تۇران ۋنيۆەرسيتەتىندە «سايلاۋ ۇدەرىسىنىڭ زاماناۋي شىندىقتارى جانە قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلاردى ءتۇسىندىرۋ» تاقىرىبىندا ۇكىمەتتىك ەمەس ۇيىمداردىڭ وكىلدەرىمەن, ستۋدەنتتەر, ماگيسترانتتار, دوكتورانتتار جانە پروفەسسور-وقىتۋشىلار قۇرامىمەن كەزدەسۋ ءوتتى.
كەزدەسۋ بارىسىندا پروفەسسور, «ادال سايلاۋ ءۇشىن» شتابىنىڭ مۇشەسى ەرمەك ءابدىراسۇلوۆ سايلاۋ ۇدەرىسى مەن قۇقىقتىڭ وزەكتى ماسەلەلەرىنە ەگجەي-تەگجەيلى توقتالدى.
شتاب مۇشەسى, قازاقستان زاڭگەرلەر وداعى استانا فيليالىنىڭ توراعاسى سەرىك بەركامالوۆ زاڭدا كوزدەلگەن ازاماتتاردىڭ سايلاۋ بوستاندىعىن قامتاماسىز ەتۋ كەپىلدىكتەرى تۋرالى ايتىپ بەردى.
پرەزيدەنتتىككە كانديداتتاردىڭ جانە ولاردىڭ سەنىم بىلدىرىلگەن ادامدارىنىڭ ۇگىت-ناسيحات جۇرگىزۋ ەرەجەلەرى, كانديداتتاردىڭ باق-تاعى جاريالانىمدار مەن ەفيرلەرگە تەڭ قولجەتىمدىلىگىن قامتاماسىز ەتۋ تاسىلدەرى اۋديتوريانىڭ ۇلكەن قىزىعۋشىلىعىن تۋدىردى. جيىنعا قاتىسۋشىلار سايلاۋ زاڭناماسىن ۋاقتىلى ءتۇسىندىرۋدىڭ ماڭىزدىلىعىن اتاپ ءوتىپ, ۇيىمداستىرۋشىلارعا العىستارىن ءبىلدىردى.
ەستەرىڭىزگە سالساق, 27 قىركۇيەكتە ەلىمىزدىڭ زاڭگەرلەر قاۋىمداستىعىن شوعىرلاندىرۋ ماقساتىندا قازاقستان زاڭگەرلەر وداعى رەسپۋبليكالىق قوعامدىق بىرلەستىگىنىڭ الاڭىندا «ادال سايلاۋ ءۇشىن» شتابى قۇرىلعان بولاتىن. ماقساتى – سايلاۋ زاڭناماسىنىڭ نەگىزگى ەرەجەلەرىن ءتۇسىندىرۋ, سايلاۋ ۇدەرىسىنە قاتىسۋشىلارعا قۇقىقتىق كومەك كورسەتۋ, ازاماتتىق قوعام, حالىقارالىق ۇيىمدار وكىلدەرىمەن ءوزارا ءىس-قيمىل جاساۋ.