روزا امانوۆا: قازاق ەلىن ەرەكشە قادىرلەيمىن

ءانشى ايتادى: – ماعان «قاي ەل جۇرەگىڭە جاقىن؟» دەپ ءجيى سۇراق قويادى. سوندا ويلانباستان قازاق ەلى دەپ جاۋاپ بەرەمىن. نەگە؟ ويتكەنى قازاق – مادەنيەتى, مۋزىكاسى, فولكلورى, ءتىپتى اڭىز-اڭگىمە­سى جاعىنان بىزگە جاقىن ەل. جان­دۇنيەمىز بەن رۋحانياتىمىز دا بىرگە تىنىستاپ تۇرعانداي. كەشەگى وتكەن قاتاعان مەن ءسۇيىنباي, توق­تاعۇل مەن جامبىل, شوقان ءۋالي­حانوۆ, مۇحتار اۋەزوۆ پەن شىڭ­عىس ايتماتوۆ, مۇحتار شاحا­نوۆ سىندى تاۋتۇلعالاردىڭ قاي-قاي­سىسى دا ەكى ەلدىڭ رۋحاني, ادە­بي-مادەني بايلانىسىنىڭ جار­قىن ۇلگىسىندەي, بىرتۋعان باۋىر­لاستىعىمىزدىڭ كونەدەن كەلە جاتقان كوركەم كورىنىسىندەي. اتال­عان قايراتكەرلەردىڭ ەكى ەل­دىڭ مادەني دامۋىنا قوسقان ۇلەسى زور. ول تۋراسىندا اڭىزعا بەرگى­سىز اڭگىمە ايتۋعا بولادى. كۇنى بۇ­گىن­گە دەيىن سول رۋحاني بەرىك بايلا­نىسىمىزدىڭ ۇزىلمەي, كەرىسىنشە جىلدارمەن بىرگە جاندانىپ كەلە جاتقانى جۇرەككە كەرەمەت شاتتىق سىيلايدى. وزەننىڭ ەگىز ساعاسى, قىزدىڭ قوس بۇرىمىنداي قاتار جاساسقان ەكى ەلدىڭ مادەني ءومىرىن, اعايىندىق اعەدىل پەيىلىن ەشكىم, ەشقانداي كۇش وزگەرتە الماسا كە­رەك. لايىم سولاي بولسىن دەپ تىلەي­مىن. كۇنى كەشە استانادا وتكەن قىرعىز ەلىنىڭ قازاقستانداعى ما­دەنيەت كۇندەرى دە سول مىزعىماس ماڭ­گىلىك دوستىعىمىزدىڭ, بۇزىلماس باۋىرلاستىعىمىزدىڭ جارقىن ۇلگىسىندەي كوڭىلگە تاماشا جاقتى. وسى ءبىر قاسيەتىمەن دە قازاقستان ماعان ەرەكشە جاقىن, ايرىقشا ىستىق.

مەن ويلادىم: شىنىمەن دە, ءانشىنىڭ ءا دەگەننەن قازاق ەلى جايلى بۇلايشا تەبىرەنە تولعانۋىنىڭ ءمانى تەرەڭدە. ول ەڭ اۋەلى بابالاردان جەتكەن رۋحاني باۋىرلاستىق شاراپاتى بولسا, ەكىنشى جاعىنان ونەر يەسىنىڭ ءوزى دە ءومىرىنىڭ ەڭ ءبىر ساۋلەلى شاقتارىن الماتىدا وتكىزىپ, قۇرمانعازى اتىنداعى قازاق ۇلتتىق كونسەرۆاتورياسىنىڭ اسپيرانتۋراسىن ءتامامداپ, انشى­لىكپەن قاتار عالىمدىق جولدىڭ دا سوقپاعىن قاتار يگەرۋىندە جاتسا كەرەك. سوندا ءجۇرىپ قازاق ىشىنەن تالاي جانى ىزگى, ادال دوس تاپتى. تالانتتى ورتادا عىلىممەن اينالىسىپ قانا قويماي, شىعارماشىلىق تۇرعىدان دا ىرگەلى ىزدەنىستەرگە باستاماشى بولعان تالاي ءساتتى جوبالاردى ىسكە اسىردى.

