سەنات توراعاسى ماۋلەن اشىمباەۆ ۇلىبريتانيا كورولدىگى مەن سولتۇستىك يرلانديانىڭ قازاقستان رەسپۋبليكاسىنداعى ەلشىسى كەترين دجەين ليچپەن كەزدەستى, دەپ حابارلايدى Egemen.kz.
كەزدەسۋدى اشقان ماۋلەن اشىمباەۆ ۇزاق جىلدار بويى تۋعان حالقىنا ادال قىزمەت ەتۋدىڭ وزىق ۇلگىسىن كورسەتكەن ۇلىبريتانيا پاتشايىمى ءىى ەليزاۆەتانىڭ قازاسىنا بايلانىستى تاعى دا كوڭىل ايتتى.
سەنات سپيكەرى الەمدىك جانە ءداستۇرلى دىندەر ليدەرلەرىنىڭ VII سەزىنە انگليكان شىركەۋىنىڭ بىرقاتار ەپيسكوپى قاتىسقانىن نازارعا الىپ, فورۋمعا قولداۋ كورسەتكەنى ءۇشىن ۇلىبريتانياعا العىسىن ءبىلدىردى.
ودان بولەك, كەزدەسۋ بارىسىندا سەنات توراعاسى قازاقستان مەن ۇلىبريتانيا اراسىندا ديپلوماتيالىق قاتىناستىڭ ورناعانىنا 30 جىل تولعانىن, وسى ۋاقىت ىشىندە ءتۇرلى سالالاردا ەكىجاقتى ىنتىماقتاستىقتى نىعايتۋعا باعىتتالعان بىرلەسكەن جوبالار مەن باعدارلامالار تابىستى ىسكە اسىرىلعانىن اتاپ ءوتتى.
«بيىل بىزدە قازاقستان مەن ۇلىبريتانيا اراسىنداعى ديپلوماتيالىق بايلانىستىڭ ورناعانىنا 30 جىل تولادى. بۇل – ماڭىزدى كەزەڭ. وسى جىلدار ىشىندە ەكىجاقتى ىنتىماقتاستىعىمىز ستراتەگيالىق سەرىكتەستىك دەڭگەيىنە كوتەرىلدى. ءوزارا قارىم-قاتىناستىڭ ءتيىمدى تەتىگى قالىپتاستى. الداعى ۋاقىتتا ءبىز پارلامەنتارالىق بايلانىسىمىزدى ارتتىرۋعا جانە ونى تەرەڭدەتۋگە مۇددەلىمىز», دەدى ماۋلەن اشىمباەۆ.
سەنات توراعاسى مەملەكەت باسشىسىنىڭ باستاماسىمەن قازاقستاندا جۇرگىزىلىپ جاتقان ساياسي, الەۋمەتتىك-ەكونوميكالىق رەفورمالار تۋرالى ايتتى. ماۋلەن اشىمباەۆ ەلىمىزدىڭ ساياسي جۇيەسىن دەموكراتيالاندىرۋعا جانە پرەزيدەنت جولداۋىنداعى جاڭا باستامالارعا كەڭىنەن توقتالىپ, قولعا الىنعان وزگەرىستەردىڭ ستراتەگيالىق سيپاتىنا نازار اۋداردى.
ءوز كەزەگىندە كەترين ليچ قازاقستاندا جۇرگىزىلىپ جاتقان رەفورمالاردىڭ ماڭىزدىلىعىن, ەل پرەزيدەنتىنىڭ ولاردى ىسكە اسىرۋداعى جۇيەلى ءتاسىلىن اتاپ ءوتتى. سونداي-اق ەلشى پارلامەنت سەناتىمەن ەكىجاقتى ىنتىماقتاستىقتىڭ كەڭ اۋقىمدى ماسەلەلەرى بويىنشا ءوزارا بايلانىستى كەڭەيتۋگە ەرەكشە قىزىعۋشىلىق تانىتتى.