وزبەكستاننىڭ سامارقاند قالاسىندا وتكەن تۇركى مەملەكەتتەرى ۇيىمىنىڭ توعىزىنشى سامميتىندە جول كارتاسى سانالاتىن ماڭىزدى بىرقاتار قۇجاتقا قول قويدى.
ۇيىمعا مۇشە تۇركيا, ازەربايجان, قازاقستان, وزبەكستان جانە قىرعىزستان مەملەكەتتەرىنىڭ باسشىلارى سامارقاندتاعى «ماڭگىلىك قالا» ورتالىعىندا باس قوستى. قول قويىلعان قۇجاتتاردا سامارقاند دەكلاراتسياسى, ۇيىمنىڭ 2022-2026 جىلدارعا ارنالعان تۇجىرىمداماسى, مۇشە مەملەكەتتەر اراسىنداعى كولىك سالاسىنداعى ىنتىماقتاستىق, جەڭىلدەتىلگەن كەدەندىك دالىزدەردى قۇرۋ جانە ساۋدا ستراتەگيالارى تۋرالى كەلىسىمدەر بار.
سونداي-اق تۇركىتىلدەس ەلدەردىڭ ىنتىماقتاستىق كەڭەسىن قۇرۋ تۋرالى ناحچىۆان كەلىسىمىنە وزگەرىستەر ەنگىزۋ تۋرالى حاتتاما, تۇركى مەملەكەتتەرى ۇيىمى جارعىسىن بەكىتۋ, ۇيىمنىڭ باس حاتشىسى مەن كومەكشىلەرىن, تۇركى اكادەمياسى توراعاسى مەن توراعا ورىنباسارىن تاعايىنداۋ تۋرالى شەشىم قابىلداندى. تۇركى ينۆەستيتسيالىق قورىن اشۋعا كەلىستى.
بۇعان دەيىن تۇركى كەڭەسى نەمەسە تۇركىتىلدەس مەملەكەتتەر ىنتىماقتاستىق كەڭەسى – ءوزارا قارىم-قاتىناس پەن ىنتىماقتاستىقتى تەرەڭدەتۋ ماقساتىندا جۇمىس ىستەيتىن تاۋەلسىز تۇركى ەلدەرىنەن تۇراتىن حالىقارالىق ۇيىم بولدى.