ءانشى ايتادى: – قىرعىزدار ء­داس­تۇرلى ءاندى سالتتى مۋزىكا دەپ اتايدى. مەنىڭ ءاۋ باستاعى ماماندىعىم – قومىزشى. بىراق ءبىر عانا سالامەن شەكتەلىپ قال­ماي, بويداعى بار دارىنىمدى, قابىلەتىمدى سارقا پايدالانعىم كەلدى. سول ءۇشىن دە عىلىم جولى­نا كەلدىم. تاريحقا باي تامىرلى ونەرىمىزدى زەرتتەسەم, شاڭ باس­قان ارحيۆتەردە جاتقان قۇن­دىلىقتارىمىزعا جان بىتىرسەم دەگەن اسقاق ارمان الماتىعا الىپ كەلگەن بولاتىن. 1998 جىلى قۇرمانعازى اتىنداعى قازاق ۇلت­تىق كونسەرۆاتوريانى ءبىتىردىم. پروفەسسور سايدا ەلامانقىزى­نىڭ شەبەرحاناسىندا ءتالىم الىپ, ەتنومۋزىكاتانۋ سالاسىنداعى ءبىلىمىم­دى تولىقتىردىم. 2006 جىلى «قىر­عىزدىڭ ۇلتتىق مۋزىكاسى» دە­گەن تاقىرىپتاعى ديسسەرتاتسيامدى ءسات­تى قورعاپ شىقتىم. عىلىمي جۇمى­سىمدا جانر وزگەشەلىگى, كلاس­­سيفيكاتسياسى تۋرالى بىرقا­تار ماسەلە كوتەردىم. فولكلورداعى مى­سالداردىڭ ۇلتتىق مۋزىكامەن ۇن­دەسىن, ايىرماشىلىعىن دا زەرت­تەدىم. ءالى ەسىمدە, سوناۋ ءبىر جىلى الماتىعا وقۋعا ءوز كولىگىممەن كەل­دىم. سوندا قيالىمداعى روزا اقبو­زات­قا ءمىنىپ مەنىڭ الدىمدا كەتىپ بارا جات­قانداي سەزىلدى. وسى عالامات اسەر «بۇل قادامىمنىڭ سوڭى قانداي بولادى, الدىمدا نە كۇتىپ تۇر؟» دەگەن سانامداعى سەڭدەي سوعىلىسقان سان ساۋالعا نۇكتە قويعانداي بولدى. كۇمان سەيىلىپ, بويىما سەنىمدىلىك ورنادى. كەيىن وسى ساپارىم تۋرالى «الماتىعا بارا جاتقان قىز» دەگەن ءان جازدىم. سول ءانىمنىڭ استارىندا توقتاعۇل مەنەن جامبىلداي, كەنەن مەنەن اسەتتەي, ونەر مەن شىعارماشىلىقتى ءوز شىڭىندا الىپ جۇرەتىن ونەر ادامى بولساق دەگەن تىلەك جاتقان ەدى.

مەن ويلادىم: تالانت توپى­راقتان داريدى دەگەن ءسوز راس بولسا كەرەك. قىرعىز رەسپۋبليكاسىنىڭ حالىق ءارتىسى روزا امانوۆانى ومىرگە اكەلىپ, بار اسىلىن دارىت­قان كيەلى ولكە دە قاسيەتتەن كەندە ەمەس. توقتاعۇل, ەشمانبەت, بەك­نازار, قورعول, تۋگانباي, سەي­دانا سىندى ونەرپازداردى تۋدىر­عان كەتمەن-توبەدە ءومىر ەسىگىن اشقان ورەلى جانعا تۋعان ولكەنىڭ كيەسى قونسا كەرەك, جاستايىنان جالىنداپ, جانىپ تۇرعان جاس دارىن ونەر الەمىنە ەرتە ارالاسىپ, شىعارماشىلىقتاعى شۋاقتى جولىن قالىپتاستىردى. ءان الەمىندە ءوزىنىڭ عالامات داۋىس, قايتالانباس قولتاڭباسىمەن كوپ ىشىنەن دارالانسا, عىلىم جولىندا قومىز كۇيلەرىندەگى وڭ قول قاعىسىنداعى 28 ءتۇرلى ويناۋ ءتاسىلىن زەرتتەپ, زەردەلەۋى شىن مانىندەگى ونەردىڭ ۇلكەن جاڭالىعى بولعانى انىق.

