جاقىندا «استانا بالەت» تەاترىندا حح عاسىرداعى بالەت ونەرىنىڭ جاۋھارىنا اينالعان البەرتو الونسونىڭ «كارمەن-سيۋيتا» بالەتىنىڭ پرەمەراسى ءوتتى. ايتۋلى تۋىندىنى ەلوردالىق تەاتر ساحناسىنا بەلگىلى حورەوگراف تيموفەي لاۆرەنيۋك لايىقتاپ قويدى. پرەمەرانى مادەنيەت جانە سپورت ءمينيسترى داۋرەن اباەۆ تاماشالادى.
«كارمەن-سيۋيتا» بالەتى ج.بيزەنىڭ ايگىلى وپەراسىنىڭ ر.ششەدرين ترانسكريپتسياسىنداعى حورەوگرافيالىق نۇسقاسى. سيۋيتادا باس كەيىپكەردىڭ تۇرمىسى عانا ەمەس, تاعدىرى دا كوركەم سۋرەتتەلگەن. قويىلىمدا كارمەن بەينەسى ادالدىق پەن اسقاق ماحابباتتىڭ سيمۆولىنا اينالعان. سپەكتاكلدەگى وقيعا بىرەگەي دەكوراتسيا ءوربيدى: ساحنا كەڭىستىگى اعاشتان جارتىلاي دوڭگەلەك ىسپەتتى جاسالعان. ءبىر جاعىنان بۇل بۇقالارمەن سايىسۋ ورنى بولعانىمەن, ەكىنشىدەن, مەتافورالىق تۇرعىدا ءومىر الاڭىن كورسەتكەندەي اسەر بەرەدى. كەيىپكەرلەردىڭ باسىنداعى تاعدىردىڭ تاۋقىمەتى وسى الاڭدا ورىن الدى. «كارمەن-سيۋيتا» – ۇلى بالەرينانىڭ ەسىمىمەن تىعىز بايلانىستى بولسا دا, ول «استانا بالەت» ساحناسىندا جاڭاشا قىرىمەن كورىندى.
«الونسو كلاسسيكالىق ءبيدى ورىس ۇستازدارىنان ۇيرەنگەن. كەيىن ول ۇلتتىق بي قيمىلدارىن, لاتىن امەريكالىق, يسپاندىق بي مانەرىنە ءتان ەرەكشەلىكتەردى قوسىپ, ءوز حورەوگرافياسىمەن دارالانادى. سپەكتاكلدى قايتا قويعاندا وسىعان باسا ءمان بەرۋ قاجەت. بۇل بالەت ەرەكشە تەمپەرامەنت پەن اكتەرلىك شەبەرلىكتى تالاپ ەتەدى. «كارمەن-سيۋيتا» ۇنەمى ەرەكشەلەنىپ تۇرادى, سەبەبى, ءاربىر ورىنداۋشى ءوزى ءيىرىمى مەن تىڭ دۇنيەلەرىن قوسادى. ويتكەنى مۇندا ادامعا ءتان سەزىم ارپالىستارى, تۇرمىس-تىرشىلىك, ماحاببات, جاۋىزدىق, وپاسىزدىق, نازىكتىك, ز ۇلىمدىق قانا ەمەس, ورىندالماي قالعان ارماندار دا سۋرەتتەلەدى. وسىنى سەزىنگەن كورەرمەن كەيىپكەرلەرمەن بىرگە كۇي كەشەدى دەپ ويلايمىن», – دەيدى قويۋشى-حورەوگراف تيموفەي لاۆرەنيۋك.
قويىلىمداعى ءار پارتيا – وزىنشە دارا. باستى پارتيانى ورىنداعان تەاتردىڭ جەتەكشى ءسوليسى اينۇر ابىلعازينا ءار بالەرينا ءۇشىن كارمەن پارتياسى ەرەكشە ەكەندىگىن ايتادى.
«ونىڭ بەينەسى جارقىن عانا ەمەس ورىنداۋ جاعىنان دا جۇرەككە جاقىن كەلەدى. قاشاندا كوڭىلىنەن شىعاتىن ءوز كەيىپكەرىڭدى سومداۋ ماڭىزدى. وزگەلەردى قايتالاۋدىڭ قاجەتى شامالى ەكەنىن تۇسىنەمىن. باستىسى, كەيىپكەرىڭنىڭ باسىنان كەشكەنىن تەرەڭ سەزىنە ءبىلۋ كەرەك. بۇل بالەتتە ۇيرەنشىكتى كلاسسيكاعا ۇقسامايتىن قيمىلدار بار, ول يسپان ءبيىنىڭ ەلەمەنتتەرىمەن تولىسقان. ءبىز ءۇشىن بۇل تاڭسىق دۇنيە. سونىسىمەن دە قىزىقتى», – دەيدى ول.
سونداي -اق سپەكتاكلدەگى باسقا دا باستى پارتيالاردى ورىنداعان ايجان مۇقاتوۆا, سۇندەت سۇلتانوۆ, ۋەسلي كارۆالو, بايقادام تۇنعاتاروۆ جانە ايدان قالجان سەكىلدى تالانتتى تەاتر ارتىستەرىنىڭ ونەرىنە كورەرمەندەر زور قوشەمەت كورسەتتى.