«استانا وپەرا» تەاترىندا «قازاقتىڭ بۇلب ۇلى» اتانعان وپەرا ساحناسىنىڭ اڭىزى, قازاقستاننىڭ ەڭبەك سىڭىرگەن ءارتىسى, كسرو حالىق ءارتىسى, مەملەكەتتىك سىيلىقتاردىڭ لاۋرەاتى كۇلاش بايسەيىتوۆانىڭ 110 جىلدىعىنا وراي «قازاقستان ۆوكاليستەر وداعى» رەسپۋبليكالىق قوعامدىق بىرلەستىگىنىڭ ۇيىمداستىرۋىمەن «كۇلاشتىڭ ءانى» ۆوكالدىق مۋزىكا كەشى ءوتتى. تۇلعا ەسىمىن ۇلىقتاۋعا ارنالعان تاعىلىمدى كونتسەرتتە, سونداي-اق ۇلى ءانشىنىڭ شىعارماشىلىعىن ناسيحاتتاپ جۇرگەن ورىنداۋشىلاردى سالتاناتتى ماراپاتتاۋ ءراسىمى بولدى.
مازمۇندى مۋزىكا كەشىندە تەاتر سوليستەرى, Astana Opera حالىقارالىق وپەرا اكادەمياسىنىڭ تىڭداۋشىلارى جانە وبلىستىق فيلارمونيالاردىڭ شاقىرىلعان ارتىستەرى, اتاپ ايتساق, قازاقستاننىڭ ەڭبەك سىڭىرگەن ءارتىسى شولپان دۇكىمباەۆا (كوكشەتاۋ), قازاقستاننىڭ ەڭبەك سىڭىرگەن ءارتىسى, مادەنيەت قىزمەتكەرى نۇرياش وسپانوۆا (اتىراۋ), ماەسترو مارات ءايتىموۆ (اقتوبە) باستاعان تالانتتى مۋزىكا مايتالماندارى ونەر كورسەتتى. كورەرمەن نازارىنا دارىندى ارتىستەردىڭ ورىنداۋىندا كۇلاش بايسەيىتوۆانىڭ رەپەرتۋارىنان اسەم دە اۋەزدى اندەر ۇسىنىلدى.
كونتسەرت اجارىن اشقان سونداي بىرەگەي ورىنداۋدىڭ ءبىرى – قازاقستاننىڭ ەڭبەك سىڭىرگەن ءارتىسى عاليا بايعازينوۆا اۋەلەتكەن ءانشى رەپەرتۋارىنداعى اسەم اندەر كەلگەن كورەرمەننىڭ قۇلاق قۇرىشىن قاندىردى.
– مەن ءۇشىن بۇل كونتسەرتتىڭ ماڭىزى وتە زور, وعان اسقان جاۋاپكەرشىلىكپەن دايىندالدىم. شىعارماشىلىق جولىمدا كۇلاش بايسەيىتوۆانىڭ رەپەرتۋارىنداعى «قىز جىبەك» وپەراسىنداعى ايگىلى پارتياسىنان باستاپ بارلىق اندەردى ايتىپ شىقتىم. سونداي-اق اڭىزعا اينالعان ءانشى بىرنەشە مارتە شىرقاعان پولياكتىڭ حالىق ءانىن پولشادا تانىستىردىم. بۇل مۋزىكالىق شىعارمالاردىڭ بارلىعى ماعان وتە قىمبات, سەبەبى جانىما ىستىق ەستەلىكتەر سولارمەن بايلانىستى. ال ءانشىنىڭ تالانتتى عۇمىرى ءبىز ءۇشىن قاشاندا عۇمىرلىق تاعىلىم, دەپ تەبىرەنە تولعاندى ءانشى.
ەسكە سالا كەتسەك, قازاقتىڭ بۇلبۇلىنا ارنالعان كەرەمەت كەشتىڭ نەگىزگى ۇيىمداستىرۋشىسى – «قازاقستان ۆوكاليستەر وداعىنىڭ» قۇرىلعانىنا بيىل 5 جىل تولادى. ونىڭ توراعاسى – «استانا وپەرا» وپەرا ترۋپپاسىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى ازامات جىلتىركوزوۆتىڭ باستاماسىمەن وداق ەلىمىزدىڭ تۇكپىر-تۇكپىرىندەگى ورىنداۋشىلاردىڭ باسىن بىرىكتىرىپ, ۆوكال ونەرىن ناسيحاتتاۋعا قوماقتى ۇلەس قوسىپ كەلەدى.