ءانشى ايتادى: – جاستايىمنان ارمانشىل بولدىم. بالا كەزىمدە كوك اسپاندا بۇلتتاردىڭ قوزعالعانىن تاماشالاعاندى جاقسى كورەتىن­مىن. ولار ماعان توبەشىك اراسىندا جيىن وتكىزەتىندەي كورىنەتىن. سول جيىنعا ءوزىمنىڭ قاتىسقانىم­دى, ءسوز سويلەگەنىمدى ەلەستەتەمىن. ءالى كۇنگە دەيىن سول اسپان تۇسىمە كىرەدى. سونداي ساتتە بالالىق شا­عىم­دى, وسكەن ورتامدى, اتا-انامدى ساعىنامىن. سول ساعىنىش ما­عان شابىت بەرەدى, سودان جانىما قۋات الامىن. تەك دەگەن ءسوزدى جاق­سى ايتتىڭىز. تۋعان جەرىم­نىڭ قاسيەتىنەن بولەك, مەنىڭ تەگىم دە تەگىن ەمەس. اكەم جاعىنان دا, انام جاعىنان دا انشىلىك ونەر قاتار دارىعان. ناعاشى اتام اسان امانوۆ جيەنى بولعانىما قارا­ماستان, مەنى ءوز اتىنا جازدىرىپ العان. ومىردەن ەرتە كەتكەن ۇل­دارىنىڭ ورنىنا ۇل كورىپ, بالا كەزىمنەن تىلەۋىمدى تىلەپ, ۇكىلەپ ءوسىردى.

ال ەندى ءوزىڭىز ايتقان عىلىمي ىزدەنىس­تەرىمە كەلسەك, قومىز كۇيلە­رىن­دەگى وڭ قول قاعىسىنداعى 28 ءتۇرلى ويناۋ ءتاسىلىن جان-جاقتى زەرتتەپ, وسى تاقىرىپتا 2017 جىلى دوكتورلىق ديسسەرتاتسيام­دى قور­عادىم. قومىز كۇيى شەبەر­لەرىنىڭ ارقاسىندا بىزگە ءتۇرلى قاعىس جەتكەن. سول كىسىلەرمەن كەز­دەسىپ, مالىمەت جيناۋ ارقىلى وڭ قول قاعىسىنداعى 28 ءتۇرلى ويناۋ ءتاسىلىن قاعازعا ءتۇسىردىم. بۇعان قومىزداعى «قول ءبيى» دەپ اتاۋ بەرسەك بولادى. سەبەبى مۇندا منەموتەحنيكا مەن سينكرەزيس بار. ول مۋزىكانىڭ بىرەگەيلىگىن بىلدىرەدى. كوبىنە ەلىمىزدەگى قومىز كۇيلەرى, قاعىس تۇرلەرى نيازالى مەكتەبىنىڭ ارقاسىندا ۇرپاقتان-ۇرپاققا جەتكەن. ونىڭ ايتۋىنشا, قولدىڭ ءار قيمىلىنىڭ ماعىناسى بار. مىسالى, ەرتەرەكتە اڭعا شىققان قىرعىزدار جەمتىكتى ۇركىتىپ الماۋ ءۇشىن ءبىر-بىرىنە قولمەن ىمداپ سويلەگەن. بايقاساق, سول كەزدەگى ىم-يشاراتتار قومىز كۇيلەرىندە ساقتالىپ قالعان. نەگىزىنەن وسى تۇجىرىمدار عىلىمي جۇمىسىما ارقاۋ بولدى.

