ەلوردا اكىمى كوممۋنالدىق كاسىپورىنداردىڭ قىزمەتكەرلەرىمەن كەزدەسۋ وتكىزدى, دەپ حابارلايدى Egemen.kz التاي كولگىنوۆتىڭ Instagram جەلىسىنە سىلتەمە جاساپ.
«قالامىز كۇننەن كۇنگە ءوسىپ كەلەدى: جاڭا تۇرعىن اۋداندار, الەۋمەتتىك نىساندار, كوشەلەر مەن كوپىرلەر اشىلىپ جاتىر. سوندىقتان كوممۋنالدىق قىزمەتتەرگە دە جۇكتەمە ارتىپ كەلەدى. ەلوردانىڭ كۇرت كونتينەنتالدى كليماتىنا قاراماستان, ءبىزدىڭ كوممۋنالدىق كاسىپورىن قىزمەتكەرلەرى كۇندىز دە, تۇندە دە, كەز كەلگەن اۋا-رايىندا جۇمىس ىستەيدى. ولاردىڭ جايلى ەڭبەگى ءۇشىن ءبىز اۆتوپاركتى ۇنەمى جاڭارتىپ وتىرامىز, جالاقىنى كوتەرەمىز, سىياقىلاردى دا ەنگىزدىك. ماسەلەن, سوڭعى جىلدارى عانا 300-دەن استام ارنايى تەحنيكا مەن جابدىق ساتىپ الىندى», دەپ جازدى قالا باسشىسى.
سونداي-اق, ول قاراشا ايىنان باستاپ «استانا تازالىق» جول جۇمىسشىلارى مەن جۇرگىزۋشىلەرىنىڭ جالاقىسى 20%-عا وسەتىنىن اتاپ ءوتتى. بۇرىن جالاقى كولەمى باسقا ساناتتار ءۇشىن دە كوتەرىلگەن.
«2023 جىلى قالالىق كوممۋنالدىق قىزمەت قىزمەتكەرلەرىنىڭ جالاقىسىن قوسىمشا كوتەرەمىز. قاجەت بولعان جاعدايدا اۆتوپاركتى جاڭارتۋدى جالعاستىرامىز», دەدى اكىم.
ونىڭ ايتۋىنشا, قىسقى كەزەڭدە قالانىڭ كوممۋنالدىق قىزمەتتەرى كوشەلەردى, الەۋمەتتىك نىساندارعا كىرمە جولداردى, جاياۋ جۇرگىنشىلەرگە ارنالعان تروتۋارلاردى, ايالدامالاردى تازالاۋعا ەرەكشە نازار اۋدارۋى قاجەت.