– «ۆوكاليستەر وداعى» رەسپۋبليكالىق ۇيىم بولعانىمەن, ونىڭ گەوگرافياسى ۋاقىت وتە كەلە كەڭەيىپ, حالىقارالىق بىرلەستىك دەڭگەيىنە كوتەرىلدى دەۋگە بولادى. قازىرگى تاڭدا وعان 100-دەن استام ادام مۇشە. ولاردىڭ بارلىعى كاسىبي بىلىكتى ۆوكاليستەر. مەن دە وسى بىرلەستىكتىڭ قۇرامىندامىن, وندا اعا بۋىن مەن جاس مۋزىكانتتار دا جەمىستى ەڭبەك ەتۋدە. جاس بۋىن بىزبەن كەڭەسىپ, وسىلايشا تاجىريبە الماسامىز. بىرنەشە رەت «ۆوكاليستەر وداعىنىڭ» كونتسەرتىن وتكىزدىك. وسى رەتتە بىرلەستىك توراعاسى ازامات جىلتىركوزوۆتىڭ ەلەۋلى ەڭبەگىن اتاپ وتكىم كەلەدى. 2020 جىلدان باستاپ «ۆوكاليستەر وداعى» ايتۋلى داتالارعا وراي دارىندى انشىلەردى كۇلاش بايسەيىتوۆا اتىنداعى مەدالمەن ماراپاتتاۋدى قولعا الدى. مۇنداعى نەگىزگى ماقسات قازاق وپەراسىنىڭ نەگىزىن قالاعان كۇلاش بايسەيىتوۆانىڭ ەسىمىن دارىپتەۋ بولىپ تابىلادى. ءوزىن انشىلىك جولدا سىناپ جۇرگەن ونەرپازدار ءۇشىن بۇل شىنىمەن دە جوعارى ماراپات, – دەپ اتاپ ءوتتى قازاقستاننىڭ ەڭبەك سىڭىرگەن قايراتكەرى, پيانيست راۋشان بەسكەمبيروۆا.
بۇعان دەيىن «ۆوكاليستەر وداعى» بيبىگۇل تولەگەنوۆا, حورلان قاليلامبەكوۆا, قانات ومارباەۆ, شاحيماردان ءابىلوۆ, بارسەگ تۋمانيان, ەۆا مارتون سەكىلدى اتاقتى قازاقستاندىق جانە شەتەلدىك وپەرا انشىلەرىن وسى مەدالمەن ماراپاتتاعان بولاتىن. ولاردىڭ بارلىعى دا اتالعان بىرلەستىكتىڭ مارتەبەلى مۇشەسى. سونداي-اق ۇلكەن تەاتر ءسوليسى, رەسەيدىڭ ەڭبەك سىڭىرگەن ءارتىسى پاۆەل چەرنىح پەن باسقا دا تانىمال شەتەلدىك ارتىستەر وداق مۇشەلەرى اتانعانىن ايتا كەتكەنىمىز ءجون.
ال قازاق وپەراسىنىڭ اڭىزى, بۇلبۇل ءانشى كۇلاش بايسەيىتوۆاعا ارنالعان بۇگىنگى كەش شىن مانىندە تۇلعانىڭ ونەردەگى تاعىلىمدى جولىن دارىپتەۋگە ارنالعان تاماشا شىعارماشىلىق شارىقتاۋ بولعانى ءسوزسىز. ءانشى ءىزىن جالعار قازاقتىڭ تالانتتى ۇل-قىزدارى مەن تالعامپاز تىڭدارمانى باردا كۇلاش بايسەيىتوۆا ەسىمى استە وشپەيدى. عاسىردى عاسىرعا جالعاپ بۇلبۇل اۋەزى ماڭگى شىرقالا بەرمەك. كورەرمەن كوڭىلىن سەرپىلتكەن «كۇلاشتىڭ ءانى» جوباسى سونىڭ ايقىن دالەلى.