اقتوبەدەگى كوپقاباتتى ۇيلەردىڭ بىرىندە ديماش قۇدايبەرگەننىڭ مۋرالى پايدا بولدى, دەپ حابارلايدى Egemen.kz.
الماتى شىعارماشىلىق بيۋروسىنىڭ ۇجىمى مەن Q88 ۋربانيستەر قاۋىمداستىعىمەن بىرلەسىپ, اقتوبە وبلىسى اكىمدىگىنىڭ باستاماسىمەن قالا ورتاسىن جاقسارتۋ بويىنشا كرەاتيۆتى جوبالاردى ىسكە اسىرۋدا. ولاردىڭ ءبىرى اقتوبە قالاسىنداعى كوپقاباتتى ۇيلەرگە قابىرعا سۋرەتتەرىن جاساۋ. ءسويتىپ, وبلىس ورتالىعىنداعى ۇيلەردىڭ بىرىندە قازاقستاننىڭ ەڭبەك سىڭىرگەن قايراتكەرى عانا ەمەس, الەمدىك مۋزىكا ونەرىنىڭ مايتالمانى اتانعان قازاق ءانشىسى ديماش قۇدايبەرگەننىڭ الىپ بەينەسى پايدا بولدى.
سۋرەتشىلەر ديماشتىڭ اقتوبە قالاسىندا تۋعانىنا بايلانىستى ونىڭ مۋرالىن تۋعان جەرىندە سالۋدى ءجون كوردى. ءانشىنىڭ شىعارماشىلىعى مەن جەتىستىكتەرى الماتى شىعارماشىلىق بيۋروسىنىڭ كومانداسىن جانە Q88 Urban قاۋىمداستىعىن پوپ-ارت ستيلىندە ەسكيز جاساۋعا شابىتتاندىردى.
«مۋرالدى سالۋ بارىسىندا سۋرەتشىلەر ىستىق تەمپەراتۋرادا بۇزىلمايتىن گراففيتيگە ارنالعان ارنايى سپرەي بوياۋلارىن پايدالاندى. سوندىقتان قابىرعا سۋرەتى قالا تۇرعىندارىن مۇمكىندىگىنشە ۇزاق ۋاقىت بويى قۋانتادى. كەسكىننىڭ بيىكتىگى 9 قاباتتان جوعارى, 18 مەتردەن كەم ەمەس», دەيدى جوبانىڭ باستاماشىلارى.
اۆتورلار ديماشتىڭ تۇلعاسىنا بايلانىستى جىلۋلىق, پوزيتيۆتىلىك جانە جاقسى ەموتسيالارعا تولى جارقىن كومپوزيتسيا اۋا-رايىنىڭ ەڭ قاتال كۇندەرىندە دە قالا تۇرعىندارىن قۋانتادى دەپ سەنەدى.