2022 جىلدىڭ 9 ايىندا قازاقستاندىقتارعا 2,2 ترلن تەڭگەدەن استام سوماعا زەينەتاقى تولەندى. قىركۇيەك ايىندا رەسپۋبليكالىق بيۋدجەتتەن زەينەتاقى تولەمدەرىنە 244,8 ملرد تەڭگە, ونىڭ ىشىندە بازالىق زەينەتاقى تولەۋگە – 74,5 ملرد تەڭگە, ىنتىماقتى زەينەتاقى تولەۋگە – 170,3 ملرد تەڭگە باعىتتالدى, دەپ حابارلايدى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
2022 جىلعى 1 قازانداعى جاعداي بويىنشا زەينەتكەرلەر سانى 2 ملن 261 مىڭ ادامدى قۇرايدى.
2022 جىلعى 1 قازانداعى جاعداي بويىنشا زەينەتاقى تولەمدەرىنىڭ ورتاشا مولشەرى (بازالىق زەينەتاقى تولەمىن ەسكەرە وتىرىپ) 109 171 تەڭگەنى قۇرادى.
ەسكە سالا كەتسەك, 2018 جىلدىڭ 1 شىلدەسىنەن باستاپ مەملەكەتتىك بازالىق زەينەتاقى تولەمى زەينەتاقى جۇيەسىنە قاتىسۋ ءوتىلىن ەسكەرە وتىرىپ, ءاربىر الۋشىعا جەكە تاعايىندالادى.
بۇل رەتتە زەينەتاقى جۇيەسىنە قاتىسۋ وتىلىنە 1998 جىلعى 1 قاڭتارعا ارنالعان ىنتىماقتى جۇيەدە ازىرلەنگەن ەڭبەك ءوتىلى, سونداي-اق مىندەتتى زەينەتاقى جارنالارى (مزج) تولەنگەن كەزەڭدەر ەنگىزىلەدى.
ماسەلەن, ەگەر زەينەتاقى جۇيەسىنە قاتىسۋ ءوتىلى 10 جىل نەمەسە ودان از بولسا, بازالىق زەينەتاقى مولشەرى ەڭ تومەنگى كۇنكورىس دەڭگەيىنىڭ 54%-نا تەڭ بولسا, بۇدان ءارى ءاربىر جىل ءۇشىن 10 جىلدان استام ونىڭ مولشەرى 2%-عا ۇلعايادى. مىسالى, قاتىسۋ ءوتىلى 20 جىل بولعاندا بازالىق زەينەتاقى ەڭ تومەنگى كۇنكورىس دەڭگەيىنىڭ 74%, 30 جىل - ەڭ تومەنگى كۇنكورىس دەڭگەيىنىڭ 94%-دى قۇرايدى. 33 جانە ودان دا كوپ جىل ءوتىلى كەزىندە ول ەڭ جوعارى مولشەردە-ەڭ تومەنگى كۇنكورىس دەڭگەيىنىڭ 100% بەلگىلەنەدى.
ەگەر ءبىر ايدا بىرىڭعاي جيناقتاۋشى زەينەتاقى قورىنا مزج بىرنەشە رەت اۋدارىلسا, جيناقتاۋشى جۇيەگە قاتىسۋ كەزەڭى ءبىر ايدى قۇرايدى.
وسىلايشا, مىندەتتى زەينەتاقى جارنالارى نەعۇرلىم تۇراقتى جانە تولىق تولەنسە, زەينەتكەرلىك جاسقا جەتكەندە بازالىق زەينەتاقى تولەمىنىڭ مولشەرى سوعۇرلىم كوپ بولادى.
ءوز كەزەگىندە جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جاعداي بويىنشا ەڭبەك وتىلىنە (كەمىندە 6 اي قاجەت) جانە زەينەتاقى الدىنداعى كەزەڭدە الىنعان ورتاشا ايلىق تابىسقا بايلانىستى بولادى.