البەتتە, قازاقستاندا ترانزيتتىك الەۋەت ماسەلەسى بۇرىننان كۇن تارتىبىندە بار, بىراق سوڭعى بىرنەشە ايدا مەملەكەت وسى باعىتتاعى الەۋەتكە ايرىقشا كوڭىل اۋداردى. بۇرىن بار مارشرۋتپەن بازار بولىپ كەلسەك, ەندى باعىتتاردى ءارتاراپتاندىرۋدىڭ ماڭىزدى ەكەنىن تۇسىندىك. وسى ورايدا ءبىز ءۇشىن تەمىرجول ينفراقۇرىلىمىن دامىتا ءتۇسۋ ماڭىزدى.
يندۋستريا جانە ينفراقۇرىلىمدىق دامۋ ۆيتسە-ءمينيسترى الماز ىدىرىسوۆتىڭ ايتۋىنشا, ەلىمىزدە لوگيستيكانى دامىتۋ باعىتىندا بىرقاتار ينفراقۇرىلىمدىق جوبالار دايىندالىپ جاتىر.
ء«بىزدىڭ ءىرى جوبامىز – دوستىق – مويىنتى. ءبىز وعان ۇلكەن ءمان بەرىپ وتىرمىز. سونداي-اق الماتى قالاسىن اينالىپ وتەتىن تەمىرجول جەلىسى, داربازا – ماقتاارال تەمىرجول جەلىسى, اقتاۋ تەڭىز پورتى تەرريتورياسىندا ترانسپورتتىق-لوگيستيكالىق حابتى قۇرۋ جۇمىستارى جانە اقتاۋ پورتىندا تەرمينال قۋاتتىلىعىن كەڭەيتۋ جۇمىستارى اتقارىلۋدا. مۇنىڭ ءبارى لوگيستيكالىق تاسىمالدى دامىتۋعا ۇلكەن سەرپىن سىيلايدى», دەدى الماز ىدىرىسوۆ تاياۋدا وتكەن New Silk Way فورۋمىندا.
ۆەدومستۆو وكىلىنىڭ سوزىنە قاراعاندا, كونتەينەرلىك حاب قۇرۋعا 10,4 ملرد تەڭگە ءبولۋ قاراستىرىلىپ وتىر. بۇل جۇمىس «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى اياسىندا جۇزەگە اسپاق. ەگەر جوبا ءساتتى جۇزەگە اسسا 2025 جىلعا قاراي كونتەينەر تاسىمالى اعىنى 40 مىڭنان 133 مىڭ فۋتتىق ەكۆيۆالەنتكە دەيىن ارتپاق.
ونىڭ ايتۋىنشا, قازىر مەملەكەت ەرەكشە نازار اۋدارىپ وتىرعان باعىت – حالىقارالىق ترانسكاسپي مارشرۋتى. اتالعان مارشرۋت قىتاي مەن قازاقستاندى, كاسپي تەڭىزى اكۆاتورياسىن, ازەربايجان مەن گرۋزيانى كەسىپ ءوتىپ, ءارى قاراي تۇركيا مەن ەۋروپا ەلدەرىنە باعىت الادى. ۆيتسە-مينيستر ايتىپ وتكەن دوستىق – مويىنتى, داربازا – ماقتاارال تەمىرجول جەلىلەرىنىڭ دە وسى ترانسكاسپي مارشرۋتىنا قاتىسى بار ەكەنىن ايتا كەتەيىك. سونىمەن بىرگە قىتايمەن شەكارادا «باقتى» وتكىزۋ بەكەتى دە جۇمىسىن باستاماق.
PTC Holding جشس باسقارما توراعاسى تيمۋر قاراباەۆتىڭ ايتۋىنشا, كونتەينەرلىك جانە مۋلتيمودالدىق تاسىمالدى دامىتۋ ەلدەگى ترانسپورت سالاسىنىڭ دامۋىندا باستى ترەندكە اينالماق.
«قازىر بۇكىل الەمدە كونتەينەرلىك تاسىمال ەڭ تانىمال, ەڭ سەنىمدى جەتكىزۋ تۇرىنە اينالدى. حالىقارالىق نارىقتاعى بۇل تاسىمالدىڭ ۇلەسى 90 پايىزعا جەتىپ وتىر. قازاقستانداعى كونتەينەرلىك تاسىمال كولەمى جىل سايىن ءوسىپ جاتىر. ماسەلەن, بىلتىر بۇل كورسەتكىش 22 پايىزعا ارتتى. الايدا سالا دامۋىن تەجەپ تۇرعان فاكتورلار بار. بۇل – تاريف ماسەلەسى. قازاقستاندا كونتەينەرمەن ءبىر توننا جۇك تاسىمالداۋ قۇنى وزگە ەلدەر باعاسىنان 2,5-3 ەسە جوعارى. جاقىن كورشىلەرىمىزدىڭ تاجىريبەسى كورسەتكەندەي, كونتەينەرلىك تاسىمال ءتيىمدى بولاتىن تاريفتەرگە نەگىزدەلگەن كوزقاراس جۇك تاسىمالداۋ كولەمىن كۇرت ارتتىرۋعا مۇمكىندىك بەردى. ال بۇگىندە ءبىز يندۋستريالاندىرۋ جولىمەن ءجۇرىپ, قازاقستاندىق وندىرۋشىلەر مەن ەكسپورتتاۋشىلاردى قولداۋ تۋرالى ايتاتىن بولساق, وندا ءبىز ترانسپورت سالاسىنىڭ وكىلدەرى رەتىندە تاۋارلاردى جەتكىزۋدىڭ بارىنشا كوپ نۇسقالارىن ۇسىنۋ ارقىلى ولارعا كوبىرەك مۇمكىندىكتەر بەرۋىمىز كەرەك», دەيدى ت.قاراباەۆ.
يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆتىڭ ايتۋىنشا, اقتاۋدا كونتەينەرلىك حاب قۇرۋ جانە ترانسكاسپي ءدالىزىن دامىتۋ سياقتى ءىرى جوبالار PSA, Abu Dhabi Ports, Adani Group, CMA CGM, Maersk سىندى الەۋەتتى ينۆەستورمەن بىرلەسكەن كاسىپورىن فورماتىندا ىسكە اسىرىلماق.
«سونداي-اق «قازاقستان تەمىر جولى» ۇلتتىق كومپانياسىن تولىق كولىك-لوگيستيكالىق كورپوراتسياعا اينالدىرۋ مودەلىن قالىپتاستىرۋ بويىنشا جۇمىس جۇرگىزىلۋدە. قتج-نىڭ ترانسفورماتسياسىن الەمدىك كولىك-لوگيستيكالىق كومپانيالارمەن (PSA, DBShenker, CoscoShipping, DPWorld جانە ت.ب.) كووپەراتسيا, كولىك دالىزدەرىن تسيفرلاندىرۋ جانە سىرتقى تەرمينالدىق جەلىلەردى قۇرۋ سياقتى باعىتتار بويىنشا جۇزەگە اسىرۋ ۇسىنىلادى», دەدى مينيستر.