استانادا مانەرلەپ سىرعاناۋدان «ASTANA OPEN» قالالىق اشىق چەمپيوناتى ءوتىپ جاتىر. ايتۋلى دوداعا الماتى مەن استانا قالالارىنان وزگە 6 وڭىردەن كەلگەن 245 سپورتشى قاتىسۋدا, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
«استانادا سوڭعى جىلدارى شورت-ترەك, مانەرلەپ سىرعاناۋ, حوككەي سەكىلدى سپورت تۇرلەرى جاقسى دامىپ كەلەدى. اتالعان چەمپيوناتتىڭ ەلوردادا ءوتۋى, استانالىق سپورتشىلار ءۇشىن ۇلكەن ناتيجە. ەكىنشى جىل قاتارىنان وتكىزىلىپ وتىرعان قالالىق اشىق چەمپيوناتقا وزگە دە قالاردان كەلىپ قاتىسۋدا. ءۇش كۇنگە سوزىلاتىن جارىس قىسقا جانە ەركىن باعدارلاما بويىنشا ءوتىپ جاتىر. بۇل جارىستا جۇپتىق باسەكە جوق. بۇگىن «الاۋ» مۇزايدىنى سارايىندا مانەرلەپ سىرعاناۋدان «ASTANA OPEN» قالالىق اشىق چەمپيوناتىنىڭ العاشقى كۇنگى جەڭىمپازدارى انىقتالدى», دەيدى قالالىق دەنە شىنىقتىرۋ جانە سپورت باسقارماسىنىڭ ءباسپاسوز حاتشىسى مادينا ايتقاليەۆا.
ۇيىمداستىرۋشىلاردىڭ ايتۋىنشا جەكە رازريادتاعى جارىستار حالىقارالىق كونكيشىلەر وداعىنىڭ تالاپتارىنا سايكەس وتەدى. بالالار مەن جاسوسپىرىمدەر, سونداي-اق سپورت شەبەرى مەن سپورت شەبەرىنە ۇمىتكەرلەردىڭ ونەرىن ارنايى شاقىرىلعان حالىقارالىق تورەشىلەر باعالايدى.
بۇگىن جارىس الانىڭا سپورت شەبەرلەرى مەن سپورت شەبەرىنە ۇمىتكەر ۇل-قىزدار شىعادى.
ايتا كەتەيىك, چەمپيونات قورىتىندىسى بويىنشا قازاقستان رەسپۋبليكاسىنىڭ جاستار چەمپيوناتىنا 24 ەڭ مىقتى سپورتشىدان استانا قالاسىنىڭ قۇراما كومانداسى جاساقتالادى.
«بۇل جارىستا ءبىز ەڭ مىقتى دەگەن ەلوردالىق سپورتشىلار اراسىنان 24 تاڭداۋلى مانەرلەپ سىرعاناۋشىنى استانا قالاسىنىڭ قۇراما كومانداسىنا قابىلدايمىز. ولار الداعى 20-24 قاراشا ارالىعىندا وسكەمەن قالاسىندا وتەتىن مانەرلەپ سىرعاناۋدان قر جاستار چەمپيوناتىندا ونەر كورسەتەدى. سوندىقتان رەسپۋبليكالىق ارەنادا قالامىزدى لايىقتى تانىتاتىن مىقتى كوماندانى تاڭداۋ ءبىز ءۇشىن وتە ماڭىزدى», دەيدى استانا قالاسىنىڭ مانەرلەپ سىرعاناۋ فەدەراتسياسىنىڭ پرەزيدەنتى ەلميرا تۇرعانوۆا.
جارىس 16 قاراشاعا دەيىن جالعاسادى. كورەرمەندەر مەن جانكۇيەرلەر ءۇشىن كىرۋ تەگىن.