بارىنەن دە بيىك باقىت

ءبىرىن ەسكەرەمىز, ءبىرىن ەسكەرمەيمىز, جىل سايىن بالالارعا قاتىستى قانشا­ما قۇقىق بۇزۋشىلىق, قىلمىس, وقىس وقيعالار بولىپ جاتادى. شىن مانىن­دە, سونىڭ بارلىعى تەرەڭ زەردەلەۋدى, تەگەۋرىندى ءتارتىپتى قاجەت ەتەدى. بۇگىن بالاعا ءمان بەرمەۋ – ەلىنىڭ ەرتەڭىنە توڭتەرىس قاراۋمەن بىردەي. مەملەكەت باسشىسى ءوزىنىڭ جاڭاجىلدىق قۇتتىق­تاۋىندا بالالارعا ەرەكشە كوڭىل ءبولۋ كەرەك ەكەنىن ايتتى. «ولاردىڭ ءال-اۋقاتى – مەملەكەتىمىزدىڭ تابىستى بولا­شاعىنىڭ سەنىمدى كەپىلى. سوندىقتان وسى جىلدى بالالار جىلى دەپ جاريالاۋ كەرەك دەپ ەسەپتەيمىن» دەگەن پرەزيدەنت بۇل جەردە اڭگىمە ۇراندار مەن مەرەكەلىك ءىس-شارالار تۋرالى ەمەس, ەڭ الدىمەن بيلىك تاراپىنان دەنساۋلىق ساقتاۋ, ءبىلىم بەرۋ, الەۋمەتتىك قامسىزداندىرۋ, بالالىق شاقتى قورعاۋ بويىنشا ناقتى شارالار تۋرالى بولىپ وتىرعانىن اتاپ ءوتتى.

تۇڭعىش پرەزيدەنتتىڭ تاريحي-ما­دەني ورتالىعى بالالار جىلى اياسىندا كوپتەگەن قالاداعى بالاباقشا مەن مەكتەپتەگى بالالارمەن كوكتەم مەن جاز ايلارىندا مادەني ءىس-شارالاردى بىرلەسە اتقاردىق. اتاپ وتەر بولساق, «قازاقستاننىڭ كيەلى جەرلەرىنىڭ كارتاسى» اتتى كۆەست-ويىندارى بالالار­دىڭ جازعى دەمالىسى كەزىندە ايلىق­تار مەن اپتالىقتار تۇرىندە ۇزدىكسىز ۇيىمداستىرىلدى. كانيكۋلداعى مەك­تەپىشىلىك لاگەر بالالارى ءۇشىن ورتا­لىقتا قازاقتىڭ ۇلتتىق ويىندارىن ۇيرەتۋ ماقساتىندا ەكسكۋرسيالىق-ۇلتتىق ويىندار توپتاماسى ءوتتى. ماسەلەن, 1 ماۋسىم كۇنى «بارلىعى بالالار ءۇشىن!» رەسپۋبليكالىق اكتسياسى اياسىندا تەمىرتاۋ قالاسىنىڭ ءبىلىم ءبولىمى, «شاڭىراق» ەرىكتىلەر ورتالىعى مەن تۇڭعىش پرەزيدەنتتىڭ تاريحي-مادەني ورتالىعى «ارسەلورميتتال تەمىرتاۋ» اق قولداۋىمەن «كوڭىلدى جاز-2022» اتتى مەرەكەلىك ءىس-شارا وتكىزدى. مەرەكەلىك كونتسەرتكە تەمىرتاۋ قالاسىنىڭ 10 مەكتەبىنەن جانە 10 بالاباقشاسىنان 150-گە تارتا وقۋشى كەلىپ, «استانا» الاڭىندا تانىمدىق ويىن ستانسالارىندا سپورتتىق (ۇلتتىق ويىندار, ەستافەتالار, سپورتتىق ويىندار), زياتكەرلىك ستانسا (ۇستەل ويىندارى: شاحمات, دويبى, توعىزقۇمالاق, باسقاتىرعىشتار, «ينتەللەكتۋم» جانە ت.ب.), «ادەبي قوناقجاي» ستانساسى (ما­نەرلەپ وقۋ سايىسى, ۆيكتورينالار), «شى­عارماشىلىق شەبەرحانا» ستانساسى (سازدان, ەرمەكسازدان, وريگاميدەن جا­سالعان سۋرەتتەر, قولدان جاسالعان بۇ­يىمدار كونكۋرسى), ججە («اقىلدى باعدارشامشى») سەكىلدى تانىمدىق ويىندارعا قاتىستى. ال ۇلتتىق دومبىرا كۇنىنە وراي تەمىرتاۋ قالاسى «الەم» بالالار-جاسوسپىرىمدەر شىعارماشى­لىق ورتالىعى مەن «ميراس» ۆوكالدى-اسپاپتى ءانسامبلىنىڭ تاربيەلەنۋشىلەرى ورتالىقتىڭ شاڭىراعىندا ۇيىم­داس­تىرىلعان مەرەكەلىك ءىس-شاراعا ۇلەس قوستى. تۇڭعىش پرەزيدەنتتىڭ تاريحي-مادەني ورتالىعى بالالاردى سپورتپەن شۇعىلدانۋعا, سالاماتتى ءومىر سالتىنا شاقىرۋ ماقساتىمەن ءتۇرلى سپورتتىق جارىستار مەن سايىستاردى ءجيى وتكىزىپ وتىرادى.

