1949 جىلى تۋعان ورال قالاسىنىڭ تۇرعىنى 2022 جىلدىڭ 5 قاراشاسىندا ورمانعا ساڭىراۋقۇلاق تەرۋگە كەتىپ, جوعالعان. ارادا 10 كۇننەن استا ۋاقىت وتسە دە ازامات ءالى تابىلمادى, دەپ جازادى Egemen.kz.
تاۋلىك بويى ۇيگە ورالماعان تۇرعىننىڭ تۋىستارى 6 قاراشا كۇنى باتىس قازاقستان وبلىسىنىڭ توتەنشە جاعدايلار دەپارتامەنتىنە جۇگىنەدى.
ەگدە جاستاعى ادامدى ىزدەۋگە «قازاۆياقۇتقارۋ» اق تىكۇشاعى جۇمىلدىرىلعان. قازىر جالپى اۋدانى 56 كم2 ورمان جانە 25 كم سۋ اۋماعى زەرتتەلىپتى. دەسە دە ناتيجە جوق.
سونداي-اق, قۇتقارۋ-ىزدەستىرۋ جۇمىستارىنا 6 قاراشادان بەرى قۇتقارۋشىلار, پوليتسەيلەر مەن ەرىكتىلەر, جەرگىلىكتى تۇرعىندار, ورمانشىلار جانە اسكەري قىزمەتكەرلەر اتسالىسىپ جاتىر. جالپى 325 ادام جانە 41 بىرلىك تەحنيكا جۇمىلدىرىلعان.
تۋىستارىنىڭ ايتۋىنشا, جوعالعان ادام ەستە ساقتاۋ قابىلەتىنەن ايىرىلماعان, الكوگول سۋسىندارىنا اۋەستىگى جوق. سونىمەن قاتار, جوعالعان تۇرعىن وزىمەن ۇيالى تەلەفون الماعانى دا بەلگىلى بولدى.
قۇتقارۋشىلار جوعالعان ازاماتقا قاتىستى قانداي دا ءبىر اقپارات بولعان جاعدايدا «112» نەمەسە 51-42-22 (بقو تجد كەزەكشى ءبولىمى) نومىرلەرى بويىنشا حابارلاۋدى سۇرايدى.