ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە بەلگىلى جۋرناليست, اقىن سماعۇل راحىمبەكتى ەسكە الۋ كەشى ءوتتى. وندا قالامگەردىڭ زامانداستارى مەن جەرلەستەرى ءسوز الىپ, تاعىلىمدى ەستەلىك ءوربىتتى.
مازمۇندى ءىس-شارانىڭ تىزگىنىن ۇستاعان جۋرناليست, عالىم مۇراتبەك توقتاعازين قالامگەردىڭ ءومىر جولىنا توقتالا كەلىپ: «سماعۇل اعامىز ەلورداعا ىرگەلەس جاتقان قورعالجىن اۋدانىندا دۇنيە ەسىگىن اشىپ, العاشقى ەڭبەك جولىن اۋداندىق «شامشىراق» گازەتىنەن باستادى. ودان سوڭ اقمولا وبلىستىق تەلەراديوكومپانياسىندا اعا رەداكتور, باس رەداكتور بولدى. كەيىن پرەزيدەنت تەلەراديوكەشەنىندە باس رەداكتور قىزمەتىن اتقاردى. ول كىسى شىعارماشىلىقپەن بىرگە ساياسي-قوعامدىق ومىرگە دە بەلسەنە ارالاسىپ, ەگەمەندىك العانعا دەيىن بۇرىنعى تسەلينوگراد قالاسىندا قاعاجۋ كورگەن انا ءتىلىمىز بەن سالت-ءداستۇرىمىزدىڭ قايتا جاندانۋىنا زور ۇلەس قوستى. بىرقاتار ولەڭى مەن پروزالىق دۇنيەسى كىتاپ بولىپ جارىق كوردى», دەپ قىسقاشا ايتىپ ءوتتى.
سودان كەيىن بەلگىلى قالامگەر, حالىقارالىق «الاش» ادەبي سىيلىعىنىڭ لاۋرەاتى جانبولات اۋپباەۆ, جۋرناليستەر ءبادۋان يماش ۇلى مەن كەنجە جۇماعۇلوۆ جانە وبلىستىق تەلەراديوكومپانياسىندا بىرگە قىزمەت ىستەگەن قازينا نۇرقانوۆا مەن كۇلاش مولداحمەتوۆا ارداقتى ازاماتتىڭ ۇمىتىلمايتىن قاسيەتتەرى تۋرالى اڭگىمەلەدى. اقىن ايباتىر سەيتاق «سماعۇل اعا رۋحىمەن سىرلاسۋ» اتتى ولەڭىن وقىدى.
«1981 جىلى قورعالجىن اۋدانىنا الماتىدان جازۋشىلار امانتاي ساتاەۆ, رامازان توقتاروۆ جانە ولارمەن بىرگە وبلىس ورتالىعىندا تۇراتىن جەرلەسىمىز, اقىن نۇرعوجا وراز كەلىپ, ءبىر اپتا ەلدى ارالاپ, حالىقپەن جۇزدەستى. وندا مەن اۋداندىق مادەنيەت ءبولىمىنىڭ مەڭگەرۋشىسىمىن. سول كىسىلەرمەن ءبىر اپتا ءجۇرىپ, ءان ايتىپ, كۇي تارتىپ, شاشباۋىن كوتەردىم. وسى ونەرىمە ريزا بولعان نۇرعوجا اعا مەنى تسەلينوگرادقا ەرتىپ اكەلىپ, وبلىستىق تەلەۆيدەنيەدەن ارنايى حابار ۇيىمداستىرىپ, كوگىلدىر ەكراننان العاش رەت «جاستارعا تىلەك» دەگەن ءانىمدى ورىندادىم. سوندا وسىندا قىزمەت ىستەيتىن سماعۇلمەن تانىسىپ, ول ومىردەن وتكەنشە اعالى-ءىنىلى سىيلاستىعىمىز ۇزىلگەن جوق», دەدى ءبىلىم بەرۋ ءىسىنىڭ ۇزدىگى وسپان سۇلەيمەنوۆ.
سونداي-اق ەسكە الۋ كەشىنە اقىننىڭ تۋعان جەرىنەن كەلگەن جەرلەستەرى دە ءسوز الىپ, جىلى ەستەلىك ايتتى. ماسەلەن, قالامگەردىڭ بالا كۇنىنەن بىرگە وسكەن دوسى قالى مانتيكوۆ جاستىق شاقتاعى باستارىنان وتكەن قىزىقتى وقيعالارىن بايانداسا, قورعالجىن اۋدانىنداعى جانتەكە اۋىلىنداعى ورتا مەكتەپتىڭ مۇعالىمى شولپان ەلتايقىزى 2019 جىلى سماعۇل راحىمبەك اتىنداعى كابينەت اشىلىپ, قازىر وندا وقۋشىلار ءجيى باس قوساتىنىن جەتكىزدى.
«سماعۇل اعا 60 جاسقا تولعاندا اۋىلعا كەلىپ, جەرلەستەرىمەن كەزدەسكەن ەدى. مىنە, ودان بەرى دە ون جىل زىمىراپ ءوتتى. ءبىر وكىنىشتىسى, اعامىزدىڭ جەتپىس جىلدىعىن وزىمەن بىرگە قارسى الىپ وتىرعان جوقپىز. سوندا دا حالقىمىز «جاقسىنىڭ اتى, عالىمنىڭ حاتى ولمەيدى» دەپ بەكەر ايتپاعان. ول كىسى ومىردەن وتكەننەن بەرى ەسىمى ۇمىت قالماۋ ءۇشىن مەكتەبىمىزدە ءبىراز ءىس-شارا قولعا الىندى. جىل سايىن قالامگەردىڭ شىعارماشىلىعىنا ارناپ كەش وتكىزىپ, وقۋشىلارىمىز اقىن ولەڭدەرىن جاتقا وقيدى. وسىنداي ءىس-شارالار ءالى جالعاسا بەرەدى», دەدى اقىن اتىنداعى كابينەتتىڭ جەتەكشىسى.
سونىمەن قاتار باسقوسۋدا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرى اقىننىڭ ولەڭىن جاتقا وقىپ, ونىڭ سوزىنە جازىلعان اندەر شىرقالدى. كەش سوڭىندا اقىننىڭ جارى ءاليا راحىمبەكوۆا قالامگەردىڭ ادامي بولمىسى جايىندا سىر شەرتىپ, وسى ءىس-شارانى وتكىزۋگە مۇرىندىق بولعان ازاماتتارعا وتباسى اتىنان ريزاشىلىعىن ءبىلدىردى.