازاقستان رەسپۋبليكاسىنىڭ امەريكا قۇراما شتاتتارىنداعى ەلشىلىگىمەن بىرلەسىپ, قولجەتىمدى ەتۋ ماسەلەسىن تالقىلاۋ ماقساتىندا Sony Interactive Entertainment وكىلدەرىمەن تۇراقتى جۇمىس جۇرگىزۋدە. سونداي-اق PlayStation Network شوتىنا قازاقستاندىق بانكتىك كارتالارى مەن تولەم جۇيەلەرى ارقىلى تولەمدەردى جۇزەگە اسىرۋ ماسەلەلەرى تالقىلانۋدا», دەلىنگەن ۆەدومستۆو حابارلاماسىندا.
مينيسترلىك مامىر ايىندا امەريكا قۇراما شتاتتارى مەن جاپونياداعى ەلشىلىكتەر Sony Enteractive Entertainment-پەن كەزدەسۋ ۇيىمداستىرۋدى قاراستىرىپ جاتقانىن حابارلاعان ەدى. وسىعان وراي, مينيسترلىك ماسەلەنى ودان ءارى زەردەلەۋ ءۇشىن جوعارىدا اتالعان ۇيىمداردان جاۋاپ كۇتۋدە.
ەسكە سالايىق, ناۋرىز ايىندا تسيفرلىق دامۋ ءمينيسترى باعدات مۋسين PlayStation تسيفرلىق سەرۆيستەرىنىڭ قازاقستاندىق پايدالانۋشىلارىنىڭ ماسەلەلەرىن شەشۋدى تاپسىرعان ەدى.
ايتا كەتەيىك, 2022 جىلدىڭ ناۋرىز ايىنان باستاپ, رەسەيدە Sony Interactive Entertainment ءوز جۇمىسىن توقتاتقان. سونىڭ ناتيجەسىندە قازاقستاندىقتار دا ءوز PS Store دۇكەنىنە كىرۋ مۇمكىندىگىنەن ايىرىلدى. قازاقستان PlayStation جۇيەسىندە بولماعاندىقتان, ولار رەسەي ارقىلى تىركەلگەن.