مەن ويلادىم: ءيا, ساعىنىش دەگەن ۇلى سەزىم – ءانشى روزا امانو­ۆانىڭ شىعارماشىلىعىنىڭ وزەگى دەسە دە بولعانداي. ول بالالىق شاعىنا, اتا-اناسىنا, سۇيگەن جار مەن بالا-شاعاسىنا دەگەن ماحابباتتان باستالىپ, كۇللى شىعار­ماشىلىعىندا تاماشا كورىنىس بەرەدى. ونىڭ ايقىن دالەلى – ەل ءسۇيىپ تىڭدايتىن ءانشىنىڭ ايگىلى «مەن سەنى ساعىنعىم كەلەدى» تۋىن­دىسى. بۇل ءاننىڭ ءانشى شى­عار­ماشىلىعىنان الار ورنى ايرىقشا. 25 جاسىندا ومىرگە كەلگەن تۋىندى روزا امانوۆاعا ەرەكشە تانىمالدىلىقپەن قاتار, «قىرعىز رەسپۋبليكاسىنىڭ ەڭبەك سىڭىرگەن ءارتىسى» دەگەن قۇرمەتتى اتاقتى دا قوسا اكەلدى.

ءانشى ايتادى: – ءبىز ىر دەي­مىز, سىزدەردە ءان. بۇل انگە بيىل 25 جىل بولادى. وسى ءانىم ءۇشىن 25 جا­سىمدا «قىرعىزستاننىڭ ەڭبەك سىڭىر­گەن ءارتىسى» اتاندىم. ءاننىڭ ءسوزىن مەملەكەتتىك سىيلىقتىڭ لاۋرەاتى, حالىق اقىنى اناتاي ءومىرحانوۆ جازعان. شىن مانىندە, بۇل ءاننىڭ ءوزى دە, تاريحى دا, تاعدىرى دا مەن ءۇشىن وتە قىمبات. نەگە دەسەڭىز, بۇل شىعارما ۇلكەن ماحابباتپەن بايلانىستى. سول جىلدارى ومىرىك جارىممەن جولىعىپ, عا­لامات ءبىر عاشىقتىق حيكاياسىن باسى­مىزدان كەشىپ جۇرگەندە جان دۇنيەمنىڭ كورىنىسىندەي بولىپ وسى ءبىر ءان ومىرگە كەلگەن ەدى. «جۇرەكتەن شىققان دۇنيە جۇ­رەككە جەتەدى» دەگەن راس شىعار, ءانىم ەل اراسىنا تەز تارادى. از عانا ۋاقىت ىشىندە حالىق ءسۇيىپ تىڭدايتىن انگە اينالدى. بۇگىندە, مىنە, شيرەك عاسىر ءوتتى, بالا-شا­عالى بولىپ, ۇل-قىزدارىمىزدى تاربيەلەپ وتىرمىز. ءان دە, سەزىم دە ەسكىرگەن جوق. كەرىسىنشە, جىلدارمەن بىرگە جاندانىپ, جاڭارىپ كەلە جاتقانداي كورىنەدى. ال بۇل ءاندى ەڭ العاش قازاق ەلىنە تانىستارعان جۋرناليست, قازىرگى سەناتور دانا نۇرجىگىت بولاتىن. «حابار» تەلەارناسى ارقىلى تاراعان تۋىندىمدى قازاقتىڭ قالىڭ كورەرمەنى دە زور ىقىلاسپەن قارسى الدى. قازاق باۋىرلاردان وسى ءان تۋرا­سىندا كوپ جىلى ءسوز ەستىدىم. ءاربىر جىلى لەبىز بەن مەملەكەت تاراپىنان بەرىلىپ جاتقان اتاق-ماراپاتتىڭ بارلىعى ماعان ۇلكەن جاۋاپكەرشىلىك جۇكتەيدى. اتاق الدىم, اتاقتى بولدىم دەپ ماس­تانىپ كەتپەي, كەرىسىنشە سول باعاعا لايىقتى قالىبىڭدى ساق­تاپ, تىڭدارمانىڭا ورەلى ونەرىڭ­دى ۇسىنا الساڭ, مەنىڭشە, ءانشى ءۇشىن ودان اسقان باقىت جوق. كەلەسى جىلى ساحنادا جۇرگەنىمە 35 جىل تولادى ەكەن. وسى مەرەيلى وقيعاعا وراي ەكى ەلدە ونەر جولىمنان جان-جاقتى سىر شەرتەتىن مازمۇندى شىعارماشىلىق كەشىمدى وتكىزسەم دەيمىن.

