كەشە پرەزيدەنت اكىمشىلىگىنىڭ باسشىسى نۇرلان نىعماتۋلين جۇمىس ساپارىمەن قىزىلجار وڭىرىندە بولىپ, قازاقستان پرەزيدەنتى نۇرسۇلتان نازارباەۆتىڭ جارلىعىمەن ەرىك سۇلتانوۆتىڭ سولتۇستىك قازاقستان وبلىسىنىڭ اكىمى بولىپ تاعايىندالعانىن جەتكىزدى.
وبلىستىڭ كەزەكتەن تىس ححV سەسسياسىنا قاتىسقان ن.نىعماتۋلين پرەزيدەنتتىڭ ءوڭىر باسشىسى لاۋازىمىنا ەرىك حامزا ۇلى سۇلتانوۆتىڭ كانديداتۋراسىن ۇسىنۋ تۋرالى حاتىن وقىپ بەردى. حالىق قالاۋلىلارى ەلباسى ۇسىنىسىن ءبىراۋىزدان قولداپ, داۋىس بەردى.
سەسسيادان كەيىن وبلىس اكتيۆى ءوتتى. وعان قاتىسقان پرەزيدەنت اكىمشىلىگىنىڭ باسشىسى جينالعانداردى پرەزيدەنت جارلىعىمەن تاعايىندالعان وبلىستىڭ جاڭا اكىمىمەن تانىستىردى. «سىزدەر ەرىك حامزا ۇلىن جاقسى بىلەسىزدەر دەپ ويلايمىن. ول وسى ءوڭىردىڭ تۋماسى, 1956 جىلى تۋعان. بىرقاتار لاۋازىمدى قىزمەتتەر اتقارعان. تاجىريبەسى مول. وزىنە دە, وزگەگە دە قاتاڭ تالاپ قويا بىلەدى», دەدى ن.نىعماتۋلين.
ن. نىعماتۋلين وبلىستىڭ بۇرىنعى اكىمى سامات ەسكەندىروۆتىڭ قىزمەتكە 2013 جىلدىڭ قاڭتارىندا تاعايىندالىپ, ءبىرشاما جۇمىستار اتقارعانىن, الايدا قىزمەت ادەبى مەن مەملەكەتتىك ءتارتىپتى بوساڭسىتىپ, سىبايلاس جەمقورلىققا جول بەرگەنى ءۇشىن وتستاۆكاعا كەتۋ جونىندەگى ءوتىنىشىن پرەزيدەنتتىڭ قابىل العانىن, قۇرىلىس باسقارماسى باسشىسىنىڭ مىندەتىن اتقارۋشىنىڭ پارامەن ۇستالىپ, وبلىس اكىمىنىڭ ورىنباسارىنا قاتىستى قىلمىستىق ءىس قوزعالعانىن جەتكىزدى.
اكتيۆ جيىنىندا ءسوز العان سولتۇستىك قازاقستان وبلىسىنىڭ جاڭا اكىمى ە. سۇلتانوۆ ەلباسىنىڭ وزىنە زور سەنىم كورسەتكەنى ءۇشىن العىس ايتىپ, ەل ەكونوميكاسىن دامىتۋعا قابىلەت-قارىمى مەن كۇش-جىگەرىن ايامايتىنىنا سەندىردى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.