پرەزيدەنت سايلاۋىنا از ۋاقىت قالدى. تۇرعىندار اراسىندا ماڭىزدى ناۋقان جايلى پىكىرلەر كوپ. بۇل رەتتە, ءتۇرلى قوعامدىق ۇيىمدار ارنايى ساۋالداما جۇرگىزىپ, حالىقتىڭ ويىن سارالاپ كوردى.
«قوعامدىق پىكىر» عىلىمي-زەرتتەۋ ينستيتۋتى جۇرگىزگەن الەۋمەتتىك ساۋالداماعا سايكەس, سۇراق-جاۋاپقا قاتىسقان قازاقستاندىقتاردىڭ 73,1 پايىزى «2022 جىلدىڭ 20 قاراشاسىندا وتەتىن پرەزيدەنت سايلاۋىنا بارامىن» دەپ جاۋاپ بەرگەن. ءبىر شەشىمگە كەلمەگەن رەسپوندەنتتەردىڭ ۇلەسى 15,9 پايىزدى قۇرايدى. 9,7 پايىزىنىڭ داۋىس بەرۋگە نيەتى جوق. رەسپوندەنتتەردىڭ 1,3 پايىزى سۇراققا جاۋاپ بەرۋگە قينالعان.
ال قاتىسۋشىلاردىڭ 76,1 پايىزى سايلاۋدىڭ ءادىل وتەتىنىنە سەنىم ءبىلدىردى. دالىرەك ايتساق, 48,3 پايىزى «ناقتى ءادىل وتەدى» دەپ جاۋاپ بەرسە, 27,8 پايىزى ء«ادىل وتۋگە ءتيىس» دەگەن پىكىر بىلدىرگەن. پرەزيدەنتتىككە كانديداتتىڭ بويىندا قانداي قاسيەتتەر بولۋى كەرەك دەگەن سۇراققا: «ادەپتىلىك, ادالدىق, جوعارى بىلىمدىلىك, قازاقستاندىقتار اراسىنداعى بەدەلى جوعارى بولۋعا ءتيىس» دەگەن جاۋاپتار تۇسكەن.
«قوعامدىق پىكىر» عىلىمي-زەرتتەۋ ينستيتۋتى الەۋمەتتانۋلىق زەرتتەۋدى بيىل 6-10 قازان ارالىعىندا جۇرگىزدى. ساۋالداماعا 17 وبلىس پەن رەسپۋبليكالىق ماڭىزى بار قالالاردان (استانا, الماتى جانە شىمكەنت) 18 جاستان اسقان 1 200 رەسپوندەنت قاتىستى. زەرتتەۋدە تەلەفون ارقىلى ساۋالداما ءادىسى قولدانىلدى. ساۋالداما ورتالىق سايلاۋ كوميسسياسىنىڭ 2022 جىلعى 30 قىركۇيەكتەگى №وسك-08-18/1179 حابارلاماسىنا سايكەس, وسك-ءنىڭ رەسمي رۇقساتىمەن وتكىزىلدى.
ينفوگرافيكانى جاساعان امانگەلدى قياس, «ەQ»