ايەلدەردىڭ زەينەت جاسىنا قاتىستى زاڭ جوباسى ماقۇلداندى

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك جاستار ساياساتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسى مەملەكەتتىك جاستار ساياساتى سالاسىنداعى زاڭنامانى جەتىلدىرۋگە جانە جاستاردىڭ قۇقىقتارى مەن مۇددەلەرىن قورعاۋعا باعىتتالعان. زاڭ جوباسىمەن جۇمىس بارىسىندا دەپۋتاتتار «جاستار» ۇعىمىنىڭ جاس شەڭبەرىن 29 جاستان 35 جاسقا دەيىن ۇلعايتۋعا باعىتتالعان تۇزەتۋلەر ەنگىزدى, بۇل جاستاردىڭ الەۋمەتتىك بەلسەندىلىگىن ارتتىرۋعا, ءوپتيميزمدى, ەرتەڭگى كۇنگە دەگەن سەنىمدىلىك سەزىمىن نىعايتۋعا مۇمكىندىك بەرەدى. «جاستاردىڭ الەۋمەتتىك قىزمەتتەرى» جانە «ۋاقىتشا تۇراقسىز جاستار» ۇعىمدارى ناقتىلانادى», دەدى دەپۋتات ءجاميلا نۇرمانبەتوۆا ءماجىلىس وتىرىسىندا.

بۇدان باسقا, مەملەكەت باسشىسىنىڭ 2022 جىلعى 1 قىركۇيەكتەگى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىنىڭ اياسىندا دەپۋتاتتار زاڭنىڭ الەۋمەتتىك بلوگىنا تۇزەتۋلەر ەنگىزدى.

اتاپ ايتقاندا, اڭگىمە ايەلدەر ءۇشىن زەينەتكەرلىككە شىعۋ جاسىن 61 جاس دەڭگەيىندە بەكىتۋ, جاسىنا بايلانىستى زەينەتاقى تولەمدەرىن ەسەپتەۋ ءۇشىن تابىس شەگىن 46 ەسەدەن 55 ەسەگە دەيىن ۇلعايتۋ, ەڭبەك ەتۋ قابىلەتىنەن ايىرىلعان, سونداي-اق اسىراۋشىسىنان ايىرىلعان جاعدايدا اي سايىنعى الەۋمەتتىك تولەمنەن شەگەرىم مولشەرىن 55 ەسەدەن ازايتۋ تۋرالى بولىپ وتىر. سونداي-اق ەتج وسۋىنە بايلانىستى الەۋمەتتىك تولەمدەر مولشەرىن ازايتۋدى بولدىرماۋ ماقساتىندا ەڭ تومەنگى جالاقى مولشەرىنىڭ 50%-نا دەيىن, سونداي-اق جۇمىسىنان ايىرىلعان جاعدايدا الەۋمەتتىك تولەمدى ەسەپتەۋ ءۇشىن الماستىرۋ كوەففيتسيەنتىن تۇزەتۋ ماسەلەلەرى زەردەلەندى.

«زاڭ جوباسى شەڭبەرىندە قارالاتىن ماسەلەلەر اياسىنىڭ كەڭەيۋىن ەسكەرە وتىرىپ, دەپۋتاتتار زاڭ جوباسىنىڭ تاقىرىبىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك جاستار ساياساتى جانە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» دەپ وزگەرتۋ جونىندە ۇسىنىس ەنگىزدى», دەپ تولىقتىردى ءجاميلا نۇرمانبەتوۆا.

وسىلايشا, ءماجىلىس ەكىنشى وقىلىمدا زاڭ جوباسىن ماقۇلدادى. ءتيىستى قاۋلى قابىلداندى.