مەن ويلادىم: ء«اننىڭ دە ەس­تىسى بار, ەسەرى بار» دەگەن اباي­دىڭ انشىگە دە, تىڭدارمانعا دا قويار تالابى تاۋداي. زامان وزگەر­دى, تىڭدارمان تالعامى وسى ەكەن دەپ, جەڭىل اۋەنگە باس قويماي, كەرىسىنشە ءداستۇرلى ونەردىڭ كوسە­گەسىن كوگەرتىپ, كوپشىلىك اراسىندا كەڭىنەن ناسيحاتتاپ جۇرگەن ءانشىنىڭ قىرعىزدىڭ ۇلتتىق ونەرىن ناسيحاتتاۋ جولىندا عانا ەمەس, ءان تاريحىن زەرتتەپ-زەردەلەپ, ونى كەلەر ۇرپاقتىڭ قاجەتىنە جاراتۋ جولىندا دا ءسىڭىرىپ جاتقان ەڭبەگى ەرەن. ساحنادا ءان سالىپ قانا قويماي, ونى عىلىمي تۇرعى­دان تۇجىرىمداپ, تۇيىندەۋدە دە ات­قارىپ جاتقان جۇمىستارى ماقتا­نۋعا ءھام ماقتاۋعا تۇرارلىق. مۇنىڭ بارلىعى قىرعىز ەلىنىڭ رۋحاني مۇراسىنا قوسىلىپ جاتقان تەڭدەسسىز ولجا ەكەنى جانە داۋسىز.

ءانشى ايتادى: – جاقىندا عانا بەلگيادا وتكەن ونەر سيمپوزيۋمىنا قاتىسىپ قايتتىم. سيمپوزيۋمدى حالىقارالىق ءداستۇرلى مۋزىكا جونىندەگى حالىقارالىق كەڭەس ۇيىمداستىردى. اتالعان كەڭەس 1947 جىلدان بەرى يۋنەسكو-نىڭ قولداۋىمەن جۇمىس ىستەيدى. كەڭەس توڭىرەگىندە ءتۇرلى توپقا ءبولىنىپ, تاقىرىپ تالقىلايمىز. كەزەكتى جيىن ارحيۆ ماتەريالدارىنا ارنالدى. ءداستۇرلى مۋزىكا ءۇشىن ارحيۆ ماتەريالى ناعىز قۇندى قازىنا. مىسالى, ءوزىم ارحيۆ ماتەريالىن ءبىلىم بەرۋ باعىتىندا قولدانۋ تۋرالى بايانداما جاسادىم. ارينە, وقۋشىلار ءداستۇرلى ونەردى ناسيحاتتاپ جۇرگەندەرمەن تىكەلەي سۇحباتتاسسا جاقسى. بىراق ولاردىڭ كوبى بۇل دۇنيەدە جوق. سول ءۇشىن ارحيۆتەگى بەينە, جازبا, ءان – قۇندىلىق ءمانىن ءتۇسىنۋ ءۇشىن تاپتىرماس قۇرال. اتالعان سيمپوزيۋمعا قاتىسقانىمدا ءبىر دۇنيەگە تاعى دا كوزىم جەتتى. ءداس­تۇرلى ءان تەك ۇلتتىڭ ونەردەگى بوي­تۇمارى عانا ەمەس, ءتىلدىڭ شۇرايىن, مايەگىن ساقتاپ, كەيىنگى ۇرپاققا جەتكىزۋشى حالىقتىڭ ناعىز رۋحاني قاينار كوزى بولىپ وتىر. اسىرەسە قىرعىز حالقى ءۇشىن مۇنىڭ ماڭىزى زور. ءداستۇرلى مۋزىكانى ناسيحاتتاپ جۇرگەندەر ۇرپاقتار ساباقتاستىعىن ساقتاعانى ءجون. بىراق ولار ەركىن جۇمىس ىستەپ, وركەن جايۋى ءۇشىن مەملەكەت ۇلتتىق ونەردى قاناتىنىڭ استىنا العانى ابزال. ەگەر قانداي دا ءبىر وسىعان قاتىستى مەملەكەتتىك باعدارلاما بولسا, ءداستۇرلى ءان وكىلدەرى ءوزىنىڭ ماڭىزدى تۇلعا ەكەنىن سەزىنۋى كەرەك. نەگە؟ سەبەبى ساف ونەردى عاسىردان-عاسىرعا تاراتىپ, جاڭعىرتىپ جۇر­گەندەر تەك قوشەمەتكە لايىق. بۇل – مادەنيەت مينيسترلىگىندە قارا­لىپ, ۇكىمەت نازار اۋداراتىن وزەكتى ماسەلەلەردىڭ ءبىرى دەپ سانايمىن.

