ەرتىس اۋدانىنان جولساپاردان كەلە جاتىپ, جولاي اقتوعايعا سوعىپ ەدىك, اۋدان ورتالىعىنا كىرەبەرىستەن-اق ءبىزدى ىزىڭداعان سارى ماسا قارسى الدى. قارسى بەتتەن كەپ سوعىلعان شىركەيدەن ماشينامىزدىڭ اينەگى دە سارىجاعال بولدى دا قالدى. جالعىز اقتوعاي اۋدانى ەمەس, جالپى ءوزى, جىل سايىن جاز شىعا ەرتىس وزەنى جيەگىندە وتىرعان اۋىلداردى سارى ماسا, شىبىن-شىركەيدىڭ مازالايتىنى راس.
بيىل اۋدان ورتالىعى اقتوعايدا 3114 ءتۇپ اعاش, 1115 كوشەت ەگىلىپتى, شىبىن-شىركەي جينالماس ءۇشىن اۋىلداردان 4684 توننا قوقىس شىعارىلعان ەكەن. ال, نەگىزىنەن, سارى ماسا, شىبىن-شىركەيلەردى ۋلاۋ جۇمىستارى وبلىستاعى ءۇش قالادا – اقسۋ, ەكىباستۇز جانە وبلىس ورتالىعىندا جۇرگىزىلۋدە. ۋلاۋعا رەسپۋبليكالىق بيۋدجەتتەن 160 ميلليون تەڭگە ءبولىنىپ, 26 مىڭنان استام گەكتار جەر تازاراتىنى اكىمدىكتە بولعان وتىرىستا دا ايتىلدى. وبلىس اكىمى قانات بوزىمباەۆ شىبىن-شىركەيدى قۇر ۋلاي سالۋ ەش ناتيجە بەرمەيتىنىن ەسكەرتتى. ۋلاۋ قۇرالدارىنىڭ ساپاسى, قۇرامى قانداي دەگەن دە ماسەلە بار. بۇل جۇمىس گيدروتەحنيكالىق-سانيتارلىق جۇيەلى شارالار ناتيجەسىندە قولعا الىنۋى ءتيىس. قالالارعا ماسا قايدان كەلەدى دەمەڭىز. مىسالى, ەكىباستۇزدىڭ اينالاسىنداعى 60 سۋ قويماسىن قامىس باسىپ كەتىپتى. قويمالاردى تازالاۋ وڭاي جۇمىس ەمەس. وبلىستىق تۇتىنۋشىلار قۇقىعىن قورعاۋ دەپارتامەنتى باسشىسىنىڭ مىندەتىن اتقارۋشى ساۋلە وسپانوۆانىڭ ايتۋىنشا, جالپى, وبلىس كولەمىندە جاڭا تالاپ, وركەنيەتتىلىك تۇرعىسىنان قاراعاندا يننوۆاتسيالىق گيدروتەحنيكالىق-سانيتارلىق جۇمىستار ءجوندى قولعا الىنباي تۇرعان سياقتى. ەگەر بۇل جۇيە بۇتىندەي قولعا الىنسا, وندا اۋىل-قالا دەپ بولمەي كەشەندى تۇردە جۇمىس جۇرگىزۋگە بولۋشى ەدى. اقتوعايلىقتار سياقتى باسقا اۋدان ورتالىقتارىنىڭ تۇرعىندارى, اۋىلدار دا سارى ماسا, شىبىن-شىركەيگە تالانبايتىنى انىق.
فاريدا بىقاي,
«ەگەمەن قازاقستان».
پاۆلودار وبلىسى.