بىزگە ەڭ الدىمەن شىنايىلىق پەن اشىقتىق قاجەت. قارالى قاڭتاردان كەيىن مەملەكەتتىك ساياساتتا ۇلكەن بەتبۇرىس بولدى. وتكەننىڭ قاتەلىگىن قايتالاماۋدى ماقسات تۇتقان مەملەكەت باسشىسى قاسىم-جومارت توقاەۆتىڭ باستاماسىمەن اتا زاڭىمىزعا وزگەرىستەر مەن تولىقتىرۋلار ەنگىزىلىپ, بۇل نورمالاردىڭ بارلىعى حالىق تۇرمىسىن جاقسارتۋ مەن مەملەكەتتىڭ وركەندەۋىنە باعىتتالدى.
مەملەكەت باسشىسى حالىققا ەكى رەت جولداۋ ارناپ, ساياسي جانە ەكونوميكالىق ساياساتىمىزدى تۇبەگەيلى وزگەرتۋ ارقىلى ادىلەتتى قازاقستان قۇرۋ جولىنا تۇسەتىنىمىزدى ايتتى. جولداۋدا «ۇلتتىق تابىستىڭ يگىلىگىن جۇرتتىڭ بارلىعى كورىپ وتىرعان جوق, ارينە, مۇنىڭ بارلىعى كۇردەلى ماسەلەلەر, ونى شەشۋدىڭ ناقتى جولدارى بار» دەي كەلىپ, حالىق تۇرمىسىن جاقسارتۋدىڭ باعىت-باعدارىن ايقىندادى. الەۋمەتتىك ادىلدىكتى ورناتىپ, ۇلتتىق قوردىڭ ينۆەستيتسيالىق تابىسىنىڭ 50 پايىزىن بالالاردىڭ ارناۋلى ەسەپ شوتىنا, 7 پايىزىن «قازاقستان حالقىنا» قورىنا اۋدارۋدى ۇيعاردى. كەلەسى جىلى 100 مىڭ جاستى جۇمىسپەن قامتۋ, جاس كاسىپكەرلەر مەن ستۋدەنتتەرگە 2,5 پايىزدىق نەسيەلەر بەرۋ جانە ءبىلىم-عىلىم, دەنساۋلىق ساقتاۋ جانە تاعى باسقا دا سالالارعا رەفورما جاساۋ جونىندە تاپسىرمالار بەردى.
ء«سوز تۇزەلدى, تىڭداۋشى, سەن دە تۇزەل» دەپ اباي اتامىز ايتقانداي, مەملەكەت باسشىسى ادىلەتتى قازاقستان قۇرۋدىڭ باعىتىن ايقىندادى. ءوز مۇمكىندىگىن تولىقتاي كورسەتە الماي كەلگەن اۋىل شارۋاشىلىعى مەن تۇرالاپ تۇرعان اۋىلداردىڭ تامىرىنا قان جۇگىرتۋ ماسەلەسى قايتا قوزعالدى.
كوپ اكىمنىڭ جۇمىسىنا حالىقتىڭ كوڭىلى تولماعانى شىندىق, وعان ءبىزدىڭ دە جاۋاپكەرشىلىگىمىز بار ەكەنىن ۇمىتپاعانىمىز ءجون. اكىمدەردىڭ جۇمىسىن قاداعالاپ, ولارعا باعىت-باعدار بەرەدى دەگەن كەيبىر اقساقالىمىزدىڭ كادر وسىرۋمەن اينالىسىپ, تەندەر الۋشىلاردىڭ سويىلىن سوعىپ كەتكەنى بەلگىلى. قارالى قاڭتاردا الەۋمەتتىك ادىلەتسىزدىككە نارازى بولعان جاستار كىمگە سەنەرىن بىلمەي سەڭدەي سوعىلىسقاندا كەيبىر وبلىستار مەن قالالاردا جاستارعا باسۋ ايتىپ, ارانداپ قالماۋعا شاقىراتىن اقساقالدار مەن زيالى قاۋىمنىڭ بولماعانى ەلدىگىمىزگە سىن.
ءوسىپ كەلە جاتقان جاس ۇرپاق سوزىمىزگە ەمەس ىسىمىزگە قارايتىنى بەلگىلى. «ۇيادا نە كورسەڭ ۇشقاندا سونى ىلەرسىڭ», دەگەن ءتامسىل بەكەرگە ايتىلماعان. سوندىقتان اعا بۋىن جاستارعا ءىسى, ەڭبەگى, ادالدىعىمەن ۇلگى بولعانى ءجون.
مەملەكەت باسشىسى ق.توقاەۆ الداعى ۋاقىتتا بارلىق دەڭگەيدەگى اكىمدەردى كەزەڭ-كەزەڭىمەن حالىقتىڭ تاڭداۋى ارقىلى سايلانۋعا جول اشاتىنىن ەسكەرتتى, قازىردىڭ وزىندە اۋىل اكىمدەرى جەرگىلىكتى حالىقتىڭ سايلاۋى ارقىلى بيلىككە كەلىپ جاتىر. وسى مۇمكىندىكتى پايدالانا وتىرىپ ناعىز ىسكەر, وتانشىل ازاماتتار كەڭەسە وتىرىپ, جۇمىلا جۇمىس ىستەۋى كەرەك. اتام قازاق «كەڭەسىپ پىشكەن تون كەلتە بولماس» دەگەندى وسىنداي بەرەكەلى ەلگە قاراتىپ ايتقان. ارداگەرلەر, باسقا دا قوعامدىق ۇيىمدار بارلىق سالانىڭ جۇمىسىنىڭ ناتيجەلى بولۋىن تالاپ ەتەتىن ينستيتۋتقا اينالۋى قاجەت.
