باس شاھاردا تەاتر تويى! مادەنيەت جانە سپورت مينيسترلىگىنىڭ قولداۋىمەن 18-23 قازان ارالىعىندا كورنەكتى تەاتر جانە كينو اكتريساسى, قازاقستاننىڭ مەملەكەتتىك سىيلىعىنىڭ لاۋرەاتى, كسرو حالىق ءارتىسى شولپان جانداربەكوۆانىڭ 100 جىلدىعىنا ارنالعان قازاقستان دراما تەاترلارىنىڭ ءXXVIIى رەسپۋبليكالىق فەستيۆالى ءوتىپ جاتىر.
التى كۇنگە سوزىلاتىن ايتۋلى تەاتر دۋمانىنا ساراپشىلار كەڭەسىنىڭ شەشىمىمەن ىرىكتەلىپ الىنعان بارلىعى 10 سپەكتال قاتىسادى. رەسپۋبليكانىڭ تۇكپىر-تۇكپىرىنەن تاڭدالعان ۇزدىك قويىلىمدار قاتارىندا – س.قوجامقۇلوۆ اتىنداعى جەزقازعان قازاق مۋزىكالى-دراما تەاترىنىڭ «جۇت» (اۆتورى – و.جانايداروۆ), ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ «ويان, قالىڭدىق» (اۆتورى – گ.لوركا), ءا.مامبەتوۆ اتىنداعى مەملەكەتتىك دراما جانە كومەديا تەاترىنىڭ «بوراندى بەكەت» (ش.ايتماتوۆ), ف.دوستوەۆسكي اتىنداعى مەملەكەتتىك سەمەي ورىس دراما تەاترىنىڭ «كىشكەنتاي حانزادا» (ا.ەكزيۋپەري), اقمولا وبلىستىق ورىس دراما تەاترىنىڭ «شاعالا» (ا.چەحوۆ), ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ «التايدان اۋعان ەل» (ح.التاي, ح.ورالتاي), س.سەيفۋللين اتىنداعى قاراعاندى وبلىستىق اكادەميالىق قازاق دراما تەاترىنىڭ «تەكەبۇرقاق» (ش.مۇرتازا), م.گوركي اتىنداعى مەملەكەتتىك اكادەميالىق ورىس دراما تەاترىنىڭ «نايزاعاي» (ا.وستروۆسكي), تۇركىستان مۋزىكالىق دراما تەاترىنىڭ «قورقىت» (ە.امانشاەۆ) جانە رەسپۋبليكالىق اكادەميالىق نەمىس دراما تەاترىنىڭ «اندوررا» (م.فريش) سپەكتاكلدەرى بار.
تەاتر تارتۋى مۇنىمەن تاۋسىلمايدى. فەستيۆال اياسىندا سونداي-اق كورنەكتى تەاتر جانە كينو اكتريساسى, قازاقستاننىڭ مەملەكەتتىك سىيلىعىنىڭ لاۋرەاتى, كسرو حالىق ءارتىسى شولپان يسابەكقىزى جانداربەكوۆانىڭ شىعارماشىلىعىنا ارنالعان دوڭگەلەك ۇستەل, ش.جانداربەكوۆا شىعارماشىلىق عۇمىرىنان سىر شەرتەتىن كورمە, ەرعازى تولەۋدىڭ «شولپان جۇلدىز» اتتى كىتابىنىڭ تۇساۋكەسەرى وتەدى. ساحنا ساڭلاعىنىڭ كوزىن كورگەن تەاتر قايراتكەرلەرى, ءتول شاكىرتتەرى, زيالى قاۋىم وكىلدەرى اڭىز اكتريسا تۋرالى ەستەلىك ايتىپ, تاعىلىمى مول اڭگىمەلەرىن ورتاعا سالادى دەپ كۇتىلۋدە.
ودان بولەك, ايتۋلى ونەر مەيرامى اياسىندا سونىمەن قاتار قازاقستاننىڭ حالىق ءارتىسى قادىر جەتپىسباەۆتىڭ 80 جىلدىعىنا ارنالعان ءىس-شارالار دا جوسپارلانعان. اتاپ ايتساق, 18 قازان كۇنى ساعات 10.00-دە «قاللەكي» تەاترىنىڭ العاشقى قۇرىلۋ جىلدارىندا ۇجىمعا جەتەكشىلىك ەتىپ, رەپەرتۋارىنىڭ قالىپتاسۋىنا وزىندىك ەڭبەگىن سىڭىرگەن قازاقستاننىڭ حالىق ءارتىسى, رەجيسسەر قادىر جەتپىسباەۆتىڭ 80 جىلدىعىنا ارنالعان قوس تومدىق كىتاپتىڭ تۇساۋكەسەرى جانە «بالا مەرگەن» قويىلىمىنىڭ پرەمەراسى وتەدى. التى كۇن بويى ارقا اتىرابىن ونەر دۋمانىمەن دۇبىرلەتەتىن تەاتر مەرەكەسىنىڭ كورەرمەنىنە ۇسىنار تارتۋى مول.