«سپورت – تاربيە نەگىزى» ءىس-شاراسى بالا­لاردىڭ جازعى دەمالىسىن كوڭىل­دى وتكىزۋىنە, ولاردىڭ سپورتپەن شۇعىل­دانۋىنا جانە سالاماتتى ءومىر سالتىن ناسيحاتتاۋ ماقساتىندا ۇيىمداستىرىلدى. سايىسقا تەمىرتاۋ قالاسىنىڭ №2 ورتا مەكتەبىنىڭ وقۋشىلارى قاتىستى. تاعىلىمدى ءىس-شارانى ورتالىقتىڭ باسشىسى سايدا سارگيزوۆا اشتى. ءىس-شارانىڭ قۇرمەتتى قوناعى اۋىر اتلەتيكادان سپورت شەبەرى, كاسىبي پاۋەرليفتينگتەن الەم جانە رەسپۋبليكانىڭ بىرنەشە دۇركىن چەمپيونى, ارداگەر-مەتاللۋرگ ايتجان يساقوۆ اقساقال جاستارعا سپورتپەن شۇعىلدانۋ ارقىلى كوپتەگەن جەڭىسكە جەتۋگە بولاتىنى جايلى اقىل-كەڭەسىن ايتتى. مۇنان ءارى ­جاستار ەكى كومانداعا ءبولىنىپ, قول كۇرەسى مەن دويبىدان سايىسقا ءتۇستى.

بالا لايىقتى تاربيە السىن, بالا ۇلتتىق تامىرىنان اجىراماسىن, زا­مانعا بەيىم بولسىن, بوس ۋاقىتىن پاي­دالى وتكىزسىن, قاجەتتى ەم-دومىن ەش كەدەر­گىسىز السىن, ارمان-قيالىنىڭ شىن­دىققا اينالارىنا سەنسىن. 2022 جىل – بالا قۇقىعىنا قاتىستى مەملەكەتتىڭ باتىل قيمىلدارى جۇزەگە اساتىن بەرەكەلى, ءتيىمدى جىل بولادى دەگەن سەنىم باسىم.

قۇرمانشادى ورازىمبەتوۆ,

تۇڭعىش پرەزيدەنتتىڭ تاريحي-مادەني ورتالىعىنىڭ عىلىمي قىزمەتكەرى

قاراعاندى وبلىسى