الەمدە جىل سايىن 3 قاراشادا دۇنيەجۇزىلىك مەدۋزا كۇنى اتاپ وتىلەدى. بۇل – جەر بەتىندە ادامدارعا قاراعاندا ۇزاق جىل ءومىر سۇرەتىن ءمولدىر جەلاتيندى دەنەسى بار ومىرتقاسىز تەڭىز جانۋارى. 500 ميلليون جىلدان استام ۋاقىت بويى تىرشىلىك ەتىپ كەلە جاتقان مەدۋزا بالىق نە وسىمدىك ەمەس, 98% سۋدان تۇراتىن دەنەسى كۇمبەزگە ۇقساس ءمولدىر جاراتىلىس. وسى مەدۋزالاردىڭ مەديتسيناعا پايداسى بارىن بىلەسىز بە؟
مەدۋزانىڭ قاڭقاسى دا, كوزى دە, ميى دا جوق, بىراق ادەتتە ەكى جۇيكە جۇيەسى بولادى. ەڭ كىشكەنتاي مەدۋزانىڭ ديامەترى 4 سم بولسا, كورنەروت وتريادىنان شىققان الىپ مەدۋزا نومۋرا كولەمى بويىنشا ديامەترى ەكى مەترگە جەتۋى مۇمكىن, ال سالماعى 200 كيلوگرامم.
مەديتسينادا مەدۋزانىڭ وڭدەلگەن دەنەلەرى بار پرەپاراتتار بەدەۋلىكتى, سەمىزدىكتى, تازدى جانە سۇر شاشتى ەمدەۋ ءۇشىن قولدانىلادى. تىنىس الۋ جاسۋشالارىنان الىنعان تىنىس جولدارىنىڭ اۋرۋلارىن جەڭۋگە جانە قان قىسىمىن قالپىنا كەلتىرۋگە دە كومەكتەسەدى دەيدى ماماندار. ماسەلەن تايلاند, كورەيا, قىتاي جانە جاپونيادا مەدۋزانى تراحەيت, برونحيت, قان قىسىمىن تومەندەتۋ ءۇشىن قولدانادى. ورتا عاسىرلاردا ءىش جۇرگىزەتىن دارىلەر مەن ديۋرەتيكتەر مەدۋزادان جاسالسا, سونداي-اق سترەسپەن كۇرەسۋگە كومەكتەسەتىن ولاردىڭ جاي قيمىلدارىنىڭ ءوزى ادام جانىن تىنىشتاندىرادى ەكەن. ولاردى كوبىنە تەڭىز جاعالاۋىندا ورنالاسقان ەلدەر تاماق ونىمدەرىندە بۇرىننان پايدالانادى.
كورنەكتى شۆەد عالىمى جانە تابيعات زەرتتەۋشىسى كارل ليننەي 1752 جىلى بۇل تاڭعاجايىپ جانۋاردى مەدۋزا دەپ اتاعان. قازىرگى عالىمدار قاتەرلى ىسىكتەردى جەڭۋدىڭ جولدارىن زەرتتەۋدە مەدۋزالاردىڭ كومەكتەسۋ مۇمكىندىگىن راستاپ وتىر.