مەن ويلادىم: ادەتتە ونەر ادام­دارىنىڭ ساحنا مەن عى­لىم­دى قاتار باعىندىرىپ, شىعار­ما­شىلىقتىڭ قاي سالاسىندا دا بىردەي جەتىستىككە جەتەتىنى سيرەك. جەتىپ جاتقان كۇننىڭ وزىندە دە ول ىزدەنۋشىسىنەن ەسەپسىز قاجىر-قايراتتى تالاپ ەتەرى جانە انىق. ال سونى ءوز بيىگىندە باعىندىرىپ, قاي سالانىڭ دا مۇزارتىنا شىعۋ – تەك مىقتىلاردىڭ عانا ۇلەسىنە بۇيىرعان نىعمەتى مول نەسىبە بول­سا كەرەك. بۇل تۇرعىدان كەلگەن­دە روزا امانوۆا باقىتتى جان. ساحناداعى شىعارماشىلىق جولى مەن عىلىمداعى ىزدەنىسىن دە جەمىستى يگەرىپ, ايەل, جار, انا رەتىندە دە شىنايى باقىتقا قول جەتكىزە العان ءانشىنىڭ ءاربىر ارەكەتى مەن جەڭىسكە تولى جەتىستىگىنىڭ ارتىندا ەسەپسىز توگىلگەن ماڭداي تەر مەن قىرۋار قاجىر-قايراتتىڭ جاتقانى ءسوزسىز.

