اباي وبلىسىنىڭ ەكى تۇرعىنىنان قارۋ تاركىلەندى

6 قازاندا «ۋچاستوك» جمك وتكىزۋ شەڭبەرىندە اياگوز اۋدانىنداعى شارۋا قوجالىقتارىنىڭ بىرىندە 55 جاستاعى ەر ادامنىڭ ۇيىندە مىلتىق تابىلدى.

ءىىم بازالارى بويىنشا تەكسەرۋ بارىسىندا مىلتىق تىركەلمەگەن. سوت-بالليستيكالىق ساراپتامانىڭ ناتيجەلەرى بۇل قارۋدىڭ اتۋعا جارامدى ەكەنىن جانە 1959 جىلى شىعارىلعان 5,6 مم كاليبرلى توز-8م مودەلىنىڭ مىلتىعى ەكەنىن كورسەتتى.

ەر ادامنىڭ ايتۋىنشا, ول ونى ءۇش كۇن بۇرىن شارۋا قوجالىعىنىڭ جانىنان تاۋىپ الىپ, پوليتسيا بولىمىنە تاپسىرماق بولعان.

7 قازاندا «ۋچاستوك» جەدەل-ىزدەستىرۋ ءىس-شارالارىن جۇرگىزۋ بارىسىندا اياگوز اۋدانىنىڭ تاعى ءبىر 53 جاستاعى تۇرعىنىنان زاڭسىز قارۋ تاركىلەندى. ءىىم-ءنىڭ ارنايى بازالارى بويىنشا تەكسەرۋ ناتيجەلەرى بۇل مىلتىق بازادا تىركەلمەگەنىن كورسەتتى. ساراپتاماعا قاراعاندا, بۇل 1962 جىلى شىعارىلعان 5,6 كاليبرلى, № 17690 زاۋىتتىق مىلتىق. ەر ادام اياگوز وكم يەسى رەتىندە ەسەپتە تۇرمايدى. بۇل مىلتىق ونىڭ مارقۇم اكەسىنە تيەسىلى ەكەندىگى انىقتالدى.

جوعارىدا كورسەتىلگەن فاكتىلەر بويىنشا «قارۋدى, وق-دارىلەردى, جارىلعىش زاتتار مەن جارىلعىش قۇرىلعىلاردى زاڭسىز ساتىپ الۋ, بەرۋ, وتكىزۋ, ساقتاۋ, تاسىمالداۋ نەمەسە الىپ ءجۇرۋ» قر عك 287-بابىنىڭ ءۇشىنشى بولىگى بويىنشا سوتقا دەيىنگى تەرگەپ-تەكسەرۋ باستالدى. وسى باپتىڭ سانكتسياسىمەن بەس جىلعا دەيىنگى مەرزىمگە باس بوستاندىعىنان ايىرۋ قاراستىرىلعان.