2022 جىلدىڭ باسىنان بەرى قازاقستاندا 2,5 مىڭعا جۋىق ەسىرتكى قىلمىسى انىقتالدى, دەپ جازادى Egemen.kz.
«جىل باسىنان بەرى قۇقىق قورعاۋ جانە ارنايى ورگاندار 2,5 مىڭعا جۋىق ەسىرتكى قىلمىسىن انىقتادى. بارلىعى 12,7 توننا ەسىرتكى تاركىلەندى. ەسىرتكى تۇرلەرى بويىنشا: گەروين – 33 كگ, اپيىن – 68 كگ, سينتەتيكا – 507 كگ, گاشيش – 705 كگ, ماريحۋاننا – 4 توننادان استام تاركىلەندى», دەدى قر ءىىم ەسىرتكى قىلمىسىنا قارسى ءىس-قيمىل دەپارتامەنتى باسقارماسىنىڭ باستىعى باقىتجان ءامىرحانوۆ وكق بريفينگىندە.
سونداي-اق سپيكەر ەسىرتكىنى تاراتۋ ينتەرنەت جانە ەلەكتروندىق تولەم جۇيەلەرى ارقىلى جۇزەگە اسىرىلاتىنىن اتاپ ءوتتى.
«زاماناۋي تەحنولوگيالار ەسىرتكىنى بەلسەندى تاراتۋعا ىقپال ەتەدى. ەسىرتكى سايتتارىنىڭ نەگىزگى بولىگى «كيبەرنادزور» اقپاراتتىق جۇيەسىمەن اۆتوماتتى تۇردە بۇعاتتالادى. جىل باسىنان بەرى 2 مىڭعا جۋىق سايتقا كىرۋ شەكتەلگەن, ونىڭ ىشىندە Telegram مەسسەندجەرىندە 1,5 مىڭ اككاۋنت بۇعاتتالدى. ينتەرنەتتى تولىعىمەن جابۋ, ادامداردى ەلەكتروندى اقشا اۋدارۋ مۇمكىندىگىنەن ايىرۋ مۇمكىن ەمەس ەكەنىن تۇسىنەمىز. سوندىقتان قۇزىرەتتى ورگاندار تەڭدەستىرىلگەن شەشىمدەر كەشەنىن ازىرلەۋ قاجەت. شارالاردىڭ ءبىرى قازاقستاندا ەڭ تانىمال ونلاين-پلاتفورمالار مەن تولەم جۇيەلەرىنىڭ مەنشىك يەلەرىنىڭ وكىلدىكتەرى مەن كەڭسەلەرىن كەڭەيتۋ بولۋى مۇمكىن. وسىلايشا, ءبىز ولاردىڭ قىزمەتىن زاڭنامامىزعا سۇيەنە وتىرىپ رەتتەي الامىز», دەپ ءتۇسىندىردى ب.ءامىرحانوۆ.