قازاقستان پرەمەر-ءمينيسترى ءاليحان سمايىلوۆ سەناتتىڭ جالپى وتىرىسىندا «ارسەلورميتتال تەمىرتاۋعا» قاتىستى قابىلدانعان شارالار تۋرالى ايتتى, دەپ حابارلايدى Egemen.kz.
جيىن بارىسىندا دەپۋتات سەرگەي ەرشوۆ وندىرىستىك كاسىپورىندارداعى ونەركاسىپتىك قاۋىپسىزدىك ماسەلەسىن كوتەردى.
«رەسپۋبليكالىق بيۋدجەت جوباسىندا وندىرىستىك كاسىپورىنداردىڭ ونەركاسىپتىك قاۋىپسىزدىگىن قامتاماسىز ەتۋگە باعىتتالعان جۇيەلى شارالاردى تاپپادىق. مەملەكەت باسشىسى بۇل ماسەلەگە ەرەكشە نازار اۋدارادى. ال «ارسەلورميتتال تەمىرتاۋ» شاحتاسىندا ورىن العان سوڭعى اپاتتار قاۋىپتى وندىرىستىك وبەكتىلەردە قاۋىپسىزدىكتى قامتاماسىز ەتۋ بويىنشا شۇعىل قاتاڭ شارالار قابىلداۋدى تالاپ ەتتى», دەدى سەرگەي ەرشوۆ.
وسىعان بايلانىستى دەپۋتات ۇكىمەت ونەركاسىپتىك قاۋىپسىزدىككە قويىلاتىن تالاپتاردى قاتاڭداتۋ بويىنشا زاڭنامالىق جانە ۇيىمداستىرۋشىلىق تارتىپتە قانداي شارالار قابىلدايتىنىن سۇرادى.
«بيىل ءبىز تجم ماتەريالدىق-تەحنيكالىق جاراقتاندىرۋىن 78 ملرد تەڭگە كولەمىندە قولداپ وتىرمىز, الداعى 3 جىلعا دا ءتيىستى قاراجات ءبولىندى. قاۋىپتى ونەركاسىپتىك وبەكتىلەردە ونەركاسىپتىك قاۋىپسىزدىك جانە تەحنولوگيالىق ءتارتىپ تالاپتارىنىڭ ساقتالۋىن قاداعالاۋ جۇزەگە اسىرىلادى», دەپ جاۋاپ بەردى پرەمەر-مينيستر ءاليحان سمايىلوۆ.
پرەمەردىڭ ايتۋىنشا, ۇكىمەت زاڭنامانى جەتىلدىرۋ شەڭبەرىندە جاڭا نورمالاردى ازىرلەپ جاتىر.
«جاڭا نورمالار ءوندىرىس يەلەرى مەن باسشىلارىنىڭ جاۋاپكەرشىلىگىن ارتتىرۋعا, مەملەكەت تاراپىنان باقىلاۋ شارالارىن كۇشەيتۋگە, وسىنداي قاۋىپتى وندىرىستەردى ماتەريالدىق-تەحنيكالىق قايتا جاراقتاندىرۋدى قارجىلاندىرۋ كولەمىن وسى كومپانيالاردىڭ جيىنتىق تابىسىنىڭ كەمىندە 1% كولەمىندە زاڭنامالىق بەكىتۋگە باعىتتالعان. سونداي-اق جاڭا تەحنولوگيالاردى ەسكەرە وتىرىپ, ونەركاسىپتىك قاۋىپسىزدىك تالاپتارىن قايتا قاراۋ, وزەكتەندىرۋ جانە ونەركاسىپتىك قاۋىپسىزدىككە قاتىستى باسقا دا ماسەلەلەر قامتىلادى», دەپ قوستى ءاليحان سمايىلوۆ.
بۇدان باسقا, اقبتك, قىلمىستىق جانە كاسىپكەرلىك كودەكستەرگە جانە «ازاماتتىق قورعاۋ تۋرالى» زاڭعا وزگەرىستەر ەنگىزۋ جوسپارلانۋدا.
پرەمەر-مينيستر قولدانىستاعى زاڭنامادا اپاتتىلىق پەن جاراقاتتانۋدى ازايتۋ ءۇشىن تەحنيكالىق قايتا جاراقتاندىرۋدىڭ جيىنتىق جوسپارىن قالىپتاستىرۋ كوزدەلگەنىن اتاپ ءوتتى. بيىل 2,5 مىڭنان استام تەحنيكالىق قۇرىلعىلاردى اۋىستىرۋ جانە 100-دەن استام تەحنولوگيالىق جەلىلەردى جاڭعىرتۋ كوزدەلگەن.
«قاراعاندى وبلىسىنداعى «ارسەللورميتتال تەمىرتاۋ» شاحتالارىندا بولعان اپاتقا كەلەتىن بولساق, اتالعان كومپانيا ءۇشىن كومىر ءوندىرۋ جونىندەگى جەر قويناۋىن پايدالانۋعا ارنالعان كەلىسىمشارتتى جاقىندا قايتا قاراۋ بارىسىندا ءبىز جىل سايىن كەمىندە 150 ملرد تەڭگە كولەمىندە كومىر ءوندىرىسىن جاڭعىرتۋعا ينۆەستيتسيالار ءبولۋ, سونداي-اق كومىر قاباتتارىن گازسىزداندىرۋعا 37 ملرد تەڭگە ءبولۋ قاجەتتىلىگى بولىگىندە العاش رەت قوسىمشا تالاپتار قويدىق. بۇرىن مۇنداي مىندەتتەر بولعان جوق. بىراق ءبىز باسقا جەر قويناۋىن پايدالانۋشىلارعا قاتىستى وسىنداي قوسىمشا تالاپتار مەن مىندەتتەمەلەردى كۇشەيتۋدى جوسپارلاپ وتىرمىز», دەپ قوستى ءاليحان سمايىلوۆ.