مەملەكەت باسشىسى قاسىم-جومارت توقاەۆ جۇمىس ساپارىمەن ەلىمىزدىڭ بىرنەشە وڭىرىنە ات باسىن تىرەدى. ناقتىراق ايتساق, پرەزيدەنت تۇركىستان, شىمكەنت, اباي, قاراعاندى وبلىستارىنىڭ جۇرتشىلىعىمەن كەزدەسىپ, حالىقتىڭ تىنىس-تىرشىلىگىمەن تانىس بولدى.
العاشقى جۇمىسىن كيەلى شاھار تۇركىستانداعى قوجا احمەت ياساۋي كەسەنەسىن زيارات ەتۋمەن باستاعان قاسىم-جومارت كەمەل ۇلى بۇل جولى دا بابالار رۋحىنا قۇران باعىشتاپ, قوجا احمەت ياساۋي كەسەنەسى رۋحانياتىمىزدىڭ مىزعىماس دىڭگەگى ەكەندىگىن اتاپ ءوتتى. پرەزيدەنتتىڭ كيەلى شاھارعا رۋحاني جانە تاريحي ەلوردا مارتەبەسىن بەرۋ تۋرالى باستاماسى تۇركىستانعا ىقىلاسى ەرەكشە ەكەنىنىڭ ايقىن دالەلى. مەملەكەت باسشىسى سونىمەن قاتار الەمدە بولىپ جاتقان وزگەرىستەر تۋرالى ايتىپ, رەسەيدەن كەلىپ جاتقان كوش تۋرالى دا باياندادى. بۇل تۇرعىدا ازاماتتاردىڭ بەيتاراپتىق پوزيتسياسىن ۇستانۋ قاجەت ەكەندىگىن ەسكەرتتى. بۇل ەلىمىزدىڭ قاۋىپسىزدىگى مەن تۇتاستىعىن قامتاماسىز ەتەرى انىق.
قازاقىلىقتىڭ قايماعى اتانعان شىرايلى شاھار شىمكەنت جۇرتشىلىعىمەن باس قوسقان جيىندا قاسىم-جومارت كەمەل ۇلى ستاديونداعى توتەنشە جاعداي كەزىندە ەلىمىزدىڭ تۋىن امان الىپ قالعان وقيعانى ەسكە الىپ, بۇل ءىستى اتقارعان جىگىتتەرگە العىسىن ايتتى. ەرەكشە جىلىلىقپەن ەرەكشەلەنگەن ميلليوندى قالانىڭ تۇرعىندارىن رۋحاني جومارت دەپ اتاعانى تاعى بار. بۇل سالت-ءداستۇر تولىق ساقتالعان وڭتۇستىك وڭىرلەرىنە بەرىلگەن ۇلكەن مارتەبە دەسەم, ارتىق بولماس.
قازاق ادەبيەتى مەن تاريحىندا ەسىمى التىن ارىپتەرمەن جازىلعان اباي قۇنانباي ۇلىنىڭ اتىمەن اتالعان اباي وبلىسىنا بۇل مەملەكەت باسشىسىنىڭ جاساعان العاشقى ساپارى. ءوڭىردىڭ بىرقاتار مادەني-ءبىلىم بەرۋ وشاعىندا بولعان پرەزيدەنت حالقىمىزدىڭ بىرەگەي تۇلعالارى – مۇحتار اۋەزوۆ پەن قايىم مۇحامەدحانوۆ ەسكەرتكىشىنىڭ اشىلۋ سالتاناتىنا قاتىستى. وتكەنگە تاعزىم, حاكىم ابايدى ۇلىقتاۋ – بارشامىزدىڭ پەرزەنتتىك پارىزىمىز ەكەندىگىن اتاپ ءوتتى. اقىن ولەڭدەرىن تىلگە تيەك ەتىپ, ادامزات دامۋىنا كەدەرگى بولعان بەس دۇشپاندى جەڭسەك قانا قوعامدىق سانانى جاڭعىرتاتىنىمىزدى ايتتى.
قازىنالى قاراعاندىعا بارىپ, وبلىس جۇرتشىلىعىمەن كەزدەسكەن مەملەكەت باسشاسى ءوڭىردى ءاليحان بوكەيحان, جاقىپ اقباەۆ, ءالىمحان ەرمەكوۆ سياقتى الاش ارىستارى دۇنيەگە كەلگەن قاسيەتتى جەر, دەدى ءوز سوزىندە. ونەركاسىپ سالاسى ىلگەرىلەپ تۇرعانىن اتاپ, ءوندىرىستىڭ جالپى كولەمىندە وڭدەۋ سەكتورىنىڭ ۇلەسى 80 پايىزدى قۇراپ وتىرعانىنا توقتالدى.
جالپى, قازاستان جەرى كەڭ-بايتاق ءارى ءار ءوڭىردىڭ وزىنە ءتان ەرەكشەلىگى مەن ماڭىزى بار. دامۋدىڭ داڭعىل جولىنا تۇسكەن مەملەكەتىمىز ءۇشىن الداعى پرەزيدەنت سايلاۋ ۇلكەن جاۋاپكەرشىلىكتى ارقالاعان تاريحي كەزەڭ بولعالى تۇر. پرەزيدەنت قاسىم-جومارت كەمەل ۇلىنىڭ ساياسي كوشباسشى رەتىندە قازاقستان حالقى ءۇشىن باستاعان يگى باستامالارى ەلىمىزدىڭ وركەندەۋى جولىنداعى شامشىراق ىسپەتتەس. ال ءبىزدىڭ بورىشىمىز ەگەمەندىگىمىزدى كوز قاراشىعىنداي ساقتاپ, ونى كەلەر ۇرپاققا اماناتتاۋ. بۇل ورايدا «جۇمىلا كوتەرگەن جۇك جەڭىل» دەمەكشى, ەلدەگى قولعا الىنعان رەفورمالاردى قولداپ, جۇزەگە اسۋىنا ءبىر كىسىدەي اتسالىسايىق.
فاحريددين قاراتاەۆ,
ءماجىلىس دەپۋتاتى,
«Amanat» فراكتسياسىنىڭ مۇشەسى