تاياۋدا شتاب-پاتەرى لوندوندا ورنالاسقان ۇلىبريتانيانىڭ talkSPORT باسىلىمى وزدەرىنىڭ سپورتتىق مانسابىندا بىردە-ءبىر رەت جەڭىلىستىڭ كەرمەك ءدامىن تاتپاعان كاسىپقوي بوكسشىلاردىڭ رەيتينگىن جاريالادى. ۇزدىكتەر كوشىن اتاعى الىسقا جايىلعان اقش-تىڭ ءاپايتوسى فلويد مەيۆەزەر باستاپ تۇر.
1977 جىلدىڭ 24 اقپانىندا اقش-تىڭ ميچيگان شتاتىنا قاراستى گراند-راپيدس قالاسىندا دۇنيەگە كەلگەن فلويد مەيۆەزەر جايىندا تورتكۇل دۇنيە جانكۇيەرلەرى العاش رەت 1996 جىلى اتلانتادا الاۋى تۇتانعان XXVI جازعى وليمپيا ويىندارى كەزىندە ەستىگەن ەدى. اتالعان جارىستىڭ تۇساۋكەسەر كەزدەسۋىندە ول باقتيار تىلەگەنوۆتى تىزە بۇكتىردى. سول كەزدە ازيا چەمپيونى دەگەن دارداي اتاعى بار قانداسىمىزدىڭ 19 جاستاعى ەسىمى كوپشىلىككە بەيمالىم بىلعارى قولعاپ شەبەرىنە ەسە جىبەرگەنىنە كوڭىلىمىز تولماعان ەدى. بىراق مۇنىمىز بەكەر ەكەن. ودان كەيىن جاس دارىن ارمەنيالىق ارتۋر گەۆوركيان مەن كۋبالىق لورەنتسو اراگوندى جولىنان ىعىستىردى. اقىرى جارتىلاي فينالدا بولگاريانىڭ داڭقتى بوكسشىسى, ءۇش دۇركىن الەم جانە ەۋروپا چەمپيونى سەرافيم تودوروۆقا ءبىر عانا ۇپاي ايىرماشىلىعىمەن ۇتىلعان فلويد قولا مەدالدى موينىنا ءىلدى.
اتلانتا وليمپياداسى اياقتالعان بەتتە كاسىپقوي رينگتە كۇش سىناسۋعا بەل بۋعان اقش بوكسشىسى سودان كەيىن بىردە-ءبىر رەت جەڭىلىستىڭ كەرمەك ءدامىن تاتقان ەمەس. 1996-2021 جىلدار ارالىعىندا 50 رەت شارشى الاڭعا شىققان ول بارلىق باسەكەدە باسىم ءتۇستى. 27 قارسىلاسىن نوكاۋتقا جىبەردى. مەيۆەزەردەن تاياق جەگەندەر اراسىندا ديەگو كوراللەس, حوسە لۋيس كاستيلو, دەماركۋس كورلي, ارتۋرو گاتتي, شارمبا ميتچەلل, زاب دجۋدا, كارلوس مانۋەل بالدومير, وسكار دە لا حويا, ريككي حاتتون, حۋان مانۋەل ماركوس, شەين موسلي, ۆيكتور ورتيس, ميگەل كوتتو, روبەرت گەررەرو, ساۋل الۆارەس, ماركوس مايدانا, مەنني پاكياو سىندى داڭقتارى جەر جارعان بوكسشىلار بار. ول از دەسەڭىز, وسىدان بەس جىل بۇرىن لاس-ۆەگاستاعى «تي-موبايل ارەنادا» فلويد ەرەجەسىز جەكپە-جەكتىڭ حاس شەبەرى كونور ماكگرەگوردى تەحنيكالىق نوكاۋتپەن ۇتتى. شيرەك عاسىرعا جۋىق ۋاقىت بويى قارسى كەلگەندەردى قوعاداي جاپىرىپ, ءححى عاسىردىڭ تەڭدەسسىز بوكسشىسى دەپ تانىلعان مەيۆەزەردىڭ ۇزدىكتەر رەيتينگىندە كوش باستاپ تۇرۋعا لايىقتى ەكەنى ەش داۋ تۋعىزباسا كەرەك.
ۇزدىكتەر تىزىمىندە ەكىنشى ورىندى ريكاردو لوپەس يەلەنۋدە. جەڭىل سالماق دارەجەلەرىندە ونەر كورسەتكەن مەكسيكانىڭ مارقاسقاسى 1985-2001 جىلدار ارالىعىندا 52 كەزدەسۋ وتكىزىپ, 51 رەت جەڭىسكە جەتتى. 38 باسەكەدە ايقىن باسىمدىق تانىتتى. 1998 جىلى نيكاراگۋالىق روسەندو الۆارەسپەن بولعان جەكپە-جەكتە تەڭ ەسەپ تىركەلدى. نەگىزى لوپەس ونى دا ۇتاتىن ەدى. بىراق 8 راۋندتا امەريكالىق سپورتشىنىڭ قاباعى جارىلىپ كەتتى. باسەكە دەرەۋ توقتاتىلدى. تورەشىلەر ءبىراز ويلانا-تولعانا كەلە جوعارىداعىداي شەشىم قابىلدادى.
ءۇشىنشى ساتىعا روككي مارچيانو جايعاستى. حح عاسىردىڭ بەل ورتاسىندا شارشى الاڭدى شايقاعان اقش بوكسشىسى 49 كەزدەسۋدىڭ بارلىعىن ءوز پايداسىنا شەشتى. 43 قارسىلاسىن ەسىنەن تاندىردى. سونداي-اق توپ-10 بوكسشىنىڭ قاتارىنا دجيممي بەرري (59-0-10), دجو كالزاگە (46-0), اندرە ۋورد (32-0), تەرەنس كروۋفورد (38-0), تايسون فيۋري (32-0-1), سۆەن وتتكە (34-0) جانە الەكساندر ۋسيك (20-0) سىندى ساڭلاقتار ەندى.