قازاقستان پرەزيدەنتى قاسىم-جومارت توقاەۆ جۇما كۇنى ورتالىق ازيا ەلدەرىن شەشىلمەگەن دەليميتاتسياعا بايلانىستى شەكارا داۋىن تەك بەيبىت جولمەن شەشۋگە شاقىردى. ويتكەنى كەزدەيسوق قاقتىعىستار وڭىردەگى احۋالعا تەرىس اسەر ەتەدى.
«تۇراقسىزداندىراتىن فاكتور – ايماقتاعى جەكەلەگەن ەلدەر اراسىنداعى شەكارا ماسەلەسىنىڭ شەشىلمەۋى. شەكارا ماسەلەسىن شەشۋ تەك قانا دوستىق, سەنىم جانە تاتۋ كورشىلىك رۋحىندا, سونداي-اق حالىقارالىق قۇقىقتىڭ ىرگەلى قاعيداتتارى مەن بۇۇ جارعىسىن قاتاڭ ساقتاۋ ارقىلى بەيبىت جولمەن جۇزەگە اسۋعا ءتيىس», دەدى قازاقستان پرەزيدەنتى.
قازاقستان باسشىسى بۇل ماسەلەنى شەشۋ ءۇشىن ايماقتىق ساراپشىلار الاڭىن قۇرۋ ءتيىمدى دەپ سانايدى. ايتا كەتەرلىگى, ايماقتاعى سوڭعى شەكارالىق قاقتىعىس قىركۇيەك ايىندا قىرعىزستان مەن تاجىكستان اراسىندا بولىپ, 100-گە جۋىق ادام قازا تاپتى. بۇل كەيىنگى جىلدارداعى ەڭ اۋىر قارۋلى وقيعا. وعان دەيىن 2021 جىلدىڭ ساۋىرىندەگى قاقتىعىستا 43 ادام قازا تاپقان ەدى.
جۇما كۇنى «رەسەي-ورتالىق ازيا» سامميتىنە بىرنەشە ساعات بۇرىن تمد سامميتىندە قىرعىزستان باسشىسى اليانسقا قاتىسۋشى بۇرىنعى كەڭەستىك توعىز ەلدى مۇشە مەملەكەتتەردىڭ اۋماقتىق تۇتاستىعىن قۇرمەتتەۋگە شاقىردى.