سىرتتاي وقۋعا ارنالعان ماماندىقتار مەن بىلىكتىلىكتەر ءتىزىمى قىسقارتىلدى. وقۋ-اعارتۋ مينيسترلىگىنىڭ حابارلاۋىنشا, قىسقارعان تىزىمنەن كەيىن ەلىمىزدىڭ كوللەدجدەرىندە ستۋدەنتتەر تەك 23 ماماندىق بويىنشا وقي الادى.
سالىستىرمالى تۇردە ايتا كەتسەك, وسىدان ەكى جىلدان استام ۋاقىت بۇرىن 595 بىلىكتىلىك بويىنشا سىرتتاي ءبىلىم الۋعا بولسا, ەندى وقىتۋدىڭ بۇل ءتۇرى ستۋدەنتتەرگە ساپالى ماشىقتاردى, داعدىلاردى بەرە المايدى. ويتكەنى وعان تۇلەكتەر وقۋدى بىتىرگەننەن كەيىن پراكتيكالىق ءبىلىمنىڭ جەتىسپەۋشىلىگىمەن ءجيى كەزدەسىپ, جۇمىس تابا الماي جاتاتىندىعى نەگىز بولعان. وسىعان بايلانىستى مينيسترلىك سىرتتاي وقۋداعى ماماندىقتاردى قىسقارتۋ بويىنشا جۇمىستى كەزەڭ-كەزەڭىمەن جۇرگىزۋدى قولعا الىپ وتىر. اتاپ ايتقاندا, بۇل جولى «راديوەلەكتروندى كولىك قۇرالدارىن پايدالانۋ جانە تەحنيكالىق قىزمەت كورسەتۋ (كولىك ءتۇرى بويىنشا)», «تەحنيك-ەلەكترونيك», «تەحنيك-تەحنولوگ», «پايدالى قازبالاردى وڭدەۋ (كومىر دايىنداۋ)», «تەحنيك-قۇرىلىسشى», «قالالىق كوممۋنيكاتسيالاردى سالۋ جانە پايدالانۋ», «تازالاۋ قۇرىلىستارىنىڭ تەحنولوگى», «سۋمەن جابدىقتاۋ جانە سۋ بۇرۋ جۇيەلەرىن تازارتۋ قۇرىلىستارىن پايدالانۋ» جانە ت.ب. بىلىكتىلىكتەر بويىنشا سىرتتاي وقىتۋ الىنىپ تاستالدى.
«بۇگىنگى تاڭدا قازاقستاندىق كوللەدجدەردە كادرلاردى دايارلاۋدا دۋالدى وقىتۋ ءتۇرى بەلسەندى تۇردە دامىپ كەلەدى. ياعني كادر دايارلاۋدا كوللەدجدەر ءىرى كاسىپورىندارمەن, بيزنەسپەن تىعىز بايلانىستا جۇمىس ىستەيدى. ويتكەنى ولارعا قانداي ماماندار قاجەت ەكەنىن ەڭبەك نارىعى انىقتايدى. سوندىقتان ءبىز سىرتتاي وقۋ تۇرىنەن بەلسەندى تۇردە الشاقتاپ جاتىرمىز جانە مۇنداي شەشىم قابىلداۋعا تۇلەكتەردىڭ وقۋدى بىتىرگەننەن كەيىن الاتىن ءبىلىم مەن داعدىلاردىڭ ساپاسىنىڭ جەتكىلىكسىزدىگى سەبەپ بولدى. ءبىز مۇنى كەزەڭ-كەزەڭىمەن جۇرگىزىپ جاتىرمىز جانە بۇل جۇمىس ءالى دە جالعاسىن تابادى. دۋالدى وقىتۋ كەزىندە وندىرىستىك وقىتۋ مەن كاسىپتىك پراكتيكانىڭ كەمىندە 60%-ى قامتاماسىز ەتىلەتىنىن, وسىلايشا ستۋدەنتتەردىڭ وقۋ ۋاقىتىنىڭ جارتىسىنان كوبى وندىرىستە بولاتىنىن اتاپ وتەمىن. بۇل ءتاسىل بولاشاق تۇلەكتەردىڭ ءبىلىم ساپاسى مەن بىلىكتىلىگىن ارتتىرادى جانە ولاردىڭ ءارى قاراي جۇمىسقا ورنالاسۋىن قامتاماسىز ەتەدى», دەدى وقۋ-اعارتۋ مينيسترلىگى تەحنيكالىق جانە كاسىپتىك ءبىلىم دەپارتامەنتى ديرەكتورىنىڭ مىندەتىن اتقارۋشى ەرنات ءجۇنىسوۆ.