ءانشى ايتادى: – ونەر جولى – قيىن جول. اسىرەسە شىعارماشى­­لىق پەن وتباسىن قاتار الىپ جۇر­گەن ايەل زاتى ءۇشىن ونەردىڭ سال­ما­عى ءزىل باتپان. بىراق سوعان قاراماس­تان, جولىڭدا كەزدەسكەن قيىندىق­تىڭ ءبارىن ەڭسەرىپ, قاتارىڭنان جارق ەتىپ شىعا الساڭ – ول جەڭىس­تىڭ ءدامىن سوزبەن ايتىپ جەتكىزۋ مۇم­كىن ەمەس. ايتسە دە ۋاقىت, ءومىر اعىسى, كۇيبەڭ تىرشىلىكتەگى جاعداي مەن جولداردىڭ ءتۇرلى ويعا جەتەلەيتىنى داۋسىز. سول ءۇشىن حالقىمىز «كە­رەكسىز ويدان ساقتا» دەپ بەكەر ايتپاعان. مۇنى نەگە ايتىپ وتىر­مىن؟ شىعارماشىل ورتادا جۇر­گەن ايەلدەردى تابيعاتتان ءبولىپ قاراۋ مۇمكىن ەمەس. تابيعاتتىڭ ءتورت مەزگىلى دە اسەرلى. ءار مەزگىل جانعا وزىنشە شۋاق سىيلايدى. تابيعاتتىڭ ءوزى اعارتۋشى ەكە­نىن, ونىمەن ۇندەستىكتە ءومىر ءسۇرۋ ۇل­گىسىن كوشپەلىلەر وركەنيە­تىن قۇرعان اتا-بابامىزدىڭ جۇر­گەن جولىنان اڭعارامىز. اللا­عا شۇكىر, مەنىڭ باعىما وراي تاعدى­رىما شىعارماشىلىعىمدى ءتۇسىنىپ, قولدايتىن, ۇنەمى دەمەۋ بىلدىرۋگە ءازىر تاماشا جار بۇ­يىرتتى. اقىلدى بالالاردىڭ اناسى اتانۋ باقىتىنا يە بولدىم. شىعارماشىلىق جولىمدا دا جانى ىزگى جاقسى جاندارعا جولىقتىرعان جاراتقانعا العىسىم شەكسىز. جانىڭدى تۇسىنەتىن جاقسى ادامداردىڭ ورتاسىندا جۇرسەڭ, جانىڭا قۇيىلار جىگەردىڭ دە قۋاتى مىقتى بولماق. مەن سول شاراپاتتى وتباسىم مەن ونەردەگى جاقىندارىمنىڭ, دوستارىم­نىڭ قولداۋىنان انىق سەزەمىن. سو­نىڭ ىشىندە, اسىرەسە الماتىدا جو­لىق­­تىرعان دوستارىمنىڭ ورنى بولەك. ولار مەملەكەتتە شەكارا بول­عانىمەن, ونەردە شەكارا جوق ەكە­نىن دالەلدەپ جۇرگەن ناعىز تا­لانتتى جاندار. ءوز باسىم كونسەرۆاتوريادا بىرگە وقىعان كۋرستاس­تارىممەن قارىم-قاتىناسىمدى ۇزگەنىم جوق. قازىر ونەردە بىرگە جول سالىپ ءجۇرمىز. سونىڭ ءبىرى دە بىرەگەيى – بىرگە وقىعان جاقىن قۇربىم ەلمۇرا جاڭابەرگەنوۆا. بىزدەن ءبىر كۋرس تومەن وقىسا دا باعلان ءبابىجان, ايگۇل بايبەك, راۋشان مالدىباەۆانى دا ەرەكشە اتاپ وتكىم كەلەدى. قازاقستاننىڭ ەڭبەك سىڭىرگەن قايراتكەرى ايگۇل قوسانوۆامەن شىعارماشىلىق بايلانىسىمىز بەرىك. قىزىعى سول, قىرعىز قىزدارى دا روزا رىمباەۆا مەن باعدات سامەدينو­ۆانى ونەردەگى اپكەمىز دەپ اتايدى. ودان بولەك, مايرا ءىلياسوۆا قازاقستاندا قانداي دا ءبىر مەرە­كەلىك كەش ۇيىمداستىرا قالسا, ۇنەمى مەنى شاقىرادى. ءوزىم دە باۋىرلاس ەلگە بارىپ ءان شىرقاپ, ارقا-جارقا بولىپ قايتقاندى جاق­سى كورەمىن. الداعى ۋاقىتتا دا بۇل شىعارماشىلىق بايلانىسىمىز ۇزىلمەي, كەرىسىنشە قارىشتاپ دامي بەرەدى دەپ سەنەمىن. وسىعان قاتىستى بىرقاتار جوبانى جۇزەگە اسىرساق كەرەمەت بولار ەدى. الايدا ءداستۇرلى ونەر, ءان الەمىندە ەكى ەلدىڭ مۋزىكاداعى ەرەكشەلىگىن, مادەني بايلانىسىن جەتكىزەتىندەي دۇنيە ءالى ومىرگە كەلمەدى. سونى جان­دان­دىرساق دەيمىن.

– اڭگىمەڭىزگە راحمەت.

اڭگىمەلەسكەن

نازەركە جۇماباي,

«Egemen Qazaqstan»