مەملەكەت باسشىسى قاسىم-جومارت توقاەۆ الماتى وبلىسىنىڭ جۇرتشىلىعىمەن كەزدەسۋى بارىسىندا ءوڭىردىڭ تۋريستىك الەۋەتى زور ەكەنىن ايتتى, دەپ جازادى Egemen.kz.
«الماتى وبلىسى – ەلىمىزدەگى تۋريستىك سالانىڭ فلاگمانى. ونىڭ باستى باسەكەلەستىك ارتىقشىلىعى - ولكەنىڭ الۋان تۇرلىلىگىنە باي تابيعاتى. ۇلتتىق بايلىقتىڭ – كوركەم شاتقالداردىڭ, جاعالاۋ سىزىقتارى مەن سۋ ايدىندارىنىڭ, ۇلتتىق ساياباقتار مەن قورىقتاردىڭ زاڭسىز جەكەشەلەندىرىلۋىنە جول بەرىلمەيدى. ۇكىمەت پەن اكىمدىك مۇنداي فاكتىلەرگە ەرەكشە نازار اۋدارۋى قاجەت», دەدى قازاقستان پرەزيدەنتى.
بۇل رەتتە مەملەكەت باسشىسى ەلىمىزدىڭ كيەلى سيمۆولى - قار بارىسىنىڭ سانىن كوبەيتىپ, ساقتاۋ ماڭىزدى ماسەلەلەردىڭ ءبىرى ەكەنىن ايتتى.
«ىلە الاتاۋى ءوزىنىڭ بىرەگەي جابايى وسىمدىكتەرى مەن جانۋارلارىمەن تانىمال جانە حالىقارالىق تۋريستەردى تارتۋ ءۇشىن قۋاتتى ماگنيت بولا الادى. حالىقارالىق ۇيىمدارمەن بىرلەسە وتىرىپ, ءبىز تاۋلارىمىزدا ەلىمىزدىڭ كيەلى سيمۆولى - قار بارىسىنىڭ سانىن كوبەيتۋگە كۇش سالامىز. ىلە-بالقاش تابيعي رەزەرۆاتىندا جولبارىستاردى رەينترودۋكتسيالاۋدىڭ بىرەگەي جوباسى ىسكە قوسىلدى. وتكەن جىلدىڭ قورىتىندىسى بويىنشا قازاقستاننىڭ ۇلتتىق پاركتەرىنە كەلۋشىلەر سانى 1,5 ميلليونعا جەتكەنى قۋانتادى – بۇل رەكوردتىق كورسەتكىش», دەدى قاسىم-جومارت توقاەۆ.
سونداي-اق پرەزيدەنت ءوڭىردىڭ تۋريستىك الەۋەتىن دامىتۋعا ىقپال ەتەتىن بىرنەشە فاكتورلاردى اتادى.
«وبلىستىڭ تۋريستىك الەۋەتىن ارتتىرۋعا تانبالى تاس شاتقالىندا Tengri Ultra مارافونى جانە قاپشاعاي سۋ قويماسىندا Oceanman ءجۇزۋ سياقتى حالىقارالىق جارىستاردى وتكىزۋ ىقپال ەتەدى. قازىرگى ۋاقىتتا بۇل سۋ قويماسى اۋىز سۋمەن جابدىقتاۋ, سۋارۋ, بالىق اۋلاۋ, رەكرەاتسيا كوزى رەتىندە پايدالانىلادى. ۇكىمەت قاپشاعاي سۋ قويماسىنىڭ مارتەبەسىن ەلدىڭ نەگىزگى تۋريستىك نىساندارىنىڭ ءبىرى رەتىندە بەلگىلەۋى كەرەك. تۋريزم ايماقتاعى اۋىل شارۋاشىلىعىنىڭ تۇراقتى وسۋىنە دە سەپتىگىن تيگىزۋى مۇمكىن. قازاقستان سياقتى تەڭىزگە شىعا المايتىن اۆستريا دا تاۋ شاڭعىسىمەن قاتار شاراپ ءتۋريزمىن تابىستى ىلگەرىلەتىپ, ءوزىنىڭ ءجۇزىم شارۋاشىلىعىنا جانە اگرارلىق سەكتورىنا جاردەمدەسۋدە. بۇل ءبىز ءۇشىن جاقسى ۇلگى», دەدى مەملەكەت باسشىسى.