تەننيس. قازاقستان تەننيسشىلەرى «رولان گارروس» ءتۋرنيرىنىڭ جارىسى سانالاتىن فرانتسيا اشىق بىرىنشىلىگىنە قاتىسۋدا.
جارىستىڭ العاشقى كۇنى ياروسلاۆا شۆەدوۆا ءبىرىنشى اينالىمدا امەريكالىق لاۋران ءداۆيستى 3:6, 7:5, 6:4 ەسەبىمەن ۇتتى. ەندى ول فرانتسيالىق, الەمنىڭ 213 راكەتكاسى پاۋلين پارمەنتيەرمەن كەزدەسەدى. شۆەدوۆا جۇپتىق جانە ميكست سىنىنا دا قاتىسادى.
ەرلەر اراسىندا ميحايل كۋكۋشكين ءبىرىنشى اينالىمدا فرانتسيا تەننيسشىسى نيكولاس مايۋدى 6:3. 6:7. 6:3. 6:4 ەسەبىمەن جەڭدى. ونىڭ كەلەسى قارسىلاسى – الەمنىڭ ونىنشى راكەتكاسى امەريكالىق دجون يشنەر. سول سياقتى الەكساندر نەدوۆەسوۆ ۇندىستاندىق سومدەۆ دەۆۆارماننان 5:7. 6:3. 7:6, 6:3ەسەبىمەن باسىم ءتۇستى. ەندى ول الەمنىڭ التىنشى راكەتكاسى توماس بەردىحپەن (چەحيا) كەزدەسەدى. اندرەي گولۋبەۆ ءالى ويناعان جوق. ول ءبىرىنشى اينالىمدا ەندي ماررەيمەن كۇش سىناسادى.
كاسىپقوي بوكس. جاقىندا قازاق بوكسشىسى قانات يسلام ءوزىنىڭ كاسىپقوي بوكستاعى ون جەتىنشى كەزدەسۋىن وتكىزىپ, جەڭىسكە جەتتى.
ول كولۋمبيادا جەرگىلىكتى بوكسشى فرانسيسكو كوردەرونى ۇتتى. كەزدەسۋدىڭ ەكىنشى راۋندىندا قانات قارسىلاسىن نوكاۋتقا جىبەردى.
بۇل قاناتتىڭ كاسىپقوي بوكستاعى 17 جەكپە-جەگىندەگى 17-جەڭىسى. ول بۇعان دەيىن وتكىزگەن ايقاستارىنىڭ بارىندە قارسىلاستارىن ايقىن باسىمدىقپەن جەڭگەن. ال قاناتپەن كەزدەسكەن كوردەرونىڭ بۇل ءۇشىنشى جەڭىلىسى.
قازىر قانات WBA تۇجىرىمى بويىنشا ورتا سالماقتا (69,85 كگ) رەيتينگىندە 12 ورىندا تۇر. ونىڭ سالماعىندا الەمنىڭ سۋپەر چەمپيونى امەريكالىق فلويد مەيۋەزەر كوش باستاپ كەلەدى. قاناتتىڭ رينگتەگى لاقاپ اتى – «قازاق». وسى كۇندەرى ول اقش-تىڭ مايامي قالاسىندا جاتتىعادى.
بوكس. الماتىدا تۇڭعىش رەت اسكەري قىزمەتكەرلەر اراسىندا 55-ءشى الەم چەمپيوناتى وتەدى.
جارىس كەڭەس وداعىنىڭ باتىرى, «حالىق قاھارمانى», ەلىمىزدىڭ تۇڭعىش قورعانىس ءمينيسترى, ارميا گەنەرالى ساعادات نۇرماعانبەتوۆتى ەسكە الۋعا ارنالادى.
وعان الەمنىڭ 25 ەلىنىڭ, اتاپ ايتقاندا كولۋمبيا, فرانتسيا, برازيليا, شري-لانكا, وڭتۇستىك كورەيا, رەسەي, گوللانديا, ءباا, كۋۆەيت, تۋنيس, گرۋزيا, يراك, نيگەريا جانە باسقا دا ەلدەرىنىڭ بوكسشىلارى قاتىسادى. بيىلعى چەمپيونات 26 مامىر مەن 4 ماۋسىم ارالىعىندا «دوستىق» سپورت كەشەنىندە وتەدى.