10-12 اقپان ارالىعىندا استانا قالاسىندا جەڭىل اتلەتيكادان 10-شى ازيا چەمپيوناتى وتەدى. اتالعان جارىس «Qazaqstan» جەڭىل اتلەتيكا سپورت كەشەنىنىڭ عيماراتىندا وتەدى, دەپ حابارلايدى Egemen.kz ەلوردا اكىمدىگىنىڭ ءباسپاسوز قىزمەتىنە سىلتەمە جاساپ.
ەلوردالىق جەڭىل اتلەتيكا فەدەراتسياسىنىڭ توراعاسى, استانا اكىمى التاي كولگىنوۆ, فەدەراتسيانىڭ باس حاتشىسى اسحات سەيسەمبەك قاتىسقان جيىندا الداعى چەمپيوناتقا دايىندىق ماسەلەلەرى مەن وسى جىلدىڭ قورىتىندىسى تالقىلاندى.
كەزدەسۋدە استانادا جەڭىل اتلەتيكادان مامانداندىرىلعان بالالار مەن جاسوسپىرىمدەر سپورت مەكتەبىن اشۋ ماسەلەسى قارالدى.
ەلوردا اكىمدىگى مەملەكەت باسشىسىنىڭ تاپسىرماسى بويىنشا بالالار مەن جاسوسپىرىمدەر مەكتەپتەرىن, فەدەراتسيالاردى قولداۋعا, بۇقارالىق سپورت تۇرلەرىن ناسيحاتتاۋعا ەرەكشە نازار اۋدارادى.
«كۋۆەيتتە جەڭىل اتلەتيكادان جاسوسپىرىمدەر اراسىنداعى ءتورتىنشى ازيا چەمپيوناتىندا قازاقستان قۇراماسى جالپى كوماندالىق ەسەپتە بەسىنشى ورىندى يەلەنىپ, ۇزدىك ناتيجە كورسەتتى. استانالىق سپورتشى اناستاسيا كولودا 400 مەترگە كەدەرگىلەرمەن جۇگىرۋدە كۇمىس مەدال جەڭىپ الدى», دەلىنگەن حابارلامادا.
وسى جىلدىڭ جەلتوقسان ايىندا جەڭىل اتلەتيكادان امين تۇياقوۆتىڭ جۇلدەلەرىنە ارنالعان حالىقارالىق تۋرنير وتەدى.
ەسكە سالا كەتسەك, بيىل استانا جەڭىل اتلەتيكا فەدەراتسياسىنىڭ قولداۋىمەن ءتۇرلى بۇقارالىق ءىس-شارالار ءوتتى: Nur-Sultan Half Marathon, Astana Marathon, وعان 30-دان استام ەلدەن 7 مىڭنان استام قاتىسۋشى قاتىستى.