اتىراۋ وڭىرىنە مەديتسينا ماماندارىن تارتۋ ءۇشىن ارنايى باعدارلاما ازىرلەنەدى. بۇل تۋرالى مەملەكەت باسشىسى قاسىم-جومارت توقاەۆ وبلىس جۇرتشىلىعىمەن كەزدەسۋ بارىسىندا ايتتى, دەپ حابارلايدى Egemen.kz.
«ەڭ الدىمەن, وڭىرگە مەديتسينا ماماندارىن تارتۋ ءۇشىن ارنايى باعدارلاما ازىرلەۋ كەرەك. جەرگىلىكتى كادرلاردىڭ بىلىكتىلىگىن ارتتىرۋ ماڭىزدى. سونداي-اق, وبلىستىق پەرزەنتحانانى كۇردەلى جوندەۋدەن وتكىزىپ, جابدىقتاعان ءجون. اتىراۋدا جاڭا ونكولوگيالىق ديسپانسەر سالۋ ماسەلەسىن پىسىقتاۋ قاجەت», دەدى پرەزيدەنت.
مەملەكەت باسشىسىنىڭ ايتۋىنشا, وبلىستا بىرقاتار دەنساۋلىق ساقتاۋ نىسانىنىڭ قۇرىلىسى جوسپارلانىپ وتىر.
«قۇرىلىس جۇمىستارىن كەلەسى جىلى باستاۋ كەرەك. انا مەن بالانىڭ, جالپى تۇرعىنداردىڭ دەنساۋلىعىن ساقتاۋ – ەلدىڭ دامۋ دەڭگەيىن ايقىندايتىن كورسەتكىشتىڭ ءبىرى. ءبىز دەنساۋلىق ساقتاۋ سالاسىنا بارلىق رەسۋرستى, كۇش-جىگەرىمىزدى جۇمىلدىرامىز. وسى ورايدا, مەن سينتەتيكالىق ەسىرتكى ماسەلەسىنە ەرەكشە نازار اۋدارعىم كەلەدى», دەدى قاسىم-جومارت توقاەۆ.
بۇل رەتتە پرەزيدەنت قازاقستاندا ەسىرتكىگە تاۋەلدى 110 مىڭ ادام ەسەپتە تۇرعانىن ايتتى.
«وكىنىشكە قاراي, ادام پسيحيكاسىنا اسەر ەتەتىن زاتتار تەز تارالىپ بارا جاتىر. بۇل – وتە قاۋىپتى ءۇردىس. قازاقستاندا ەسىرتكىگە تاۋەلدى 110 مىڭ ادام ەسەپتە تۇر. ونىڭ ىشىندە بالالار دا بار. بۇل – ءبىز بىلەتىن مالىمەت قانا. وسى رەتتە, ىشكى ىستەر مينيسترلىگىنىڭ ەسىرتكىگە قارسى كۇرەستى ءتيىمدى جۇرگىزۋىن تالاپ ەتەمىن», دەدى مەملەكەت باسشىسى.