ۇلت مۇراسىن ۇرپاقتان ۇرپاققا جەتكىزۋدى ماقسات ەتكەن قۇرمانعازى اتىنداعى قازاق ۇلتتىق حالىق اسپاپتار وركەسترى 89-ماۋسىمنىڭ شىمىلدىعىن اشىپ, كورەرمەنىمەن قاۋىشتى. جاڭا ماۋسىمنىڭ اشىلۋ سالتاناتىنا مادەنيەت جانە سپورت ۆيتسە-ءمينيسترى نۇرعيسا داۋەشوۆ باستاعان ونەر قايراتكەرلەرى مەن قالا جۇرتشىلىعى قاتىستى.
قارا شاڭىراق ۇلتتىق وركەستردىڭ ماۋسىماشار كونتسەرتىندە ونەر ۇجىمىمەن بىرگە «اۆانتي» تەنورلار تريوسى, اسەل راقىمجان, ارۋجان تولەپبەرگەن, ءازيزا ابدىرەيىم, مادينا ەرلانوۆا سىندى جەكە ورىنداۋشىلار ءان ايتىپ, جاڭالىققا تولى جاڭا ماۋسىمنىڭ العاشقى كەشىن باستادى.
ايتا كەتەيىك, قازاقستاننىڭ اسپاپتىق مۋزىكالىق ونەر تاريحىنداعى تۇڭعىش وركەستردىڭ جاڭا ماۋسىمداعى جاڭالىعى كوپ. سونىڭ ىشىندە اۋقىمدى جوسپارلارعا توقتالساق, قالي جانتىلەۋوۆتىڭ 120 جىلدىعى, قۇرمانعازى وركەسترىن الەمگە ايگىلى ەتكەن كاسىبي ديريجەر شامعون قاجىعاليەۆتىڭ 95 جىلدىق مەرەيتويى, رەسپۋبليكالىق «شەرتپە كۇي» فەستيۆالىنىڭ ۇيىمداستىرىلۋى بولماق.
قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ديرەكتورى مەدەت قۋانىشەۆ كەزەكتى ماۋسىمنىڭ شىعارماشىلىق تىنىسىنا توقتالدى. «ۇلتتىق وركەستر بولعاندىقتان ءار جىل سايىن جاڭا ماۋسىمدى ەرەكشە دايىندىقپەن باستايمىز. ماۋسىماشار كونتسەرت ءبىز ءۇشىن ۇلكەن مەرەكە دەسەك تە بولادى. جاڭا جوسپارلار, جاڭا لەپ, جاڭا تولقىنمەن وركەستردى تاعى ءبىر بيىككە كوتەرۋ ءۇشىن قادام باسامىز. سونداي-اق ماۋسىمنىڭ اشىلۋىنا مادەنيەت جانە سپورت ۆيتسە-ءمينيسترى نۇرعيسا داۋەشوۆ باستاعان ءبىر توپ ونەر قايراتكەرلەرى كەلدى. ماۋسىماشار كونتسەرتىمىزگە كەلىپ, قولداۋ كورسەتكەن بارشا قوناقتارىمىزعا ەرەكشە العىسىمدى بىلدىرەمىن. ايتا كەتەتىنى, ءبىز ءوز كورەرمەندەرىمىز بەن ونەرسۇيەر قاۋىمدى قۋانتۋ ءۇشىن جاڭا شىعارمالاردى دۇنيەگە اكەلۋدەن تالمايمىز», دەدى.
ال اتالعان ونەر ۇجىمىنىڭ باس ديريجەرى ابىلاي تىلەپبەرگەن الداعى فەستيۆالدىڭ رەسپۋبليكالىق ماڭىزىن اتاپ ءوتتى. «جاڭا ماۋسىم ءىرى جاڭالىقتارعا تولى بولادى دەپ ۇلكەن سەنىمدىلىكپەن ايتا الامىن. جاڭا ماۋسىمنىڭ باستى وقيعالارى – قۇرمانعازى وركەسترىنە ەلەۋلى ەڭبەگى سىڭگەن تۇلعالاردىڭ مەرەيتويلارىمەن قاتار «شەرتپە كۇي» رەسپۋبليكالىق فەستيۆالى بولادى. فەستيۆال-كونكۋرس ارقىلى قازاق جەرىنىڭ تۇكپىر-تۇكپىرىندەگى ۇلكەندى-كىشىلى ەلدى-مەكەندەردەگى شىن تالانتتاردى بايگەگە قوسىپ, ۇزدىگىن انىقتايمىز دەگەن ويدامىن. ماۋسىمنىڭ اشىلۋى تەك وركەستردىڭ عانا ەمەس, وركەستر كورەرمەندەرىنىڭ دە ۇلكەن قۋانىشى دەپ بىلەمىن», دەدى باس ديريجەر.