سىبايلاس جەمقورلىققا قارسى قىزمەت الەۋمەتتىك-كاسىپكەرلىك كورپوراتسيالاردىڭ (اكك) قىزمەتكەرلەرىنە قاتىستى جەر ۋچاسكەلەرىن بەرۋ كەزىندە لاۋازىمدىق وكىلەتتىكتەردى تەرىس پايدالانۋ فاكتىلەرى بويىنشا 10 سوتقا دەيىنگى تەرگەپ-تەكسەرۋ باستالدى, دەپ حابارلايدى Egemen.kz اگەنتتىككە سىلتەمە جاساپ.
تەكسەرۋلەر باسەكەلەستىكتى قورعاۋ جانە دامىتۋ اگەنتتىگىنىڭ ۇسىنىلعان ماتەريالدارى بويىنشا جۇرگىزىلۋدە.
استانا قالاسىندا, جامبىل, قاراعاندى جانە سولتۇستىك قازاقستان وبلىستارىندا سوتقا دەيىنگى تەرگەپ-تەكسەرۋ بارىسىندا 65 جەر ۋچاسكەسى بەلگىلەندى.
ولاردى جەرگىلىكتى اتقارۋشى ورگاندار «Astana», «تاراز», «سارىارقا» جانە «سولتۇستىك» اكك ينۆەستيتسيالىق جوبالار ءۇشىن بەرگەن.
بۇل رەتتە اكك باسىم قىزمەت تۇرلەرىنىڭ تىزبەسىنە ەنگىزىلگەن ينۆەستيتسيالىق ەمەس جوبالاردى ىسكە اسىرۋ ءۇشىن جەر جانە كاسىپكەرلىك كودەكستەردىڭ تالاپتارىن بۇزا وتىرىپ, زاڭدى تۇلعالارعا جەر ۋچاسكەلەرىن راسىمدەگەن.
مىسالى, قاراعاندى وبلىسىندا 2019-2021 جىلدار ارالىعىندا قاراعاندى, بالقاش, جەزقازعان جانە ساتباەۆ قالالارىنىڭ اكىمدىكتەرى «سارىارقا» اكك-نا 36 جەر ۋچاسكەسىن بەرىپ, ونىڭ 14-ءى كاسىپكەرلىك كودەكسىنىڭ نورمالارىن جانە قالالاردىڭ باس جوسپارىن بۇزا وتىرىپ بەرىلگەن.
سولتۇستىك قازاقستان وبلىسىندا پەتروپاۆل قالاسى اكىمدىگىنىڭ قاۋلىلارى نەگىزىندە «سولتۇستىك» اكك ءۇشىن 6 جەر ۋچاسكەسى بەرىلدى. ودان كەيىن ولار ساۋدا-ساتتىقسىز قۇرىلىس سالۋشىلارعا بەرىلدى. استانا قالاسى مەن جامبىل وبلىسىندا وسىعان ۇقساس بۇزۋشىلىقتارمەن سايكەسىنشە 8 جانە 5 ۋچاسكە بەرگەن. سىبايلاس جەمقورلىققا قارسى قىزمەتتىڭ اۋماقتىق دەپارتامەنتتەرىنىڭ ۇسىنىسى بويىنشا اكىمدىكتەر زاڭسىز بەرىلگەن 33 جەر ۋچاسكەسىن مەملەكەت مەنشىگىنە قايتارعان. وسىلايشا, قابىلدانعان شارالار مەملەكەتتىڭ زاڭمەن قورعالاتىن مۇددەلەرىنە زيان كەلتىرۋدىڭ الدىن الدى.