قىزىلوردادا «قازمۇنايگاز» ۇلتتىق كومپانياسى» اق كومپانيالار توبىنىڭ جۇمىسشىلارى اراسىندا ءداستۇرلى «ۇزدىك مامان» بايقاۋى ءوتتى. وندا ءوز ماماندىعى بويىنشا ۇزدىكتەر انىقتالدى.
قىزىلورداعا اتىراۋ, ماڭعىستاۋ, اقتوبە, پاۆلودار وبلىستارىنىڭ, شىمكەنت قالاسىنىڭ مۇناي-گاز سالاسىنداعى 17 جەتەكشى كاسىپورنىنان 119 قاتىسۋشى جينالدى. بايقاۋدىڭ سوڭعى كەزەڭىنە وتكەن قاتىسۋشىلار – وسىعان دەيىن ءوز ۇيىمدارىندا ىرىكتەۋ كەزەڭدەرىندە جەڭىسكە جەتكەن ۇزدىكتەر. جارىس مۇناي-گاز وندىرىسىندە قىزمەت ەتەتىن وننان استام ماماندىق يەلەرىنىڭ اراسىندا ءوتتى. اتاپ ايتقاندا, مۇناي جانە گاز ءوندىرۋ وپەراتورى, ۇڭعىمالاردى زەرتتەۋ وپەراتورى, تاۋار وپەراتورى, قابات قىسىمىن ۇستاۋ وپەراتورى, تەحنولوگيالىق جابدىقتاردى جوندەۋ جانە قىزمەت كورسەتۋ سلەسارى, ەلەكتر گازبەن دانەكەرلەۋشى, ەلەكتر قۇرالدارىن جوندەۋ جانە قىزمەت كورسەتۋ ەلەكتر جوندەۋشىسى, حيميالىق تالداۋ زەرتحاناشىسى, تەحنولوگيالىق قوندىرعىلار وپەراتورى, كومپرەسسورلىق قوندىرعىلار ءماشينيسى, ۇڭعىمالاردى كۇردەلى جوندەۋ بريگادالارى مەن ۇڭعىمالاردى جەراستى جوندەۋ بريگادالارى سەكىلدى قاراپايىم جۇمىسشىلار جينالدى.
پرەزيدەنت قاسىم-جومارت توقاەۆتىڭ حالىققا ارناعان جولداۋىنداعى «ەلىمىزدە ەڭبەكقور ادام, كاسىبي مامان ەڭ سىيلى ادام بولۋعا ءتيىس. وسىنداي ازاماتتار مەملەكەتىمىزدى دامىتادى. ءبىز قاراپايىم ەڭبەك ادامىنا قۇرمەت كورسەتۋىمىز كەرەك» دەگەن سوزدەرى قىزىلوردادا وتكەن ءداستۇرلى جارىستىڭ ماقساتىن ايقىنداي تۇسكەندەي. ويتكەنى ۇيىمداستىرۋشىلاردىڭ ايتۋىنشا, بايقاۋ سالاداعى وزىق تاجىريبەلى مامانداردى انىقتاۋ ارقىلى مۇناي-گاز سالاسىنداعى جۇمىسشى كاسىپتەرىنىڭ بەدەلىن ارتتىرۋعا, مامانداردى ىنتالاندىرۋعا جانە ءوزارا تاجىريبە الماسۋعا باعىتتالعان.
حيميالىق تالداۋ لابورانتى ماماندارىنىڭ اراسىندا 3-ورىندى يەلەنگەن لاۋرا مۇراتقىزى قىزىلوردالىق «قازگەرمۇناي» كومپانياسىنىڭ اتىنان جارىسقا ءتۇستى. «اقشابۇلاق» كەن ورنىنىڭ حيميالىق تالداۋ لابورانتى بايقاۋعا وسىمەن ەكىنىشى رەت قاتىسقان. «2019 جىلى قازان قالاسىندا وتكەن جارىستا 1-ورىن الىپ, ۇزدىك مامان اتانعانمىن. سايىستا كۇندەلىكتى ورىنداپ جۇرگەن تاپسىرمالار بولعانىمەن, قوبالجۋ بولادى. سول تولقۋدى باسىپ, پراكتيكالىق سىناقتان ءساتتى ءوتۋ ماڭىزدى», دەيدى ول.
قاتىسۋشىلار ەكى كەزەڭنەن تۇراتىن سىناقتان مۇدىرمەي ءوتۋى كەرەك. ءبىرىنشى كەزەڭدە مامانداردىڭ تەوريالىق ءبىلىمى تەكسەرىلەدى, ال ەكىنشى كەزەڭدە تاجىريبەدە سىنالدى. وسى كەزەڭدە ونەركاسىپتە كوپ جىلدىق تاجىريبەسى بار ءتىس قاققان مامانداردىڭ ءوزى قوبالجيتىنىن ايتتى. قازىلار القاسى ءار قاتىسۋشىنىڭ بەلگىلەنگەن ۋاقىتتا تاپسىرمانى تەحنيكالىق قاۋىپسىزدىك ەرەجەلەرىن ساقتاي وتىرىپ, ءتيىمدى ءارى ءونىمدى ورىنداۋىن باعالايدى.
جارىسقا العاش كەلگەن قاتىسۋشىلار بايقاۋدىڭ اۋقىمىنا تاڭعالعانىن جاسىرمادى. KazakhOil Aktobe كومپانياسىنىڭ تەحنولوگيالىق جابدىقتار وپەراتورى نۇرلىبەك زاحاروۆ كەلەسى جىلى تىڭعىلىقتى دايىندىقپەن كەلۋگە ۋادە بەردى. «بايقاۋعا العاش رەت قاتىستىم. جارىستى وسىنداي اۋقىمدى بولادى دەپ كۇتپەدىم. وزىمە كوڭىلىم تولماسا دا, بايقاۋعا كەلىپ, تاجىريبە جينادىم. ەڭ باستىسى, قىزىلوردادان ۇلكەن ىنتامەن كەتىپ بارامىن. كەلەسى جارىسقا بۇدان دا جاقسى دايىندالامىن دەپ ۇمىتتەنەمىن. وزگە ارىپتەستەرىمە دە كومەكتەسۋگە دايىنمىن», دەيدى اقتوبەلىك مامان.
بايقاۋ ناتيجەسىندە 13 اتالىم بويىنشا جەڭىمپازدار مەن جۇلدەگەرلەر ماراپاتتالدى. «قاراجانباسمۇناي», «قازگەرمۇناي», «قازترانسويل» جانە «ەمبىمۇنايگاز» كومپانيالارىنىڭ قىزمەتكەرلەرى جوعارى ناتيجە كورسەتىپ, ۇزدىك اتاندى. سونداي-اق «ماڭعىستاۋمۇنايگاز», «وزەنمۇنايگاز», Oil Construction Company, «وزەنمۇنايسەرۆيس», Oil Services Company, CASPI BITUM, پاۆلودار مۇناي حيميا زاۋىتى, شىمكەنت جانە اتىراۋ مۇناي وڭدەۋ زاۋىتتارىنىڭ ماماندارى جۇلدەلى ورىندارعا يە بولدى.