ول ءۇشىن بىزگە اۋىزبىرشىلىك اۋاداي قاجەت. قازىر الەمدىك گەوساياسي جاعداي كۇننەن-كۇنگە ۋشىعىپ بارادى. قۇداي قوسقان كورشىلەرىمىز ءوز جاقىندارىمەن جاۋلاسىپ, اياعى قانتوگىسكە ۇلاسىپ وتىر. رەسەي مەن ۋكراينا, قىرعىزستان مەن تاجىكستان, قىتاي مەن تايۆان ەجەلدەن اعايىندى ەلدەر بولعانىمەن ارالارىنا سىزات ءتۇسىپ, ءبىر-ءبىرىن اڭدىسىپ وتىر. بۇل تەكەتىرەستىڭ سالقىنى وسى مەملەكەتتەردىڭ ورتاسىندا وتىرعان ەلىمىزدىڭ ەكونوميكاسى مەن تۇراقتىلىعىنا اسەر ەتپەي قويماسى انىق. جاپپاي قىمباتشىلىقتىڭ سالقىنى ەل ازاماتتارىن قيناپ وتىرعانى تاعى بار. وسىنداي ۇرىمتال تۇستى پايدالانىپ, ايرانداي ۇيىعان تىنىشتىعىمىزدى بۇزعىسى كەلەتىن سىرتقى كۇشتەرمەن بىرگە ارامىزدا جۇرگەن جات نيەتتىلەردىڭ دە بار ەكەنىن باعامداپ بىلگەنىمىز ءجون. بەرەكەمىزدى بۇزعىسى كەلەتىندەردىڭ بارى انىق, ولاردىڭ ماقساتى – مەملەكەتتىلىگىمىزدىڭ تامىرىنا بالتا شابۋ.
مەملەكەت باسشىسى جولداۋىندا ايتقان كەزەكتەن تىس پرەزيدەنت سايلاۋى 20 قاراشادا وتەتىنى بەلگىلى بولدى. وسىعان وراي ءاربىر رەسپۋبليكالىق قوعامدىق بىرلەستىك ءوز كانديداتتارىن دوداعا قوستى.
ەلىمىزدەگى ەڭ ىقپالدى ساياسي كۇشكە اينالعان «Amanat» پارتياسىنىڭ XXIV سەزىندە ەل پرەزيدەنتتىگىنە ۇمىتكەر رەتىندە ق.توقاەۆتىڭ كانديداتۋراسىن ۇسىنىپ, ناۋرىز ايىنان بەرى تالقىعا شىعارىلىپ, حالىقتىڭ قاجەتىنە بەيىمدەلىپ قايتا جازىلعان پارتيانىڭ جاڭا ساياسي تۇعىرناماسى بەكىتىلدى.
«اق جول» مەن حالىق پارتياسى جانە بىرنەشە رەسپۋبليكالىق قوعامدىق بىرلەستىك «Amanat» پارتياسىنىڭ تاڭداۋىنا قوسىلىپ, حالىقتىق كواليتسيا اتىنان ەل پرەزيدەنتتىگىنە ۇمىتكەر رەتىندە قاسىم-جومارت توقاەۆتى قولدايتىنىن جەتكىزدى.
حالىقتىق كواليتسيا فورۋمىندا ءسوز العان ءاربىر ازامات, مەملەكەت باسشىسى ق.توقاەۆتىڭ جۇرگىزىپ وتىرعان رەفورمالارىنىڭ حالىق تۇرمىسىن جاقسارتۋعا, جاستاردى قاجەتتى ءبىلىم-عىلىممەن قامتاماسىز ەتۋگە, ساپالى مەديتسينالىق كومەكتەردىڭ قولجەتىمدىلىگىنە, جەمقورلىقتى تۇبەگەيلى جويىپ اشىق ۇكىمەت ورناتۋعا, سونداي-اق «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتىن ورناتۋعا باعىتتالعانىن باسا ايتتى. سونىمەن بىرگە ء«وزى باستاعان رەفورمالارىن اياعىنا دەيىن جەتكىزۋگە مۇمكىندىك بەرۋىمىز كەرەك» دەگەن شەشىمگە كەلدى.
الەمدى تۇراقسىزدىق جايلاعان تۇستا قازاقستانداعى بىرلىكتىڭ بۇرىنعىدان دا نىعايا ءتۇسۋى ء«تۇرلى كوزقاراس – ءبىرتۇتاس ۇلت» قاعيداتىنىڭ كورىنىسىنە اينالىپ, ساياسي مادەنيەتى قالىپتاسقان ەل ەكەنىمىزدى دالەلدەدى. حالىقتىڭ ءال-اۋقاتىن ارتتىرۋ مەن مەملەكەتتىلىگىمىزدى ودان ءارى نىعايتۋدىڭ كەپىلى بولاتىن ادىلەتتى قازاقستان قۇرۋ ءۇشىن بىزگە وتانشىلدىق يدەياسىن ۇستانعان, ەڭبەكقورلىق پەن اۋىزبىرشىلىك اۋاداي قاجەت.
ابدىعاني بازىلحان ۇلى,
«Amanat» پارتياسى استانا قالالىق فيليالى ساياسي جۇمىس ءبولىمىنىڭ كونسۋلتانتى